Ramdang Nun In Lai Khuate Ka Cuan

 Ramdang Nun In Lai Khuate Ka Cuan

 credit: fasual

Salai Joseph KB Thawng

Kai hngilh khawh lo caah ka mitthlam le ka khuaruahnak a kenkip ah a zuang vuaimai. Ka mitthlam cu rang taktak in Lairam lei ah ka hun mawngh. Ruahlopi in Lai khuate pakhat ah ka vung phan duk. 

Aw, ka pitar kha zaanlei fatin meifar a ceek rih ko hnga maw? Hawi khua ahcun mini-hydro electric ceupum in an vaang. Solar hna an caw i an ining lai mu. Kannih khua le ka chungkhar te kha. Ṭing fitfet tekhin meifar khu nih a hei khut rih ko hna hnga maw. Zaanriah ei pah ah ka nu a hei i manh lai loning. Meifar kemh pah, buhbel tlaih pah, tihang bel le thirhrum (ukaang) tiang in. Mui padap pah si kaw an kut le an kaa aa daw kho ngang hnga maw cu. Anthur hang cu maw thlum ngang cun an din rih ko hnga. Um, hika le khika nun cuai ka thlai…

An ṭuan lopil nih tah kum a chuahpi hna hnga maw. Kum canceo ah puur nih a nam hoi hna hnga maw. Zuu bang tokok in raichia le ṭochia nih a den ko rih hna dah. Thlakhat ah voikhat tetal sahrawm an that kho ve hnga maw, sahrawm sa man cu tah zeican ko dah an bat. Khuapini, ṭhatni chiatni ah an itlumtla ve hnga maw. Hnipuan fenhaih ah tah hoizoh an hngar tuk hnga maw. Asiloah duktla loin an hei ṭeifiak ko rih dah. 

Ka tikhawh mual in ka naupa motorcycle ka cawkpiak mi nih tah ṭhathnemnak a chuahpi hnga maw. Caan dih le phaisa heunak men hna a si sual maw. Asiloah, ikhawndennak le a nunnak tiang a liamtertu thil hna a si sual hnga maw. Asiloah, i uanthlarnak men hna ah a hmang sual hnga maw.

Ka nu le pa nih tah zeitluk indah an hei ka bochan ve hnga. Ramṭha ah a phan ai tiin phaisa a tomtom in a hmu lai tiah an hei ka ruahchan hnga maw. Asiloah phaisa kuat cu chimlo, phone hmanh a kan chawn duh lo, tiah an hei ka uhṭanh hnga dah. Ramdang a kalnak leiba hmanh a cham bal lo. Kan fanu/pa a vaivuan ko cang lo hle, tiin dah an lung ka dongh hnga. A ruam ah ramdang ahhin zeiset ka ṭuan hi tah an fiang ve hnga maw. Hawi cu thlahlawh tampi a hmu an tampi ve ko. Zapi kan ca ko ahcun kan rilcat peh khawhnak fangfang. 

Zeiruang ko ah hen………

[(Kawlram +Ralkap +Meithal (-Democracy / -0 Federal State)]

Zeikhom si ai kun. Pasal nusal pei kan si. Kanmah le kan ti khawh mual in kan izuam lai. Lairam caah Laimi kan si a hau ve. “A tlu cuahmah mi vampang sak khawhnak caah lungtekep pakhat tluk kan si ve”---Rev. Dr. Sang Awr. Ramrian ṭuantu lawng rinh caan a si ti lo. Zei bantuk rian kan va tlaih khom ah kan thinlung le kan thazaang ngeihchun te hi kan khua kan ram le kan miphun caah sullam a ngei ve, ti lungput ngeih kan hau cang. 

Keiṭial fa bang tlangza a cuul

Ngunkung silo vaang silo

Iap in hram pennak vaang ah

Ni Cuan cu e Lairam ka cuan

(Note: Aho hnuarsuannak a si lo, keimah cuanh in ka cuanh bia )