Van Sui Par @Vanvan he biaruahnak

Kawlram Huap, Miss Myanmar World ah Top-5 tiang a phanmi,

Van Sui Par @Vanvan

he biaruahnak

Min            : Van Sui Par@Vanvan

Nulepa         : Pu Myo Min, Pi Ngun Caan

Khua/umnak   : Hlaing Township, Yangon

Chuahni thla   : 27 July

Cawnmi        : BA English, Business (BARS)

Mitung         : 5” x 8’

Muici uar phun : Araang, asen, anak

 Duhmi rawl    : Bread le Korea rawl phun

Zuammi         : Hlasak,  zuksuai (sketch)

Tinhmi          : Khua le ram caah santlai mi nu pakhat

Tlaihleng      : Be strong and courageous for the Lord Your God I with you wherever you go (Joshua 1:9)

E-mail          : vansuipar1@gmail.com

Facebook        : Tin Sandar Myo (Van Van)

Kawlram huap in model lei ah Laimi min na kan ngeihter caah kan ilawm tuk.

Hi hmun tiang ka phak khawhnak hi Pathian thawngin siseh, nanmah cio (Laimi) tha peknak thawng in a si. Kaa lawm tuk ve.

Miss Myanmar World (MMW) le Model Academy (MA) naa zuam lioah winner ka  si lai, tiah naa ruahchan maw?

MMW and MA kaa zuam lioah winner  ka si hrimhrim lai ti nakin, keimah lei in ka si khawhtawk ka rak izuam ko i a dang phichuak cungah ka lungsi ko.

Thapetu mitampi nih winner dingah kan in ruah. Zeiruang bik ahdah na co lo?

Thapetu mitampi zong nih winner a si lai tiah nan kan ruahpiak.  Zeiruang ah ka co lo ti tu cu ka thei ve lo. Organization nih thim a si tikah an duhmi phun ka si lo i a si ko laiJ.

Laimi na si ruangah an in namnet in winner an in peek lio bia a si sual maw, siarem tein chim na duhmi a um ahcun.

Ka pawngkam mi hna sin ahcun cu bantuk namnehnak tete cu ka hmuh bal, ka theih bal ko. Asinain keimah pumpak in ka tong bal lo.

Model lei hi na rak huam phun hrimhrim mi a si maw, a cawn tah na cawng bal maw? Na pawcawmnak tiang in tah pehzulh naa tim maw?

Model lei hi ka huammi phun a si i Myanmar Model Management ah ka cawng bal.  Professional line tiang tuah khawh hi ka tim ko nain Kawlram ah model sinak lawng taktak in  a fawi lo caah a dang zong kemhchih a hau ko.

Model naa zuam lioah zeidah a har bik, na timi a si?

Zuamnak tete kaa zuam lioah hin judge pawl lawng si loin mizapi nih kan biachim kan umtu kan thil hruk tete hna tiang an kan zoh tikah i ralrin ngai a hau i mahte kha a har bik tiah ka ruah. I ralrin le i  timhtuah peng a hau i mah tete kha  a harnak cu a si.

Mark petu, asiloah, judge pawl nih zeidah an zoh bik? Tc. Body structure maw, performance dah?

Judge pakhat cio nih mark an peek ning an ilo lo. MA lioah hin a hnu bik Grand final i lambi zulh/kal (catwalk) zuamnak in mark a pemi an si. MMW tu ah hin cun a mark zeitindah an peek timi kha hrilhfiahnak a tuahmi a um lo.

Model minthang pakhat sinak dingah zeidah a biapi bik, tiah na ruah?

Keimah ruahning ahcun Model minthang pakhat si khawh nakding ah body structure dawh hi a biapi. Cun, taksa ṭha ding in i zohkhenh a hau. Cun a biapi bik mi cu mah le mah i zumhnak (confidence) ngeih hi a si.

Lai mino caah Model lei theihtlak le fimchimh na duhmi, cun na saduhthah a um ahcun…

Lai mino hna nih Model lei luh an zuam ahcun professional tein rian a ṭuammi le zumh awktlak a simi agency ah luh i anmah he rianṭuanṭi ah a ṭha. Cun, kan nu le pa zong nih support ṭhate pek ahcun model lei ahhin hmunhma ngeih a fawi deuh lai. 

Lai mino hna caah Model lei he pehtlai in awareness le saduhthah chim ka duhmi cu, model field cu miphun kip icawhnak a si tikah right attitude ngeih i mah le rian kha upat bu tein ṭuan a herh. Kan Laimi cu minor group kan si. Kawlram sining le boruak kan zoh ahcun  mi tlawm deuh kan si. Cun, Modeling lei i rianṭuan mi mino hi kan tlawm tikah, a biapi deuh in chim ka duh mi cu mah le sinak miphun le biaknak thlau lo tein Pathian theih bu tein mah le  tinhmi hmunhma kha lungdonglo tein pehzulh hna seh, tiah saduh ka that.

Kei, Laikhal ṭheo, na Kawl min (Tin Sandar Myo) nakin na Lai min Van Sui Par@ Vanvan hi hmang law ka hun duh tuk ṭung.

Lai min kha ka duh tuk ve, ka hman fawn ko. Ka Kawl min khi cu Model zungthiamnaklei min (အႏုပညာ) a si.

Nu pakhat nih ngeih lo awk ṭhalo, tiah na ruahmi zeidah a si?

Nu pakhat nih ngeih lo awk ṭhalomi tiah ka ruahmi cu “Lenglei ah si loin chunglei dawhnak taktak kan ngeih lawngah  lenglei dawhnak zong a tling lai.

Nu Covo (Women rights) kongah na pomning le nu le pa kan ikhat ko (gender) tiah na ruat maw, a ruang?

Nu Covo kong ahcun gender equality ngeih hi ka pomning cu a si ko. Nu loin pa lawng zong nan si khawh lo bantukin pa um loin nu  lawng zong a tlamtling kholo ve lo. Cucaah, pakhat le pakhat i upat le theihthiam bu tein nunṭi a herh ko.

Nu le pa sinak ah i thlau ngai in minih namnet le chawnbiak na tong bal maw? Cun, nu ka si ruangah hi tiang lawng hin ka tuah awk a si, tiah rikhiahnak na ngei maw?

Mah bantuk chawnbiak hi cu ka tong bal hraw lo. Nu ka si caah tuah ka duh ko nain  tuah ngam lomi thil cu a um lo. Amah belte, kan community, kan society chung ah rikhiahnak tete a um i minih zohchuk ding le Khrihfa sining he a ralchanh mi thil cu tuah lo khawh kaa zuam.

Nu pakhat caah aman khiah khawh lo tiang in a sunglawi mi zeidah a si, tiah na ruah?

Nu pakhat caah aman khiah khawh lo tiang in a sunglawi mi cu ‘nu dawtnak thinlung ngeih’(being a mom = မိခင္စိတ္ဓာတ္) khi a si, tiah ka ruah.

Nu pakhat caah fashion hi zeitluk indah a biapit?

Nu ca lawn si loin pa ca zong fashion hi a biapi ngai ko. A paw tharmi fashion paohpaoh hei dawi le i hrukaih theng tu cu a hau lem lo, tiah ka ruah.  Mah le siningte (own style) hi a ṭhabik ko. 

Muidawh pakhat sinak dingah zeidah a biapi bik?

Muidawh pakhat sinak ding ahcun lungthin dawh hi a biapi. Kan lungthin aa dawh lawng ah kan mui zong aa dawh kho lai tiah ka ruah.

Skirt le angki hngawngbak kan i hrukaih caan ah kan lungput aa thleng tiah na ruat aw?

Skirt tawite le angki hngawngbak kan i hruk caan ah kan lungput aa thleng ti cu ka ruat lo. Minung cu kan thil hrukaih nih a chunglei kan lungput kha 100 % in reflect a si tiin ka ruat lo.

Chanthar Lai mino fashion na hmuhning?

Chanthar Lai mino pawl hi kan umnak hmunhma cioin chan sining kan dawi kho i hrukaih zong kan thiam ngai tiin ka hmuh.

Khah, hal lo awk a ṭha bak lomi in hal cang ning :D Atu hi na lawnglo sual maw cu?

Ka email le pehtlaihnak zong nan theih cang ko i theih nan duh ahcun personal in hal si ko seh mu :D

Zeitik hrawng (kum) ahdah pasal na ngeih te lai?

Keimah tein dirhmun fek ka ngeih khawh tikah pasal ngeih kaa tim.

Pasal caah na saduhthah le na uar phun kan chim law…

Pa sal caah cu bantuk kha bantuk tiin rikhiah mi ka ngei lo. Pa pakhat caah ka uar mi phun cu mah le zumhnak cungah aa zuam mi le rawlchuan a thiammi ka uar hna :) :) :)

  

Laipa thengte pasal dingah naa thim lai maw, na v alai maw?

Laipa thengte kan vaat khawh cu ka duh. Miphun khat, biaknak khat a si khawh ahcun a ṭha ko. Asinain pakhat le pakhat i theihthiam khawh le zawn i ruahpiak khawh kha a biapi bik.

Lungsau tein bia na ka leh caah kaa lawm.

Atu bantuk biahalnak na ka ngeihmi cungah ka lawm tuk ve.