Ṭhinṭhang Phu Hnianghrawmnak

Ṭhinṭhang Phu Hnianghrawmnak

(Picnic)

 

Dir : U Peng Kulh, U Hrang Uk, Miss Hlawn Sung, Pu Zo Bawi, Richard Zatu, Miss Sui Cer Men, Pu Lian Mang, Salai Siangawr Vanhnin, Pu Sa Minn (Ṭhu : Salai Joseph KB Thawng, Salai Ceu Bik Thawng, Pu Hrang Tawng, Nelson Van Lian Cung, Sang Bik, Pu Ṭial Hnin (Henry Nawl Thang Bik camera man)

Salai Joseph KB Thawng

Ṭhinṭhang Phu nih khumkhat voikhat in ‘hnianghrawmnak’ (picnic) kan tuah tawn. Tukum zong 30/11/2013 (On Saturday) ah khan Kandawgyi pangpardum ah kan tuah. Minung 16 kan si. Abik in hlasakthiam, Miss Hlawn Sung le Miss Sui Cer Men nih an kan telpi khawh caah kan  hlawp a tlo khun. Pu Stephen Ni Kio, Pu Lian Iap, Pu Win Sin le Pu Zung Mang, Pu HC. Than Bik Lian belte tlamtlin lonak ruangah an kan telpi kho lo.

         

Zinglei sml 10:00am ah zapi cu kan phan. Pu Ṭial Hnin nih kheset (Cassette) aa ken i hawi hngah pah ah zingpakhua cun Lai zuunhla kan ngai — turbung khin. 

         

Hini ahhin cun “kan tlangval dih” ti usihlaw  patung cheukhat cu an darling pawl nih “Ṭhinṭhang Phu” in an dinhter phah men hna hnga☺. Asinain, alaih a thei bakmi “Ṭhinṭhang Phu” nupile hna nan cungah lawmhnak bia kan chim cawklo☺☺☺.

             

“Ṭhinṭhang Phu” hi zeihme nan va tuah ve baak, nan kan ti men hnga. Laica le  Laiholh, kilvennak lawng siloin “Kan nunphung, kan bia le kan hla” kilvennak zong hi kan rian a si chih, kan hei iruah ve ko. Lai zuunhla tampi kan sa. Amah belte, hla caangkhat le a nolhnak (chorus) hmanh, Pu Sa Minn dahlo, a thiam dihmi kan um lo. Hi ruang bikah hlasakthiam kan sawm tawn hna nak aruang a si. Hlacaang an kan auh i hlawptlo ngai in hla kan sa hna. 

Laihla, zuunhla le ramhla kan sakmi a tam. Fung 30 leng kan sak lai dah. Acaan ahcun Pu Sa Minn hi hlathiam bik sikaw a hun ithawh, a hun kan auh tawn. Auh chom khin cun, Khrihfa hlabu sak hmanh a thiam lomi, kan President, kan Chief Editor le kan secretary zong an hmur a caang len ve☺. Lairam dawtu Biak Ceu phuahmi “Ṭhal khuapau meithangzaam nih fing le tlang a cuul dih cang…” ti hrawng kan hun sak ahcun December thla hi March thla ah kan hun canter ruangmang ko.

“Kan chuahnak kan Laitlang ramdawh, parṭha lenmin thawng dailo” tbt. “Khuaza kan Lairamkulh chung, ramzung ceunak, zuam u, leng le vaalrual hna” tbt. le “Laipa caah Lainu, Lainu caah Laipa” ti hrawng kan sak ko ahhin kan tui. 

Miphung dawtnak thinlung zong kan hun ngei khun rua ka ti. Pu Zung Mang lebang itel sehlaw ‘thlarau a tla’ a ti phah hnga☺. Chun lailing ahcun, lunglen phun in kan ila viar.

Kan hlasakthiam hna nih caan karlak ah i chaang in an hun kan sakpiak lengmang.    Pu Hrang Tawng lebang ai tuar ti lo le a zaal chungin “a Sairaang” (thongnga+thonghra) bak a hun kan tengh hnawh. Zapi cu kan cau ko---naamtong rawh bang kan ar ko, kan ti lawlaw ko la hih. Nungak meet zong cu a hun tong deuh hmeteh☺.

                        

Kan hlasakthiam Hlawnhlawn le Suisui zong nih tlumtla tein an kan oihsaih (phiophi). Cheukhat nih cun, “Ziah anmah IMCP hlasakthiam lawng hi an sawm tawn hna hnga” an kan ti men lai. Annih IMCP hi hlasak an thiam, an lungput a ṭha. An sayate zong nih an kan dawt. Cun, a sawm, a don le a thlah lei ah kan President he lamnaih an si fawn tikah acaangkaang ngaite.

      

Tutan ahhin Bibik (Sang Bik) nih tampi a hun kan tuammawi. Nungak zitmuai le tluanhtlamh zong a thiam. Tlangval cu tlangval cingcing kan rak si deuh ziar☺. Kan mar a zaangdeuh kan ti ko lai ta.    

                

Acaan ahcun kan hung tho i dir buin hla kan sa. Kan lam, kan kut kan beng. Ramhla le zuunhla sak ko ah pei kutbengh a rak nuamh hi ti awk khin, kan ma siang lo.

“Ti bang kan semnak, ai khat lo, nang cu phunsang fanu na si. Zeicaah hen cung Pathian nih santlailo vaal co dingin an sem lo. Ka dai lai lo, dai naisai hlah. Phunsang fanu he roling lo cun, rua bang a tuai ṭhan ding cu silaw, sungkhun in kan caan kan hman ṭhan hnga…” Hi hla kan hun sak cu…….a maak te ai ma kho ti lo.  A nolhnak zawn... “ka dai lai lo, dai naisai hlah” ti tu hi cu awtereng chuak, thang meisei in kan hun iṭhuan len hna. Nolhcip khin kan hun sak hmeteh. Kan inuam lawlaw khi si.

      

Kan inuamh cingling zaanlei sml 3:00pm hrawng khin ruahhmai siamsiam in a tla. Elaw...bialo. Chuncaw dau ko ne usih kan ti. Cuticun, siarem lo ngai bu le dirbu, ruahsurh pah bu cun kan baar luamlaam hna. Lawi kan hau cang. Aa ngaih cemmi U Peng Kulh, Salai Ceu Bik Thawng, Pu Lian Mang, U Hrang Uk, Nelson Van Lian Cung le Henry Thang belte an rock manh lo☺. Siaherh ngai buin Pu Sa Minn motor ah kan cuang—kan ṭin cio hna.

             

Ngandamnaklei siibawite nih an chim lengmangmi cu “Damnak vialte lakah thinlung ngandam” hi a biapibik an ti ṭheo. Cu thinlung ngandamnak caah cun, nih le khehnak le zalongte in tlonlen khawhnak zong nih thinlung a rak nuamhter tuk tikah ngandamnak siiṭha taktak a si.

            

Tutan kan picnic zongah upa pipi zong an inuam tuk. An nunkhua a sau deuh hrimhrim lai. Caan peek khawh lebang ah atuletu tuahding pei a rak si hi ka ti. A ra laimi November or December (2014) thla zongah kan tuah ṭhan lai. Atu tehin a huammi paoh sawm cia nan si. 

(Note : Ṭhinṭhang Mekazin ah rak ṭial cangmi a si)