Chin National Day Le Chin Miphun Lungput

 Chin National Day 

le

Chin Miphun Lungput

Salai Joseph KB Thawng

Biadomhnak 

                 

Mizei miphun hmanh nih Miphun Ni (National Day) cu an ngei cio. Kannih Chin Miphun zong “Panglong Agreement minthut (Feb. 12, 1947) hnu in 1948 kum ah luatnak (independence) cu Kawlmi itel in tlangcungmi he kan hung hmuṭi hna.”¹ 1948 kum, Feb. 19-22 tiang, Falam khua Conference ah Feb. 20 cu Chin National Day (CND) siseh, tiah biahren a si. Asinain, Kawlram cozah nih CND hi hrawhpiak an kan timh zungzal.

             

“Gen. Ne Win cozah a kai hnu (1974) ah CND hi kum 30 renglo ningcang tein tuahnak nawl pek lo kan si.
CND kha ‘Chin Ramkomh Ni’ (Chin State Day) ah thlenpiak kan rak si.”² 2013 kum ceo ah ningcang tein CND tuahnak nawl pek kan si ṭhan. “Atu bantukin Chin Miphun Ni tuahnak caanṭha kan hmuh khawhmi hi CNF/A le Thein Sein Acozah remdaihnak bu tonnak thawngin a chuakmi a si tiah, CNF GS Paul Si Ṭha nih a chim.”³ Tukum cun, avoi (66^th)nak kan tuah a si cang lai. Cucaah, CND ah zei bantuk lungput dah kan ngeih a herh. Zei bantuk lungput he dah hmai kan nawr lai, timi hi a biapi ngaingai.

Ni  Sunglawi CND

             

“Chin National Day (CND) cu Chin miphun caah miphun tling kan sinak (identity) a langhter kho biktu a si caah a sunglawi khun. Avoi (1)nak CND lio zongah Prime Minister a simi U Nu pumpak nih a telpi hna i February 20 cu cozah zungkhar ni (National Holiday) ah cohlanpiak kan si.”⁴ Nihin tu ahcun phungning in National Holiday cu pek kan si thai lo. “Avoi (1)nak, Chin Natioal Day cu 1951 kum, Mindat khua ah tuah a si. Cu puai ah Kawlram Prime Minister U Nu, Karen Vuanci Mahn Ba Saing, Piṭhezi le Tatanazi Vuanci Zung in Secretary Thakhin Thar Khin, Tit-ṭaw Vuanci zung in Situ U Hman, Shan State Secretary U Aung Baw, hna nih an mipum in an rak telpi hna. Kawlram  President, Shan Vuanci, Kachin Vuanci, Kayah Vuanci hna sin in upat peknak cakuat (memorandums) zong rel a si.”⁵ 

             

Cucaah, CND cu vawleipi le Kawlrampi nih theihmi ni, miphun tling, a luatmi, mah tein uknak nawl a ngeimi, bawi le chia kan itluk ni a si caah a sunglawi khun. Nang maw kei, timi thleidannak um loin lungrual tein democracy uknak phung chungah kar kan hlanṭi ni zong a si.

     

CND Le Ngeih A Herhmi Lungput

               

“Kan lungput a tluan lo le a ṭhat lo ahcun kan nunlam a tluang kho ve lo. Ram ṭhancho hlan ah ramchung minung lungput a ṭhancho hmasa a herh. Kawltung a kan phanhtertu thil hi kan thazaang nakin kan lungput an rak si deuh tawn.”⁶  CND ah tah zeibantuk lungput dah kan ngeih awk a si?

(a) Miluat Lungput

                

Thonginn ah a ummi pa nih phaisa tampi nakin luat kha a duh deuh. Sui le ngun he erhmi si nakin luat i zalong tein khuasak a duh deuh. “CND cu kan luatnak ni” a si caah kan theih caamcin dingmi ni a si. Thaw ip in a kan mawngtu hna kuttang in zalonnak kan hmuhnak ni a si. Chiah pek a um ti lo. Kuli phurh (farce labour) a um ti lo. Ramnga lak a um ti lo. Hramhram in uk kan duh lo, zomhtaih le namneet kan duh lo, timi Chin pasalṭha sinak lungput kan ngeih a herh. Chin miphun hi miluat kan si, timi lungput kan ngeih a herh. Cu lungput kan ngeih ahcun kan lungput lila nih miluat ah a kan ser lai.

(b) Funtom Duhnak  Lungput

             

Hlanchan uknak a ṭhat lo lio i pengkip in minung 5,000 itonpumh i  biachahnak ngeih timi hi thil dintuai lo, thil pipa taktak a si. Hi Conference (CND) nih a fiantermi cu ‘a ṭengnge mi lungput’ an rak ngei lo, ti hi a si. Lungrual taktak in chak le thlang ti a um lo. Nang Zomi, nang Falam, kei Lai, timi thleidannak  tlang a rak sang lo. Cu lungput cu le tuanbia hna cu a thar in Chin miphun kan lungput ah hram a thlak ṭhan a herh.

             

Kawlram cozah nih kum 30 renglo  phungning lo le kan duh lo ningin (Chin State Day) an kan hmanter. Hi nih a langhter mi cu Chin Miphun hi hrawh an kan duh, tinak a si. Kanmah ram te ah kanmah nunphung, kan holh le ca cawnnak nawl hmanh an rak kan pe duh lo. Kan covo an kan chuh. Kan tinvo le kan zalonnak an kan thuhkanh. “Zalonnak tlamtling (positive freedom) le daihnak tlamtling (positive peace) timi kan ram le kan miphun sinah a um khawh thai lo caah ralzaam (refugee) ah kan i chuahphah.”⁷
 

Cucaah, atu bakin CND tuanbia le sining, amuru kan theih a herh ngai. I ṭhencheu si loin i funtom duhnak thinlung, lungput kan ngeih a herh. Kanmah Chin miphun kan i funtom ahcun ahohmanh nih an kan ṭhen kho lai lo. Kawl cozah le ramdangmi zong nih an kan zomhtaih ngam ti lai lo. Cucaah, CND cu kan i funtomnak ni le caan, hmelchuhnak an si ti hi kan theih camcin lai.

(c)   Nunphung Le Caholh  Kilven Duhnak Lungput

              

Chin miphun hi puai le lam a sunhsakmi miphun kan si. Puai sunglawi tampi zong kan ngei hna. Cu lakah CND hi kan sunhlawih khunmi a si ve. Biaknaklei puai ahcun kan nunphung hmannak le langternak a um kho tuk lo. Cucaah, CND caan te tal ahhin cun, nunphung phunphun hmuhsaknak (culture shows), laam phunphun (culture dances), aw dawh phunphun (songs), paih zuamnak (wrestling), thuamthil hmuhsaknak (fashion show), dawh zuamnak (Chin Miss/Mister Universe), le caholh kilven ṭhanchoternak (protecting language/literature) tbt. kha a phunphun in kan tuah lai.

              

Mizeimaw nih “Khrihfa chan ahcun hi bantuk phung le phai hi cu lawki  minung (pagan) lawng nih an tuah awk a si, kannih nih cun kan tuah awk a si lo” an ti. Cu lungput cu miphun tlaunak caah a hram pakhat a si. Cu bantuk lungput cu kan ngeih lo a herh. Pathian nih hin “Miphun tling ah a hun kan ser bakah nunphung le sinak cu a rak kan pekchihmi a si.” Kanmah nunphung le caholh kanmah nih kan kilven lo, kan sunsak lo ahcun ahohmanh nih an kan uarpiak in an kan lomhpiak bal lai lo. A donghnak ahcun ‘Uico nih a ṭam’ ti a chuak hoi hnga.  

CND Muru Le Chin Miphun Lungput

         

“Chin Natioanl Day” cu kan nunphung kilvengtu a si. Kan tuanbia ṭialtu a si. Kan idawtnak a karhzaitertu a si. Thleidannak tlang kan chimhni a si. Kan caholh a ṭhanchotertu a si. Miphung tling kan sinak a langhter zungzaltu a si. Vawlei khuaza kan phanh zong ah a hu (bu) tein a kan funtom khotu ni sunglawi a si. A ralṭhami miphun kan sinak langhtertu zong a si. Zalon a duhmi, luat a duhmi, mah tein khuakhan lairelnak nawl ngeih a duhmi, Chin miphun kan sinak langhtertu hmelchunhnak a si, timi ‘lungput’ he Chin National Day kan hman/tuah a herh.

Biadonghnak

            

‘Lungput’ kan ti tikah lungput ṭha a um bantukin lungput ṭha lo zong a um ve. Phundang cun, mi lungput chia kan rak um tawn. Chin National Day kan tuahmi cung hoi hna ahhin lungput ṭha lo a ngeimi kan um kho (?). Chin ah miphun tling pakhat kan sinak hi kanmah le pengtlang cio in kan i ṭhen tawn. Tck: Nang Zomi, nang Falam, kei Lai, tbt. in i ṭhen sual a fawi. I mawhchiat a fawi, lung i hmuh lo a fawi ngai.

                

A ngaingai cu, CND cu  kan ram kanmah ram a si cang, kan vawlei kanmah ta a si cang. Kanmah tein kan i uk lai. Zeizongte kan i tuaktan khawh cang, timi langhtertu Ni sunglawi a si. Cu tluk hmelchunhnak ṭhami le Chin miphun caah roriak tuanbia taktak a simi Ni sunglawi ahhin kan dihlak nih lungput ṭha, i funtom duhnak lungput, miluat lungput, teinak lungput he CND hi kan parter chin lengmang a herh. Vawlei khuaza kan umnak cio in kan sunlawiter chin lengmang a herh.

              

“Pathian nih Chin miphun le Chinram thluachuah pe sehlaw, CND ah kan ngeihmi lungput ṭha hmangin Chinram le Chin miphun alu nung ko seh.”

Ref:

1.      Pu Lian Uk, “Lai Miphunpi Ni” (http://chincommunityofdfw.weebly.com/lai-miphun-ni-thawhkehnak.html)

2.     Dr. Salai Lian H. Sakhong, “Interview” (ṬṬ, March 2013, p-127)

3.     The Chin Star Media, (http://www.thechinstar.com/index.php/myanmar/chin-national/468-chin-miphun-ni-tuah-khawh-a-si-cang-lai)                                                                                                               

4.     Pu Zing Cung, “Chin Identity and CND” (http://www.norwaychin.no/?p=57)

5.     Lian Cin, “CND Tuanbia Tawi” (http://chincommunityofdfw.weebly.com/lai-miphun-ni-thawhkehnak.html

6.     Joel Ling, “Lungput” (Vol. I, April 2009, p-4)

7.     Khaipi, “Ralzaam Kan Si Taktak Maw?” (ṬṬ, December 2013, p-35)

(Note: Hi capar hi avoi 66nak Chin National Day conglawmhnak caah CYO Dallas Texas (USA), Literature Committee nih an tuahmi caṭial zuamnak ah 1^st ka hmuhnak capar a si)