Laikhal Mit In “TLANG CHOKHLEI” Cuanhnak

Laikhal Mit In 

              “TLANG CHOKHLEI” Cuanhnak

Salai Joseph KB Thawng

Computer cahmai ah ka ṭhutnak a sau ngai cang. Ka ruang ka hun isamh pah khin “Tlang Chokhlei” lenhloi cauk ka hei banh. A si hoi ko lai cu hih. Anih (U El) caṭial cu a cheuchum relawk a ṭha hoi bal lai lo tu hi, bialo, ka rian ka tlolh hoi. Zinglei sml 2:00am ah ka rel dih. Amah he facebook ah kan ichawn. “Ka cauk na rel dih cang maw, a ṭhatnak he a chiatnak he feedback na ṭial te lai cu” a ka ti. Aw, ka ṭial te ko lai ka ti ve. Pu Zo Bawi nih “Ka piangthar cikcek, a cu bantuk cauk ṭhat cu” a ti phah ve.  

Tuanbia fung nih ka hnarno a ka ṭam

A cu bantuk boruak le thilcang reru cu ti awk in. Maw Pathian te, Lenku hi a pamhmai hringhran ko mu. Cawmkengtu pa bik nih a tlei tuan. Mi ramdang ah Laifa pamhmai lai phan ruangah Nu a si hmanh i philh in Phakanh a phan. Sunghno le a cawn fimnak kaltaak in ‘nunnak chanhchuahtu’ siawk ah a kal. Asinain, puicimh zatlaknak lawngte. Nini ṭapṭap in vantaw a hei muai ve lengmang, ṭahhamang le sivanghnak lianpi he a fiang lo i a mawmi lam cungah mangtara thilrit he. Thing bang a hngohchan mi, a ṭa Ceu le  a dawtmi Bawipi nih chan ṭim hlan ah ciamhser ai hna. 

“Kiaktuan chantawi, Laifa dawt hna

 Khuasak tintuk har vaang ngai i nan tlei cu

 Tluangthuk ral bang kan hlauai ai e

hmuh lo khuachin tluangdang ah.”
  

 Nihin tiang ahohmanh nih theih khawh ti lomi mauhnah caar cungah thisen le mitthli in ṭialmi bia hna…..

Lainu ciammam

Ruahchannak ṭhimtia hmanh a awng ti lomi vampang  a pah ṭualmal ning. Bawipi nunnak vaangah a pardawh zong ‘hnawl’ in a um ning---Lenku caah maw thil har deuh a si, Bawipi caah dah? Kawlpa va hmanh sehlaw a tlau lo. A va, a fale Laiholh an thiamning, Pathian an duhning. Hi thil ka hmuh tikah “Miphundang vaat le ṭhit timi hi cheukhat caah cun tlaunak a si lai nain Lai nusal taktak, Lai pasal taktak caah cun tlaunak an rak si lo.” Miphun cawisan le karhzaiter, cun mission rianṭuan phunkhat zong a rak si. Miphundang vaat le ṭhit nakin cu pa/nu nunphung le sining nih a kan dolhtu hi tlaunak an rak si deuh. Tuarza temza le mitthliza he ihnuuk lengmang le i dapphiak lengmang buin chungkhar nuam a serkhawh mi nih Lainu caah fim tampi a kan chimh lai ka zumh.  

Kan sining a langhter

Kum 1990 in 2000 kuapkap thilcang a si nain, nihin vawlei khuaza ah a phanmi Laimi kan sining tampi a langhter. Mizo ram vok tholh in ṭio tilian ruang i paam. Khuate vaangnau in mi inntang ah innhlang in sianginn kai. Khuachuahmual liam in mi ramdang ah an paamnak tibantuk. Kha lio Phakanh ram riithainak sii bantuk khan nihin Laimi hi zei sii dah kan riit? Miphundang nunning le sining nih kan nun hi dawp bang a kan dolh sual maw?

Cauk ṭhabik a si ka ti

“Tlang Chokhlei” hi ‘book of the year’ asiloah ‘the best seller’ a si hrimhrim lai. Avoi 1nak ahkhan uk 2000 in nam a si i thlakhat chungah zuar dih a si. Avoi 2nak zong uk 500 in nam ṭhan a si. A voi 3nak hi uk zeizat a nam ka thei lo.  Caṭialtu hrim hi “A mui in zoh hlah, a  aan in ngai” timi Lai phungthluk a tlinhtu bak si kaw a thiam hrimhrim ko☺. Pu Hrang Nawl bantukin tutan a cauk ahhin bia ah a rum, a catlang sermi le a bialak tete rel tikah hi lenhloi hi ahmaan taktakmi alo, a thiam tuk. Aphaw suaitu Vapual zong a kutzung  a mil khun. A chiatnak lei mit in chim awk le soisel awk ka hmu lo, a ṭha tuk ka ti.

“Maw…Tlang Chokhlei, na hramthlaknak vawlei phong in ‘theilo par’ ti'n mi ceihphai tong ko hmanh law, Lairam thuamhtu parṭha bor na si. Kan ram har in vahvaih chan sihmanhsehlaw, a hmunhma hual loin na iang chuah law na pardawh eenter caam cin ko sawh.”  

(Note : Deirel Cazual ah rak ṭial cangmi a si)