Faiceu Journal Editor Nupi A Ṭhi

-----------------------------------------------------------------------------------------------------------------------------------------------------------
“Dawtnak  in  pumhnih  cu  pumkhat  ah  ser  a si i, a theipar  tu cu  pum tampi  le nge tampi a si awk a si.”   
--------------------------------------------------------------------------------------------------------------------

Faiceu Journal Editor Nupi A Ṭhi

(Editor kuttlaihnak caah)

              

Ka lau khawh ning, kei ṭheo. A viau (viao) cu ka viau  hraw lo dahawh, a raak zong ka raak lem lo.  Zeiruang ah? Zei sullam ah? Ka thei huaha ve lo. Nain thil pakhat cu a fiang. Cucu zei? “Faiceu Editor nupi a ṭhi lai” ti thawng---cu zong cu  ka far, Lovely Nancy nih a ka chimh hmeteh.

            

Miphung sakeel cun, ‘mui bihnak’(facebook) cu ka hei kau luklak ve ta. A re, ka zum hnga maw? A si taktak hnga maw? Ai capo caah a si hnga maw? Asiloah a saikuzin (dream) hna a si hnga maw? Ka lunghrin buin hmanthlak pakhat hnu pakhat ka bih, ka ngia. Sidawh a si ko. A darling (Rachel Sung Hlei Ṭial)  he Laithuam a senmi  in an ithlakmi 4to rumro, a tam dom. A ce, like a tam ngaite. Comment zong a ṭhahnem dom tu kha, voice (vote) an rak ngei ngai hi ta ka hei ti. Amah belte, an 4to ka bih i Faiceu Editor mithmai, style ka zoh tikah lau sehlaw ka dawhter. A thlingzami hna a lo thulh. Ciimkaam nawn khin a kuh. A thintur tu cu lamnaih ah a ummi nih vun tawng te uh☺. Nain, a mawh lo ka hei ti. Lucky draw in TV poh cu a nera lo (a dintuai lo). Asinain, lunghrinnak in ka khat. Keimah le keimah kai al, kai zumh lo.

      

Zeiruang ahdah kaa zumh khawh set lo, ka lung a hrin? Aphi a fawite nain a thei lomi caah cun taangcheu cheupi camipuai nakin har deuh dawh a si.  Aruang cu “ramvai pangma” zaang an fak kan ti lai. An thabat nih dangkhat, an nihlawh dih  nih dangkhat kan ti lai cu mu. ‘Ramvai pangma’ timi cu nan thei maw, zingzaan in meithal aa tlaih ve nain a kap bal lomi pawl khi ti bia. Faiceu Editor zong cu a kap ve bal lo cu mu, ipheh awk um maw. “A kah ko” a timi nih nan kut thlir u, a thlirtu um dawh nan si lo (a kah le kahlo lam tu cu a darling nih theih bik dawh a si☺).

         

Laiholh ah “Bahngio” timi a um. Cucu, varit a hlipi (a pa) tinak a si. Phundang cun ‘tonglo’ tinak a si hnga, chiarkhuan kan ti lawlaw lai. A aw a ṭha ngaimi, kan chiarkhuan pawl, zingka thawh a kan ṭhangtu kan khongpi ka timi pawl (Salai Vei tepawl) an tong, kua ah an lut. Ka lau ngai nain ka hna a hung ngam hmeteh. Zei ruangah, kan lohma hnarcheu kan lim cang ruangah a si ko.

Fuurpi a tla cang i caangvat le ruahpi lakah cun kan tuhmui tuk thawng a din cang cu mu. Khuadawm a chah, ṭhungṭheng in khua a hung tur. Thlaam ah zaamding kan bawh. Kan lohma nih le kan sia a herh. Asinain, plastic a um ahcun ruahpi zong kan hei kian (hrial) hlei lo, kan thlawh chih ko. Plastic a ngei lomi (aa ken lomi) cu zaam ko lo ahcun ciap thlerh in a kan den tawn. Faiceu Editor cu plastic ai damh cang ne, a cin in a ciar ti lai lo tinak☺. Khuasik (busik) a tlak hlan ah blanket aa cawk ti usihlaw nan lung a tling maw, tling ti ko u.

            

Faiceu Editor a tonlonak kong lawngte ka von phuan. ‘Darh pheh chia paam pheh chia’ anti caah ka hei phuan ko. Amah belte, a darling (Sungku) tu cu na hmai kan khap lo ngai. Zeiruang ah? “Mah tluk aa za vemi” na ti saling ah ka von phomh thlerh ruangah a si. A ngaite ti ahcun, na cungah pumpak in kai lawm hringhran. Nangmah bantuk khua a ruat khomi le tlawm a ngaimi ko hi dawh  na ṭaṭa tepawl nih an rak herh tuk cu!☺.

       

Sungku, na ṭaṭa nih hin an dawt bak lai ka zumh. An dawt awk zong a si rengreng. Chim lawlaw ko ahcun Vanmi (Angel) hmuh in dawh an hmuh ko lai cuh, ka theih tuk, ka by-heart bakmi a si☺. Tehte  pakhat in ka langhter lai mu. Kei cu ka hei tong cuh, darling ka ngei hei ti koning☺.  Na ṭaṭa cu a tong rih rua lo. Cu lioah online in kan rak i chat hme teh. Ka dl kong cu tloksabur khin kan i ruah. “Rak daw, a zawn ruat, nungak dang meet hmang hlah, ṭhate in kom, a duhnak zulh thiam izuam, thazaang peek a herh ahcun pe” a ka ti bal. Phundang cun, nungak dang ngeihtaak hlah, daw a ka ti kan ti lai cu. Asullam cu, na ṭaṭa hi dawt, zawnruah, hnakkartenh, conglawmh, tuammawi thiam ngai dawh a si ko. An dawt bak ko lai, ka hna a ngam ngaite.

       

Khah, lunghrin zongah a fiang ko cang rua. Ai kuangkuah huaha lomi chim ka duh. Yangon ah Faiceu mui a de ti lo, a tlau. Phundang cu a rim a nam kho ti lo. Nu le pa nih hmuh/rel cu an duh ngai rih, an kan hal lengmang. Asinain, kan zuar kho ti lo. A ruang cu buai dangah kan buai ve. Nancy Zatu, Lovely Nancy, Mai Bawi Ṭha le keizong Editor fate kan tlai cio hna. Cu ruang bikah a si men lai. Nancy Zatu lebang cu naite (27 May 2013) ahkhan ‘life security’ aa hmuh cang, a merem ve cang hei ti sih. A taangmi kannih pawl zong hi damhkhan zau kan hau ve cang tinak a si. Ahmaan ning te chim ahcun kan ral a hung ṭha deuh suaumau cio kan ti ko lai ta☺. Tuni (ca ka ṭial lio) hi Father’s Day a si. Hmaikum lei cun FC Editor zong “Father’s Day” tuahpiak a hau ve cang lai. Atu lawlawse hi cu telai pa, dengmang pa ti vial in seh kan kawh rih.  

 

Atu ahcun Pathian nih fanu sung, Florence Van Hlawn Cer a peek hna

Biabeuh

 “Pa” nih ‘bawmtu’ (life partner) kan herh bantukin “Nu” zong nih ‘nunnak humhaaktu’ (life security) kan herh ve. Cucu Pathian nih a rak kan duhpiakmi zong a rak si. Tefa tampi ngeih a kan fial, punzaam le karhcho ding zong a kan timh. A zuh (minus) lawngte hin vawlei hi mawngh sisehlaw zeidah a taang hnga, a tlau dih lai. A fonh (plus) lawngte in sisehlaw teh, aa fonhnuul (fonh dih, tlai dih) hnga i anak le araang hmanh kan ṭhenhai thiam fawn hnga lo. Asullam cu, Nu le Va (chungkhar) khuasaknak caah plus lawngte le minus lawngte hi a si thiam lo kan ti lai. Asinain, “Pakhat nakin pahnih cu a ṭha deuh, a ṭhawng deuh, a fekfuan deuh.”

“Dawtnak in pumhnih cu pumkhat ah ser a si i, a

theipar tu cu pum tampi le nge tampi a si awk a si.”  Thingkung pakhat nih thei a tlaimi ah a thur a um ko lai, a thumi (a tlolmi) zong a um ko lai i, a hel tukmi le a bawkbaro zong a um ko lai. Asinain, a tlaitu (a tlainak kung) thingkung cu pakhat (kungkhat) a si awk a si ko, a fiang.

“Dawtnak he cun, anthur tihaang hi a thlum lai lo nain kan i hne kho. Kan zaanriah beel zong a neu (a hme) ko lai nain kan paw a khim ko.”

Asullam cu “Dawtnak” cu theihthiamnak hram a si, zawnruahnak le i hnek khawhnak a si. Cu i a theipar cu thlum lo awk a ṭha lo. Athlum komi rumro  akha a timi an um ahcun “dawtnak taktak” nih an nunnak muru chungah hmunhma a laak lo caah a si, a fiang ko. Phundang in kan chim ahcun “pakhat nih a santlaihlonak le a tlamtlinlonak kha anak rumro si loin araang zong in hmuhpiak thiam le theihpiak thiam hi a biapi hringhrang kan ti lai.”

Vanvan le Sungku zong Pathian nih thlua in chuah hna sehlaw  tartlung (chan tling in) tiang aa dawmi le thlua a chuakmi, thei tampi a tlaimi  nu le va ah samhri in sih hram hna seh, tiah thlaza kaan caampiak ve hna.

                                    

Lunglawmhpinak he a langin nan kut kaan tlaih hna.

Salai Joseph KB Thawng

Yangon

 (Note : Faiceu Journal ah rak ṭial bal cangmi kuttlaihnak cabia a si)