Mother’s Day Ah Nule Upat Peknak

Mother’s  Day Ah

 Nule Upat Peknak 

Anna Jarvis, Mother's Day thawktu

Salai Joseph KB Thawng

Hringtu Nu Ni cu Mrs. Anna Jarvis nih a rak thawk ti khawh a si. Jarvis cu a nu nih May 9, 1905 kum ah a rak thihtaak. May 9, 1907 ah a hawile aa sawm hna i a nu upat peeknak cu a rak tuah. Cuka a rami cu a nu a nung rihmi kha zuunngaih pangpar sen (red carnation) a tonh hna i a thi cangmi cu a raangmi a tonh hna. Amah belte amah hlan ah England ram, Julia Ward Howe (1872), Mary Towles Sasseen, le Fran le E. Hering tepawl nih an rak tuah nain acozah le ram uktu hna nih theihpi an raksi lo.  

Jarvis nih “Hringtu Nu Ni hi rampi nih a theihpi mi le a tuah awk a si” tiah ram uktu hna sinah cakuat 10,000 a ṭial. American upadi sertu hna nih May zarh 2nak cu nule upat peekni siseh tiah 1913 kum ah hnatlaknak a tuah. Cu lio American President, Woodrow Wilson nih “May zarh 2nak cu Hringtu Nu Ni a si” tiah a thanh. May 9, 1914 kum ah American ram pumpi ah nule upat peeknak cu President hruainak in an rak tuah. 

Mrs. Anna Jarvis cu 1948 kum November 24 ah a thi. A thlaan cungah "Carnation" pangpar par 43 an rak chiah. Asullam cu a thihni tiangah "Hringtu Nu" upatnak a tuahmi ram 43 kan si cang, upatnak kan peek ti khi a si.

“Hringtu Nu Ni” ah Nule hna upat kan peek hna. Nu loin vawlei ah hin kan sem lo i kan chuak lo. Thlapa thlariat le thlakua pawi le phurh kan si. Thihnak thlantlang ah dir in mitchinh kamseh le thlanhripipuak in hrin kan si. Cheukhat nu chimnak ah  “Nau nganfah an tuar khawh lo tuk lioah hin a thih in thih lawlaw a duhmi an tampi” tiah ka theih bal. Asinain fanu fapa muihmel an hmuh tikah an i lungsi tuk ṭhan. Hnukthlum in a kan cawm. Hrin lawng a si lo, nilin khua-al, a suur a han hrial loin fale caah ṭuakpar in rian a ṭuan rih. Puitling ah an kan ser.

Capo alo nain chim ko ning. Kan nule hi an ngaknut lio ahcun an ‘hnuk’ langhter cu chim hlah, an tlangval nih thampiak hmanh a siang lo. Felte le man ngeite in a kilkawl (Chanthar nungak pawl belte hi a lang sual lai lo ti a phang mi hna kan lo pah deng cang---angki hngawngbak kan uar tuk cang). Asinain, cu tluk a sian lomi cu a fa hnuk haal lai a siang lo. Mihmai a tuak lo, tlangval hmai a tuak lo. Phuhlut, a hei chuah mei ko. A dinh huar ko :D.