Meithal Maw, Daihnak Dah?

Meithal Maw, Daihnak Dah?

Salai Joseph KB Thawng

Naihrawng cu thawngpangchia a tam ngaite. November 19 ah a cangmi, Kawl ralkap nih Kachin Independence Army (KIA) ruahlo in an hlawm mi hna thawngko hi a hung tur. Ninglo canglo in nawn an si. A bikin Chin National Army (CNA) in  Ram Hngak le Biak Tin Lian zong nih mual an kan liamtak---lung a fak hringhran. Ralkap Cozah nih kum 50 leng an kan uk cang. Kan covo an kan chuh. Hramhram in an kan pen. A bikin tlangcungmi (ethnic groups) hi an kan pheu. An duhning paoh in hruai ding le an nawlngeihnak tangah chiah peng ding ah an kan ruah. Minung covo (human rights) a ngei lomi ko ah khin an kan ruah. Minung ciocio zawnruahnak thinlung a ngei lomi ralkap pawl an lor hringhran ko.  

Kawl Ralkap Meithal  In Kachin Ralkap Hna Nunnak  A Liam  

19 November 2014 cu Kachin miphun caah philh khawh ti lo ding mi ngaihchiatnak tuanbia ai ṭialni a si. Kawl ralkap nih timh ciammam tein Laiza khua Officer Training Camp cu miakpi 105mm in an kah. Ralbawi a siding mi minung 23 an nunnak a liam. Hi kahthahnak kongah Voice of America (VOA) nih Burma Army, Commander-in-Chief, Min Aung Hlaing biahalnak an tuahmi ah "Kawl ralkap nih Mansi lam an cawh lioah Kachin Independence Army (KIA) nih an kah hna, hna an hnawh hna caah, ralrin peknak le mah pum ralvennak caah kahmi a si" tiah a leh hna.  

Asinain La Nan (KIA biachimtu) nih, "Mah pum ral vennak caah kahmi a si ti hi adik lo. Kahnak a chuahtertu hi KIA an si tiin mawhchiattu dingah Kawl ralkap nih Local Media (e.g. 7 Day News)  an hman hna i atu bantukin an phuannak hi a si. Angaite cu, kaphnih karlak ah i kahnak a si hrimhrim lo. Atu bantuk i kahnak hi kanmah thawkmi a si lo, zoh u, miakpi in pei an kan kah cuahmah lio a si lehlam hi" tiah a ti.

A hnu deuh ahcun, Min Aung Hlaing siseh, U Thein Sein siseh, Kawl ralkap kha thiamcoh in bia an chimveve---kah sualmi an si, tiah an chim. Asinain, ma hlei loin meithal kuanfang cu Kachin ram ah a tla cuahmah ko hih---an kah peng ko hna. "Kah sualmi a si" timi hi zumhawktlak a si kho lo. Aruang cu, "Tutan an kah hna nak miakpi (105mm) hi dingṭeo in kahnak a si i mortar hi a zuan in a zuang mi an si. Atu an kah hna nak miakpi hi an target kha hmuh riangmang in kah mi a si. Cun, hi bantuk miakpi kahnak hi cunglei Battalion maw commander maw asiloah, a hlan ahcun tactical commander  rak timi hna nawlpeknak lawng in kah khawh mi an si," tiah Victor Biak Lian nih a facebook timeline ah a ṭial.  Phundangcun, kah sual, timi cu lih a si, ti khawh a si.

Kawlram Daihnak Lamthluan le Meithal

Ramchung ah daihnak thlam a len khawh nakhnga tlangcungmi party hna le hriamtlai pawl an cawlcangh cuahmah lioah (peace process) atu bantukin thil cu a hung cang ko ai. Ralkap nihhin‘daihnak’(positive peace) hi an duh taktak maw, taktak lo, ti hi biahalnak a um---duh taktak dawh an si lo(?).

Ramchung minung nih kan haal bikmi hi rumnak an si lo. Daihnak tlingtu hi a rak si. Cu daihnak innpi sakding ah a tungtlang an hun van/dirh cuahmah lioah atu bantuk thil a can cu Ralkap cozah nih hin meithal an ibochan peng rih, ti khawh a si. Kawl ralkap hi zumhawktlak an si lo ning a lang chin lengmang.

“Ramrian kong ceihhmaiṭi (political dialogue) khawh nakding ah, kahdohnak kan ngol hmaisa a hau” tiah Dr. Salai LH Sakhong nih a rak chimmi zong adik. Tutan KIA an kahmi hna hi Pyidaungsu Hluttaw Nayaka Thura Shwe Mahn nih, “2008 Phunghrampi hi 2015 thimnak a dih hnu lawng ah remh khawh a si te lai” tiah a chimmi he pehtlaihnak ngeih khawh a si” tiah UNFC nih an phuan.

Kawlram hrawktu, Gen. Ne Win bia ka hun thei. “Ralkap timi cu vanlei ah meithal an puah in an kap bal lo. Dingṭeo in kah phung a si” a rak ti. Ataktak ah dingṭeo cun an kah cuahmah ko hih! An pu keneh an hlo kho lo. Anmah holh cun ‘Thit-sar” an ngei lawlaw.

Tuukhaltu (Shepherd) nih cun, a tuu hna hmai ah a kal i ramhring le dinhhmun ti pawngah a hruai hna. Cawkhaltu (Cowboy) nih cun a caw kha fung in an hnu in a khalh hna. Kawlram hruaitu hna nih cun Meithal fung in an kan khalh ve. Ralkap butkedan tangah kum 50 leng kan um cang. Kan thaw a ip ko. Zeibantuk lungput ko khi dek khuachia nih an thinlung ah a chiah.  

Meithal kan duh lo, kan duh hrimhrim lo. Daihnak kan duh. Daihnak kan haal hringhran.  

Pasalṭha Hna Upat Peeknak

Keiṭialfa bang in e

Fingtin mualtin cuul

Ram ca luhlo fahniang rual

Dawtpa har hniang na tlei cu

Tluangthuk ral bang kan hlau

A khal lo na peek thisen sung

Anung vansang cung tiang

Nan liam siaherh ve lai mu

Nan doi kan ramte kha

Kan biak Zingnu tu nih e

Hnuaice ko seh daihnak ram ah.