Mawimawi He Cikhat!

Mawimawi He  Cikhat! 

Salai Joseph KB Thawng

Mawi Mawi he kan i duhdawtnak kong hi cahmai nih a tlum lai lo. I pheh bak lo le thupnawk lo bak in ka hun zam. A ngai huam nih ngai u, tiah tlang ka hun au. Cawn a duh nih kan cawng u. Tha peek a duh nih tha kan pe u. A huat belte kan hua hlah u. “Duhnak hi thihnak tlukin a ṭhawng ve” titu in kan pompiak te u.

Lam kan len (kal) tikah ka ban fekṭhup in aa tlaih. Ka orhlei ban tlaih a duh lo. Adam kehlei hnakruh in Pathian nih Evi cu a sermi a si ti khi a si le ka kehlai ban ṭheo cu a banh. Minih an kan zohtuk khih, rak ka thlah rih ka ti zongah a duh nemmam lo. Fek chinchin in a ka tlaih lehlem. Ka ban aa tlaih bu cun ka mithmai le ka hmurka lawng cu a ka zoh. A caan ahcun a lum (aa chuih) deng tawn. Ka U, atu na ban kaa tlaih lio ahcun van zong cim sehlaw ka ṭih lo, a ka ti. 

Khuazeimaw Vandam heiti bang a ka bochan lawlaw. Lamtlang in valah zuang sehlaw tlangkua ka liam manh ve hnga dik maw. Tlangkua ka liam manh lo hmanh ah kan ṭumbut le kan hleihlat cu ka phan manh ngenge. Asinain, karate thiammi le Jackie Chain um cun ta ka um ve. Pikparing le sahal tal an awn ti a si lomi ka hei ti. 

Hawile hna, Mawi Mawi hi aa dawh bak cuh. A sam hi dinte in aa senter. Ding zirzer tein a liang tang deuh tiang aa thlah. A ngo tuk fawn i mom hliphlep tein a um. Salai Zai Ling Dun lebang nih hmu sehlaw a seh phah hnga. Tinsensi, hmursensi, make-up le tanakha tbt. kha luantuk in thuhboih a hmang lo. Skirt tawi nawn, jean bongbi tet nawn le angki hngawngbak zong aa hrukaih ve tawn. 

Bia a chim tikah hloptlau tein biachiam a thiam. A tlonlen zoh ah zaang a dam tuk. Capo saih lebang cu a huam ngaite. A capo saihmi ka nihpiak sual lo belte ahcun a hmur hi veitia in aa bo i hnu a ka chit. Nau, na capo saihmi nih a chuak tuk. A dang von sai rih, ka ti. Kal ko, ‘misualpapi, kan vuak lai’ tiah a ṭahbeh aw le aa hnoh aw fonh in a ka ti. Zialmal tein ka von kuh i a cal ah ka von kiss. Aa nuam tuk i phuhrut, tiah a hnap thloh buin a ni. Mawi Mawi hi Korea zatlan (Korean romance) zoh tuk kaw ‘cal hnamh’ phun cu a uar kho tuk. Vandam thazaang cu keng ninglaw ka puak ve lawlaw hnga.

Mawi Mawi nih hiti i hnoh le i kuhreh tehna a rak uar hi keimah palh a si rua. Hei chim ko ahcun “zei bantuk nungak dah na uar” tiah a rak ka hal bal. “Ai hnoh ngaimi ka uar (thathut hnoh cu ka hua hoi). A koktlong tukmi Iang Iang bantuk cu ka uar lo” ka rak ti bal. Cu bia cu a rak by-heart ko rua. Ai hnohning hi mineng a thla lei. Zeidang chim lo, lamkal pah i ka bantlaih ka senh lo hmanh ahcun dakaw nawisen kan hnuh cuh. Nungak dang ka meet sual citcet lebang ahcun… ka hnakhaw hi sennak aa ting lo. Mihmai zong a tuak ti lo. A ka unh deih. A lih le hrokhrol in ai ṭahter---hnoh celh lo khi a si ko cuh!.

Voikhat lio hoi hna cu miphung-sakel cun Kandawgyi dum ah teh ka va ṭhut ve. Kawl nungak le tlangval cu torlecheng an um. Aa kup na, aa dawp na, aa rek na, aa pom na, a ni na, a ingpuang na, tiin a khuahkhuah in an ṭhu lulh ko hna. Ka dl nih cun rak ka pom ve, rak ka kup ve ti a si. Ah…cu bang cu. Zohchia le khenhru in, kannih cu Laimi pei kan si cu ka ti. Bekbak a nuar ko rawh. A ṭah aw in, siii….duhnak ah Kawlmi le Laimi ti a um lo. “Zeithil hmanh hi pawngkam nih a mawnghmi lawngte an si” tiah pei nangmah nih na rak ka chimh bal ko kha. Kal, va lawi, misualpapi. Kan hua tuk, (ayan-mungde) a ka ti. Aze…mang mangkhawng do cio kan si ko cang. Ka leem lengmang zongah duh ti hlah. A thling ka zaat len zongah aa hlei ti lo. 

A ti awk ka theih lo tukah ka capo ka von i chuah. Ka von chim lai ka ti ah “a ṭah aw he a hmur i bo pah in, ai…ka theihciami dah si ko” a ka ti. Phete le Pu Vom tuanbia kan chim lai ka ti ah, ai…nangmah pei Phete cu si ko cu ka ngai zuam fawn lo, a ka ti hoi. Cu ngai cu aw, hong ko ne in kup ko ne ning. Hngephngap ka von kuh cu….ka duale, Kawlram nilin chunlaipi i nungak he i kuhreh cu a nera lo (a fawite lo). Thonginn fate nakin thaw a ip deuh. Ka thlan hi ka thlan hi a ti tuk. Cuti kuh lo ahcun, misualpapi ti cu ka si hoi cu awh. 

Pasal, Laikhal velobang. Ka von reh deuhdeuh. Ka dl nih cun ka u, aa-bua, ka duh ti a si hoi. Amah theih lo hngan cu , aa-bua hlah bua lo hlah ka ti deng. Na mit i chinh ko ne. A cal ah puk..puk..puk. A cal lawng kaa za ti lo ai---cu ngai cu dah. Ka lohma a hung fual thluahmah. A cal in thingluang bang ka hung tolh khut i a hmur cungah kai bat diam. Kan i rek deuhdeuh tikah ka thintur hi ṭhawlazi mawṭaw aw ko a lo. Duk..duk in a tur. Dang carmi bang i haak lengmang in ka cil cu kuakkuak in ka dolh. Ka thawchuah aa su, ka tha a vai. Zaanlei cu siikhan ah i piah ka hau te men lai. Salai Habakkuk Tei Kap lebang nih ka thei sehlaw “Na thi kai le si ko cuh” a ka ti hnga.

Siarem taktak khin ka hun reh ko. Vaate suaisik khi ka lo. Kai lunghmuih tuk nain ka thinphang bantuk, a laumi bantuk, mi hmuh lai a phang bantuk khin kai suaisik, kai sawce. Pasal, atu voikhat cun hun kiss rih ning tiah ka hun reh deuhdeuh. Ka hun kiss cang lai ka ti ah khin…“Tho, um ziar, kan ṭum lai hih” tiah Salai Buan Sang nih a ka hro. Ka lau khawhning. Aze…lohtlau. Ka seihkuzin lawngte. Bus cungah Salai Buan lehlam ceite in ka rak kuhreh. Voi tam-ial ka rak kiss. Ka thinhun maw ti deuh, kai phuhrun dek. 

Asinain, Mawi Mawi, kan uar bak. Kan duh bak fawn. Nangmah nih cun naa theih rua lo. Na zumh lo ahcun ka nulepa zong rak hal te hna. Salai Buan Sang zong tette a um ko khih. Nau, chunmang vawlei ah leng hmanh sihlaw, nangmah he ‘duhnak tili’ chungah ihnim ka cim lo. Ka cim bak lo.

(Note : JMBC Par ah rak pho cangmi lenhloi a si)