Nicholas Dawt Kam Sang

Nicholas Dawt Kam Sang 

he biaruahnak

Eai-met-sone-yar (Where Dream Meet-Season-9) hlasak zuamnak ah pahnihnak laksawng na kan hmuhpiak caah kan ilawm tuk.

Nan ka lomhpi caah kaa lawm tuk ve.

Laksawng cotu na si thawng na theihka na feeling?

Pahnihnak laksawng ka co tikah kaa lawm ko nain tha a ka petu ka hawile caah ka lung a nuam lo ngai.

1^st prize ka hmuh lai tiah naa ruahchan maw?

A hmaante chim ahcun kaa ruah pah ko.  Aruang cu, tutan Season 9 ah hin phunglam an thlen i Grand Final i top 3 asimi lawng nih hla fungkhat cio sak ṭhan in mah chungah pakhatnak an thim ṭhan caah mah top 3 i kan sakmi a ṭhat lo ahcun first kan hmuh khawh lai lo ruangah asi.

Thapetu mi tampi nih 1st coding ah kan in ruah. Zeiruangah dah na co loning? Curuang kharuang ah ka co lo, tiah siarem tein phuan le chim na duhmi a um maw?

Thapetu vialte cungah kaa lawm tuk hringhran, tiah chim hmaisaka duh. Kan mark total ahhin keimah hi 521.4 in a tambik ka si ko. Asinain ka chimcia bang top 3 i kan sakmi ahkhan first a hmu mi nih 1.6 in a ka tei ruangah asi.

Mark petu (judge) nih Laimi na si ruangah an in namnet deuh bia asi maw, a ruang?

Laimi ka si ruangah namnet cu asi lai ka zum lem lo. Aruang cu, nawlngeitu, biakhiaktu asiloah ṭuanvo ngeitu ah kanamh Laimi     hlasakthiam Sung Tin Par zong aa tel ve ko.

Mah zuamnak na luh lai ah le naa zuam cuahmah lioah zei bantuk timhtuahnak dah na ngeih?

Mah zuamnak ka luh lai ahhin timhtuahnak hi cu a tam ka ngei lem lo. Nain kei hi hla lakah Mirang hla hi ka ngai deuh i mah caah cun Kawl hla pawl hi ka ngai tuk bal lo. Cucaah Kawl hla siseh, cawlcanghnaklei (performance) hi  biatak tein kaa timtuah.

Hi zuamnak ahhin mark petu pawl nih zeidah biapi bik in an zoh? Vocal maw a biapi deuh, performance?

Hi zuamnak hi hla zuamnak ti asinain mark petu pawl nih an zohmi cu vocal lawng si loin performance he a pa 2 in an zohṭi ko. Aruang cu, score a kal dan hrim ah hin vocal score le performance score tiin a kal. Vocal lawng tampi hmuh i performance i tlawmte hmuh ahcun total score a tlawm ṭhiamṭhiam.

Hlasakthiam pakhat sinak dingah zeidah a biapi bik?

Hlasakthiam pakhat sinak ding ahcun awṭhat a hau tiah ka ruah. Cun, a sak dan, ningcang thiam a hau, tiah ka ruah.

Hi hlasaknaklei hi na pawcawmnak (professional) ca tiang in sak le pehzulh naa tim maw?

Si. Professional ca tiang in sak le pehzulh kaa tim ko.  

Pumpak in album chuah tah naa tim el maw?

Album (Kawl hla in) chuah cu kaa tim ko. Nain a rau pah rih lai. A kar lakah Group Album tete cu kan chuah ding an um. Cun, Lai hlaphel chuahding tete zong an um.

Hla lakah zeibantuk hla phun dah na uar?

Hla lak i ka uarbik mi hla phun cu Jazz, RnB, Blues le Country hla pawl hi asi.

Aw in sakmi hla le thinlung in sakmi hla a um, tiin na ruat maw, cucu zei hna dah an si?

Si, hlasak kan izuam lioah judge pawl nih an kan ti tawnmi cu, “Na sakmi cu a ṭha dih nain na mood a bau,” an kan ti tawn. Chim duhmi cu thinlung in sakmi hla hi cu a ngaitu lungthin ah a lut colh. Nain aw in sak sawhsawh mi cu a ngaitu thinlung chung a luh hmanh ah  sau a nguh lo tiah ka ruah.

 Hlasakthiam lakah na uar bik mi, Lai 3, Kawl 3 le Mirang 3 in.

Hla lei he pehtlai in ka uar bik mi pawl cu an tam ngai. Laimi ahcun Saya Herh Lian, Sung Tin Par le Esther Van Hnem Sung. Cun, Kawl ahcun Zaw Paing, San Pi le Si Thu Lwin. Cun, Mirang ahcun Bruno Mars, Jason Mraz le Hunter Hayes.

Hlasaknak in siseh, cawnnak in siseh a dangdang ah minṭhatnak laksawng na hmuhmi a um maw?

Hlasaknak in Kaung Hein company nih tuahmi Guitar Ta Ga Lay tiin Mirang hlasak zuamhnak ah first ka hmuh. Cun, hlanlio hlasak minthang Bo Bo Han a hla pawl zuamnak zongah The Best Of Bo Bo Han (First) ka rak hmuh.

Khah, nungak pawl an ingang kho ti lai lo, theih zokzok an duhmi an biacah kan hal lai. Atu hi girlfriend a ngeih cangle canglo fiang pup in kan chim seh, an ti ṭung

Ummm...no girlfriend. Ka lawng sup

Careltu, a bikin mino le hlasakthiam, hlasak a zuammi hna sinah biacah na duhmi a um ahcun...

Hlasak lawng si loin zei dangdang zong    nanmah nih tuah nan duh taktak mi le nan huam taktakmi asi i nanmah nan caah a ṭha lai ti nan ruahmi paoh cu tuah khawh i zuam ko u, tiah cah kan duh hna. Nan i zuamnak cung tu ah Pathian i bochan ulaw thluachuah le teinak an pek ko hna lai.

Lungsau in bia na kan ruah caah kan ilawm.

Keizong kaa lawm tuk ve.