Salai Andrew Bawi Sang Lian he biaruahnak

Laimi ngeihchun, Licensed Aircraft Engineer a simi,

Salai Andrew Bawi Sang Lian 

he biaruahnak

Min              : Andrew Bawi Sang Lian

Nu le pa         : Pi Ca Zing le Pu Za Mang

Khua             : Lawngtlang

Umnak           : Yangon

Chuah nithla     : 24-4-1986

Zuammi          : Hlangaih, hlaphan, hlasak le carel

Tinhmi           : To Become A Qualified Licensed Aircraft Engineer

Tlaihtleng      : Keep Your Eyes Fixed on Jesus and Try to  Be A Valuable Person (Jesuh kha fek tein zoh law man a ngeimi minung si izuam zungzal)

E-mail            : andrew.salai@googlemail.com

Facebook          : Salai Andrew  

Tel               : 0943051088

A hmaisabik ah na sianginn kainak le na riantlaihmi a tlangpi in na hun kan chim law…

             Taangcheu in taanghra tiang BEHS (1) Hakha (2003-2008), Myanmar Aerospace Engineering University (Meikthilar) sianghleirun a kai i 2008 ah B.E (Aero-E.I) in sianginnaa lim. Myanmar Airways International Co. Ltd i Engineering & Maintenance Department ah  Aircraft   Senior Mechanic rank in ka ṭuan. Sianghleirun na kai lio ah No.1 peng na si ti thawng kan theih, minṭhatnak laksawng na hmuhmi a um maw? 

        Sianghleirun hi kumnga ka rak kai i Pathian dawtnak thawngin kumlinak le final year ah All Distinctions in outstanding ka rak hmuh i Minister of Ministry of Science & Technology nih minṭhatnak certificate, Golden Medal le phaisa sing khat an rak ka pek bal. 

Laimi lakah atu na riantuanmi hi a tuan hmaisabik na si lai tiah kan ruah—kan in lawmhpi. Hi rian hi zeitin dah na tuan khawhning asi?

        Keimah rian ka rak luh hlan thlaruk ah Mizo lei ka hawipa pakhat hi a rak lut hmaisa. Atu kan rian an rak auh (call) lioah newspaper le journal in thawng an rak zamh i minung 300 leng nih interview dot li (4 Steps: Written & Oral exam of English / Computer/ Psycho/  Aircraft Knowledge) kan phit hnu ah minung 11 an rak kan thim i Pathian dawtnak in ka rak itel ve.  

Nangmah zuammi maw asi asiloah na sinnak nih a phanh caah dah asi.

       Keimah zuam bakmi asi hlei ah Pathian dawtnak le ka rak izuamnak thawngin asi tiah ka ruah. 

Atu na rianṭuannak ah zei position (rank) in dah na um i na tangah minung pa zeizat dah an um?  

                Atu ka rianṭuannak ah hin Senior Mechanic rank in ka um i ka tangah Mechanic/ Maintenance Assistant & Volunteer tiah minung 45 hrawng an um. 

Cun, Aircraft Mechanic rian le Licensed Aircraft Engineer rian hi zeidah aa dannak?

Licensed Aircraft Engineering (LAE) si ding ah Engineering lei degree pakhat hmuh hnu ah Aircraft Mechanic dirhmun in a tlawmbik vanlawng he kum 3 ipehtlaih a hau i kumthum hnu ah International Civil Aviation Organization (ICAO) kuttang ah a ummi Department of Civil Aviation (DCA) nih question chuahmi licensed camipuai awn dih a hau. LAE si hnu ahcun thlahlawh zong a sang deuh tuk i vanlawng zong release tuahnak nawlngeih asi.

Zeibantuk khi dah na ṭuanbikmi asi?

Kan rian hi vanlawng conghhramh le sersiam (aircraft maintenance engineering) asi. Vanlawng rian hi minung nunnak he aa pehtlaimi asi tikah mah lung duh le thiamnak ibochan in zeihmanh tuahnak nawl kan ngei lo, kan tlaihmi vanlawng an sernak Manufacture nih Aircraft Maintenance Manual (AMM) le a dang manual pawl an chuah i zeituah    laipaoh ah mah manual pawl rel hnu ah rules & regulation he aa tlakning lawngin ṭuan asi.

MAI ah hin zeibantuk vanlawng dah nan hman i pa zeizat dah nan ngeih. Cun, khoika khua pawl ah dah an zuan?

  

 MAI nih Airbus A 320 panga le A 319 pali a ngeih. Bangkok, Singapore, Malaysia, Indonesia, India, Vietnam ram ah zarhkhat chung ah Flight 30 leng a zuang peng. Cun a caan ah Japan le Korea lei ah charter flight in a zuang tawn.

Vanlawngmawng (Pilot) lei he tah nan ipehtlai maw?

          Vanlawngmawng he kan ipehtlai hrim lo. Kan rian hi vanlawng sersiam le conghramh,  engineer riantu asi. A fawinak in chim ahcun vanlawng vancung a zuan lai ah Licensed   Aircraft Engineer nih Certificate of Release to Service (CRS) signature a thut hnu lawng ah pilot nih vanlawng a zuanter khawh.  

Vanlawng technology hi a sangtuk na ti maw, kannih Laimi nih phanh khawh phun in na hmu maw? 

         A rak sang ngai ko. Atu kannih kan ṭuanmi hi Aircraft Maintenance Engineering lei asi i theihding, hngalhding le cawnding hi an tam tuk.

Production lei hrim hi cu a va sang deuh hrim lai dah. Laimi hi vawleicung ah kan cawn lomi field a um tuk ti rua lo tiah ka ruah, vanlawng technology zong hi Laimi caah a har hlei hrim lai lo ka ti.

Khuazei hna ah dah khual nan tlawnbik?

          Flying Engineer (FE) dirhmun in, India, Malaysia, Singapore, China, Thailand, Cambodia, Vietnam, Korea le Japan ram hna ahhin zarhkhat nithum cu kan tlawng lengmang. 

 Elaw...khah, a biapi tukmi ka philh deng hih, nungak pawl nih pello tein an ka cahmi, hnakruh naa hmuh cang maw? Cun, nu ah zeibantuk nu dah na uar phun le uar lo phun an si? 

Lungthiang tein chim ko ahcun kaa hmuh kho rih lo. Anmah nih a ka hmuh rih lo zong asi kho men☺. Nu ah hin a bikin a thinlung put a ṭha i a lung a thiangmi hi ka uar hna. Pathian pekmi mah siningte ah i lunghmuih loin mi a tahchunh tukmi le minek a hmangmi nu hi ka uar lo ngai hna.  

Lai mino hna sinah biacah na duhmi a um maw?

            Ṭhanchonak timi hi kan ngeihmi caan hna kha fimthiamnak ngunphar hna he pehzulh tein thlen hi asi rua tiah ka ruah. Kan caan a man deuh paoh ah nunnak caah a fekmi hmunhma ṭha kan sersiam khawh kha asi ko. Zabu 21 chung, kan zaang a ṭhawn lioah a fekmi dirhmun phaknak ding ah kan caan sunglawi hi zeitindah kan hman lai ti kha biatak tein ruat hna usih.

Chanthar Lai mino kan dirhmun na hmuhning? 

      Chanthar Lai mino kan dirhmun ah ka uar bikmi cu thil hrukaih kan thiam, Laiholh a ṭanhmi kan tam, Biakinn kan panh rih i field phunkip ah fimthiamnak phun tampi a cawng khomi kan tam. Sihmanhsehlaw cawnmi fimthiamnak hmang kho takding tiang in aa ready mi hi kan tlawmtuk rih i riansok tik zong ah rian nih a herhmi requirements a tlinh khomi mino hi kan tlawmtuk rih rua tiah ka ruah.

Careltu sin biacah na duhmi?

        Lairam le Lai miphun kan ṭhanchonak tahfung hi fimthiamnak cawn, hngalh, theih le hman ṭhan hi asibik rua tiah ka ruah. Careltu dihlak nihmiphun dawtnak he kan phaknak hmunkip ah fimthiamnak cawn hi biatak tein thapek izuam cio hna usih. 

Update interview

Atu hi zei dirhmun dah na phanh cang cu?

Atu hi cu Department of Civil Aviation, Myanmar nih an tuah mi Aircraft Maintenance Engineer License campuai ka phi i 2014 June ah ka lim! Pathian lamhruainak thawngin voikhat hmanh sung loin ka awng.

Interview ka rak in tuah lio dirhmun le atu na dirhmun?

Atu hi Sr. Mechanic si ti loin Licensed Aircraft Engineer ti ka si cang.

Na rank le na rian zeibik dah a si?

Vawleicung civil vanlawng vialte an zuan lai ah Licensed Aircraft Engineer (LAE) nih Certificate of Release to Service (CRS) signature a thut hnu lawng ah pilot nih vanlawng a zuanter khawh! Cun vanlawng an rawh ah siseh him tein vancung a zuan khawh nakhnga proactive maintenance vialte hi Licensed a tlaihmi LAE nih approved a tuah hnu lawngah vanlawng zuanter khawh an si.

Hal phung a si lo nain in hal ko ning. Atu hi na thlahlawh (salary) zeizatdah a si cu?

"Mah kong hi kaa laklawh ngai, kan chim ngam deuh lo" a ka ti. Asinain, USD 2,000 cu hmuh dawh a si---Laikhal. 

&&&&