Chanthar Fashion Le Laimi

Chanthar  Fashion Le  Laimi

Salai Joseph KB Thawng

          

Dawh le siṭal (style) hi aa dang an ti tawn.  Phundang cun dawhnak timi hi “Mui le sam (natural beauty) bak in aa dawhmi an um bantukin, hruk le aih, thuam le thil, ṭamhmoihnak  (fashion, dressing and made-up) nih a ṭamh i  aa siṭal tukmi an um ve. Cun, “Dawhnak timi cu a zohtu nu/pa mit chungah a um” an ti tawn. Amah belte, kan zoh cionak tahfung asiloah mit tu cu aa dang cio lai. Tahchunnak ah  Salai KB Laikhal hi ai dawh lo ngang kan ti ko hi mu. Asinain, a nungak (girlfriend)   caah cun a rak i dawh meisei, iangsur a si kan ti ko lai ta☺. Cucu, sersiamtu ‘Pathian hi ‘Pathiam’ (God is the perfect creator) a rak sinak a si. Kan mithmuh hi ilo dih sehlaw, Salai Vei le Salai KB Laikhal tepawl hi zeitik ahdah nupi an ṭhit lai---Vaal  von ti ve ṭung i kum 50 cung rak kai ziar a fawite☺. A ruang cu tha le zaang in ṭan a hau hnga i an ting hnga lo ti bia.

Khah, a chung deuh ah vung lut usih. The Youngman’s World cauk fate ṭialtu, Mr. Leonard Skohe Vane bia ṭheo ka hun char. “Thuamthil nih hin minung hi kan lungput le kan nunzia zatuak sawmnga (50%) a thlen khawh” a ti. Atu chan mino kan hrukaih zoh tikah kan lungput le kan ziaza tampi aa thleng cang kho men. Nungak nih skirt tawite le hnifual nan i fenh (venh) caan nan lungput khi tuak ulaw aa dang bak nan ti ko lai. Angki hngawngbak le ṭanghup (yinphone) an timi, mah khi nan i hrukaih caan nan lungput zong aa dang rih lai. Tlangval ca zongah a si ve ṭhiamṭhiam ko.

Pastor nih kan sam hi lingfur, pirtuau in tuah sihlaw zeidah a lawh hnga. Korean actor siṭal rumro cawng ve sihlaw teh. Aphi cu phohpian ti khi a si hnga cuh. Laiholh cun ‘a tlu’ kan ti hnga hmeteh. Doctor pakhat nih side-car mawngpa  bantukin sokphak ngai le tlamak ngai in i hrukaih ve sehlaw teh, minih upat awktlak lo sinak ah a thil hrukaihmi nih a pialpi khawh. Mah le mah i zumhraihnak (self-confidence) zong a derthawm ngai lai. Hiti tikah caṭialtu pa hi hrukaih ka thiambik hlei lo. Amah le a caan hoih, a hmun hoih, mah sining hoih in  hrukaih kan thiam ding hi a biapi.

Western nu pawl caah ‘hnuk’ (breasts) langh hi ningzahnak a si lo. Korea nu pawl caah ‘khuk lengbo’ (knee) langh zong hi an caah ningzak a si lo. Laimi kan phung tu ahcun ‘nu khuk langh le pa chiaṭha langh aa tluk’ an rak ti. Asinain, atu ahcun kan ning a zak ti lo. Angki hngawngbak hrukaih zong kan ngamh ko----kan lungput (50%) aa thlen ruangah a si  hnga maw.  Cucu, chantiluan theipar an si tikah ahohmanh sual iphawt awk a ṭha thlu lo men lai. Amah belte, tlawmte cu kan i  tuak a hau rua lai hih.

Abik in nu caah  thuamthil hi a biapi khun. Aruang cu thuhding le nawhding a tam☺. Nutung nih nungak lonh in kan i thuamh ahcun lohtlau. Tlangvalno mitthlirhnak le ngiatngennak ah na thuam nih na lungput a mawngh lai i an hruai lai. Tlangval zong nih nungak dekmakte, ai chaih saling ah an in rel lai. Asiloah, lengṭuul (apioci) zongah maw an hei in rel. Aphi cu nan pa le na chungkhar he buailo buainak. Pa ca zongah a si ve ṭhiamṭhiam. Luantuk in patung nih hrukaih kan hman ahcun lunghrin bute in ka nupi le ka fale nih inn in an ka hngah ko, ti khi theih a hau. Kan fale, ngakchia tete, asiloah kum 10-15 hualham, bawlraw pawl zong smart ciahciah in Fitlaw le Fidi (Actor and actress) siṭal rumro in kan thuamh hna ahcun kum 15 a tlin hlanah a nungak kho, a tlangval kho.

Khah, ṭamh le hrukaih i dawhnak kan pomlo kan ti lo hih, ahohmanh meet duh lo. Zeithil hmanh hi extremist timi a lehpek tukmi, a lawmmam tukmi cu an ṭha lo, kan theih dih. Laimi Khrihfa cu Zarhpini hi kan i ṭamhmoihnak Ni a si kan ti khawh. Pathian thangṭhat a si caah dawhte le thianghlim tein kan thangṭhat awk zong a si ko. Amah belte, mino tampi kan hrukaih le kan iṭamhmoih ning tete hi cu ruah awk a um ko rua. Daite in Pathian bia kho loin kan thuamthil nih khuadangpi a kan ruahter khawh. Pumh dih tik i tlangval nih, nungak nih ngiat lo le chawnh lai lo hna kan phang kho. Kan thuam le kan thil hi minih an kan hmuhpiak loding zong kan phang kho.

A ngaingai cu, Biakinn kan phanh hnuhnu cu zeibantuk misual kan si zongah hnangam daite le lunglut tein Pathian kan biak khawh ding hi a biapi. Laimi cheukhat kan Biakinn cu Pathian thangṭhatnak inn khom alo ti lo. Thuam le thil i langhsarnak inn, asiloah fashion show hna alo deuh cang. Biakinn chung ahcun actor le actress kan lawh lo zongah a poi hme maw?

Mr. Leonard Skohe Vane ṭhiamṭhiam nih, “Nungak pakhat hi tlangval pa 5 nih an zoh i aa dawh bak an ti dih. Asinain, minung pa 2 lawng nih mui le sam in aa dawhnak an rak hmuh. Adang minung 3 nih cun taksa hiarnak (willing sex) dawhnak mit men in an rak zoh ve” tiah a ti. Cucaah zei zawnte ahhin dah kei kaa dawh, kaa dawhnak hi zeidah a si ti le zeibantuk thuamthil dah kaa rem ti i theih zong hi fim phunkhat  a si. Salai Vei nih a ka chimhnak ah “Zaan tlai hnu i skirt tawi tuk aa hrukmi nungak cu minih interview an tuah tawn hna” a ti. Zeibantuk  intavio a si cu ka thei ve lo.

Asinain, thuamthil le kan i hrukaih ning tete nih kan sining a langhter kan ti khawh. Chanthar fashion hi zapiko nih cun a min chim hmanh kan thiam lo. Azeikhom siah, Richard Zatu bia cun “ṭhat hi a ṭhabik, a tawkfang hi a tawk.” Luan deuh le a leer deuhmi thuamthil  hrukaih caan zong a um ve ko. Biakinn chungah cun a tawkfang hi a tawk bik ko rua. Kai dawhnak, ka thuam le ka thil hna hi (kai rem le rem lo) keimah nakin minih an hmuh deuh, an theih deuh ti hi philh lo a hau.

(Note: HBA Mekazin ah rak ṭial cangmi cabia a si)