Salai Laikhal Lenhmun: Saya Peng Thang

Saya Peng Thang He I Tonnak

Ahmun : Khaweichan

Ani : 7/7/2013 (On Sat)

Acaan : 1:00 - 300 pm

Biaruahtu : Richard Zatu, Pu Zung Mang

: H.C. Than Bik Lian

: Salai Joseph KB Thawng

A hmaisabik ah na konglam tawi theih kan duh ko.

Ka pa He Luai, ka nu Tluang Val. (Note: a chuahni kan hal tikah chuahni kong hi US ram ahcun hal phung asilo. A ruang cu, chuahni an theih ahcun, kan konglam tampi an hlat khawh i kan min in bank tibantuk ah tangka cawi, tax return tehna i thoh khawh asi ati. identity theft timi asi, ati caah a chim lo).

Yangon (Lairam na umnak kong) le sianignn kainak tawifiang in.

Hakha ah taangcheu in taang10 tiang ka kai. Yangon University in BSc le MSc degree ka hmu. 1986-1999 kum tiang hi Yangon University ah “Tutor in Lecturer tiang” ka ṭuan.

Germany i sianignn na kaimi kha cozah nih maw an in kaiter, asiloah nangmah tein dah?

Aw…si. Cozah nih ti tikah State Scholar (ပညာေတာ္သင္) ti asi i University Saya a ṭuanlio mi (kum 35 tang) kha camipuai kan tuah. DAAD timi Deutscher Akademischer Austauschdienst (German Academic Exchange Service) nih full scholarship pek mi asi. 1999 in 2001 kum tiang Kaiserslautern University ah ka kai. Diplom degree ka hmu. Ka cawnmi cu Industrial Math asi. DAAD scholar cu anmah German hrimhrim zong nih an uar bik mi pakhat asi. (Science lei hi Diplom, Arts lei hi Magister an ti. Master level asi).

US tah zeitik kum ahdah na phanh, rian na hmu colh maw?

2001 kum ah. Rian ka hmu colh lo. Rianṭuan khawhnak (Work Permit) ka rak ngei lo. Kum 3 hnu ah, College pakhat ah ‘tutor’ ka ṭuan. American tutor cu Kawlram he aa dang ngai. Siangakchia a thiam deuh mi zong nih ṭuan khawh asi. Rank (position ) asilo. (Suimilam caan tuak in ṭuanman pek asi).

Atu na ṭuanmi hi teh zeibantuk dah asi, zei reng dah na si?

Instructor asi. Acheu college ahcun Assistant Professor / Lecturer an ti. Department of Mathematics & Computer Science ah ka chim: College Algebra, Statistics, Calculus le Computer Programming. USA ahcun College cachimtu hi professor, High School le atanglei hi teacher anti. Kawlram auhning he aa dangdeuh kan ti lai cu. Kei hi Prof. Thang an hei ka ti ko.

Na siangnakchia lakah Laimi an um el maw?

Pakhat hnih cu an um tawn. Lian Pi (Pu Lian Hre fapa) hi kumkhatnak asi lioah ka Class ah a kai. A thiam ngaingai. Atu hi Indiana chung University nganbik ah Geography in Master ka kai lio a ka ti.

US ah University Saya dang Laimi chungin an um maw? Zeidah an chimh cio?

Dr. Kenneth Vanbik pei California ummi University pakhat i Linguistics Department ah Professor asi kha.

US le Kawlram cacawnning aa dannak.

US University ahcun a tam-u hi Semester system in cawn asi. January in May tiang hi “Spring Semester, August in December tiang hi “Fall Semester” anti. “Summer Semester” May in July a kai mi zong an um. Fall Semester hi khuacaan a nuambik, sianghnakchia zong an tambik. Semester hmang loin kumkhat ah voithum kaimi “tri-mester” a hmangmi sianginn zong an um ve.

Cathiammi hna caah scholarship a um maw, cun US cawcawnning theihtlei tete?

Um tuk ee. US minung asilo mi ramdang mi hmanh pei full scholarship an pek len hna cu. Atlangpi in USA ah College siangakchia hi domestic students (Ram chungmi) le international students (Ramdangmi) tiin phunhnih in an ṭhen. US citizen asiloah Green Card a ngeimi hna hi domestic ti asi. Refugee zong hi domestic asi ve. International student ti mi cu, ramdangmi (USA leng in) student visa in USA ah college a rak kaimi an si. Cun, Scholarship hi phun (3) in an ṭhen

US minung ca lawng, ramdang siangakchia calawng, mizeipoh ca in tiin a um.

US college ah school fee hi domestic fee le international fee tiin a um. A tlangpi in, International student pawl hi domestic student nakin letli in school fee an liam. Tahchunhnak ah “ domestic siangakchia nih kumkhat ah school fee $8,000 a pek ahcun, ramdang in a rak kai mi nihcun $32,000 a pek lai. (school fee timi ahhin, ei man, inn hlan man, ti man, mei man, cauk man, bus man, etc. aa tel lo). Indiana University hi US ah minthang pakhat asi i, a man hi a dinlo, a fak lo mi asi. 2013-14 ah a tar mi cu:

Domestic siangakchia paohpaoh cu Free Application for Federal Student Aid (www.fafsa.ed.gov) hi an hmuh. Full time kai ahcun kumkhat ah $ 11,000 (thonghlei khat) hmuh asi. Cham hau ti lomi asi. Grant ti asi. A camipuai a sungh ahcun an phih lai, a awn ṭhan tikah pek lengmang asi. Cathiam ahcun school fee kha free asi lengah pocket money zong a taang.

Tuition and mandatory fees	$32,911
Room and board (based on a double residence hall room with a standard meal plan)	$11,617
Health insurance	$1,188
Miscellaneous expenses (including books and general living expenses)	$2,130
Total for 12 months	$47,846

Cun student loan timi ( Loan asi, a karh he cham ṭhanding asi) a um. Kumkhat ah $10,000 (thonghra hrawng) lengmang cawi khawh asi. Master a kaimi cu kumkhat ah $20, 000 lengmang cawi khawh asi.

US College hi phunhnih in a um ve. Private le Public (cozah) tiin a um. Minthang le sianginnṭha hi private ngawt an si. Private college kai ahcun, ramchung siangakchia le ramleng siangakchia (international student) school fee man aa khat ko. Citizen si zongah International zat bakte in an pekter hna.

Cozah college i school fee man hi phun 2 in a um hoi. US citizen ciocio zongah in-state fee le out-of-state fee tiin a um. Tachunhnak ah, “Lairam in taanghra awngmi nih Kachin ram ah college a kai duh ahcun, Kachin ram in a awngmi nakin school fee let 2-3 tamdeuh pek a hau. State pakhat ah a tlawmbik kumkhat a um asi bel ahcun, cuka state citizenship an pek. Cu tik ah school fee tlawmdeuh in an lak ṭhan. Cucaah mah le state cio ah kai ah a man aa dengbik. International Student cu semester pakhat (thla 4 chung) ah credit hour 12 a kai lawnglawng ah a student visa (F-1 visa) a nung lai.

Credit hour timi cu zei tin dah a um tu ning?

Semester pakhat ah a zarh in zarh16 a um. Hi chungah zarhkhat ah suimilam pathum na kai ahcun, credit hour pathum na kai tinak asi. Semester pakhat chung (a thla in thla 4) ah, Subject pakhat hi zarhkhat ah suimilam pathum kai a hau. Zarh 16 na kai caah (3X16 = 48 hour) na kai. Tahchunh nak: Semester pakhat chungah English, Mathematics, American History, le Philosophy hna na kai ahcun subject pali na kai. 4 X 3 hours = 12 credit hours. Credit 12 na kai tinak asi ko. Atliang ngaingai, peh awk a um ahcun vun peh rih tuah! Cun Master in a cunglei kai asiah cun credit 10 kai ahcun F-1 visa a nung. Master le acunglei cu, US nih Graduate Study anti. (nikhat suimilam 3 tlukin nithum kai ah a ngah tinak asi).

Cacawn pah in rianṭuan khawh asi maw?

International Student caah (F-1 visa) hin zarhkhat ah sml 20 hi tazavun tein rian ṭuan khawh asi. Domestic student tu cu a duh zat a ṭuan khawh. A visa nunter a herh ti lo cuh. Credit pakhat te lak zong in kai khawh asi. Cucaah kan Laimi tampi credit pahnih thum te lakin an kai lulh. BA asiloah BSc Degree pakhat hmuhnak ah credit 120 a hauh caah kum khat ah credit pathum tein kai ahcun, awn lengmang bute in, kum 40 a rau hnga (hehee, biatak capo).

Cucaah ramdang siangakchia hi an degree hmuh a rang. Semester pakhat ah credit 12, kumkhat ah semester pahnih a um i, credit 24 an ngei. Kum 4 ahcun BA asiloah BSc degree an hmuh.

US le Kawlram cachimhning aa dannak?

A fawinak in chim ahcun, Kawlram College ka ṭuan lio ahcun, cachimtu men men kan si. Syllabus (Cacawn ding pawl ), camipuai ni le caan, sungh le awn kong zong kan cunglei upa nih an tuaktaan dih.

American tu ahcun academic freedom an um ngai. Tahchunhnak ah, keimah nih ka chimhmi ka class (ka siangakchia pawl) hi keimah tein syllabus kaa ser dih. Kan cawndingmi vialte kanmah te cio in kan ser dih. Cun syllabus (cacawn dingmi, a textbook, a ṭialtu, print kum, camipuai ni, sungh le awn kong tibantuk pawl) cu kan siangakchia kha kum thawk tein kan pek cia hna.

Cu syllabus atanglei te ahkhin (Instructor has the right to change syllabus at anytime) tiah ka ṭialchih. Question zong keimah tein kaa tuah. Ka siangakchia kha an phit tikah ka hmaika te ah ka phiter hna i sungh le awn zong keimah nih ka tuah.

Cu lengah, internet in rian tamtuk ṭuan khawh asi. Siangakchia he link kan ngei i group mail in fawite in kan ipehtlai. Homework zong hi internet in an tuah i ka sin a phan colh. An lungfianlonak zong online in kan ihal, kan ichimh khawh caah rian hma a kal ngaingai.

Lahkhah kongah suimilam in maw, asiloah a thla in dah an in pek hna? Full-time pinah riandang na kemh chapmi a um maw?

A thla in pek asi. Zarhhnih ah voikhat a pe mi college zong an um ve. Full-time nih class pa (4) chimh asi. Cucaah Full-time University professor hi zarhkhat ah suimilam 12 (12-credit hour ) cachimh asi. Class pali leng in chimh asi ahcun chimhchapmi class zat baak in lahkhah pek chap asi ve. A caan ngeih ahcun college dang zongah va chimh chap khawh asi ko.

Nurse hi US ahcun ṭhan lahkhah a ha ngai an timi hi zeitin?

Asi ko. Mekazin le tadinca ah Nurse lahkhah a tamnak kong atuletu te an ṭial dahkaw. College ah zei subject dah ka cawn lai tiah an ka hal pah lengmang. Laimi caah cun ‘Nurse’ a ṭha cem lai tiah ka ruah. RN (Registered Nurse) tiah an auh. US ah upat mi rian professional pakhat asi ve.

Kum 2 ah Community College in RN (Associate of Science) hmuh khawh asi. Kum 4 cawn in, RN ( Bachelor of Science) degree an peek. USA ah Nurse degree hmuh lawng in nurse ṭuannak nawl an ngei ve lo. NCLEX timi (National Council Licensure Examination) an awn a herh. A sungmi an tam len. Phit ṭhan khawh asi ve.

Private siizung, cozah siizung, University siizung, sianginn paohpaoh, hna lawng si loin, tar zohkhenhnak (Nursing home), Rehab (mitlamtlinglo zohkhenhnak tibantuk a tam tuk). Nurse license a awngmi cu rian a hmu lomi an um lo. Overtime a ṭuanmi pawl cu kumkhat ah thongsawmnga ($ 50,000) in a ting tiang an hmu tiah caah ka rel.

Fawizaang tein US ah Doctorate degree a pemi sianginn hna a um ve maw?

Internet ah an cawngia lengmang hi tah. Tangka mah zat rak tun law Ph.D degree kan in pek lai a titu zong an um. Amah belte, sianginnṭha mi asilo tikah, an Ph.D degree cun, US ram college asiah, cozah asiah, company asiah rian an hmu lai lo. US ah ṭhate in Ph.D kai duh ahcun GRE (Graduate Record Exam) camipuai awn ta ah a ṭha bik. GRE cu English le Math asi ko caah, kan Lai mino pawl ṭhate in an i zuam ahcun mark ṭha an hmu ko hnga. Accredited asimi University pawl ah admission an hmu ko hnga i, doctorate degree an hmuh dih cun rian ṭhaṭha an hmu ko hnga.

American pawl hi Math (kanan-tinchia) an thiamlo ngai i Kawlram minung kan thiamdeuh an timi hi a si kho maw?

Asi hnga maw? Kan nak thiam a tor bantukin kan nak thiamlo zong an um ve ko lai. Laimi hi sianginn ah a dang subject nakin math cu kan thiamdeuh taktak ko rua. Annih US pawl cu ‘calculator’(kanan pawngseh) kha an ibochan tuk i thluak in tuak an thiam ti lo. USA an College ṭha paohpaoh ah entrance exam cu Math le English lawnglawng asi ko. Cucaah Laimi hi Math kan chei pah ko caah English hi fakpi in i zuam usihlaw, college ṭha ah admission kan hmu ko hnga.

Laimi hi Mirang lakah minthannak a hmumi an um el maw?

An um ko nain an tlawm tuk ka ti ko lai. Kawlram in pei SAT (Scholaristic Aptitude Test) a mark ṭhami (a awngmi ti ko usih) cu US ah college ah full scholarship in an rat lengmang hi. US zongah cathiam le thiamlo tahnak cu SAT asi ko. A fawinak in chim ahcun SAT an awn lo ahcun cathiam an si lo. Laimi nih kan i palhmi cu sayate he idawt ruangah, chimhngaih ruangah, pakhat khat ruangah class chung laksawng hmuh hi cathiam ah kan ruah sual.

Asianin, kan rak thiam taktak lo i sianginn ṭha taktak luh khawh asi ti lo. A tawinak cun college ṭha kai aa timmi caah SAT awn a herh bantukin rianhmuh khawhnak doctorate/PhD kai aa timmi caah GRE awn a herh ve. US Laimi kan fale zong SAT a phi lomi an tamtuk. SAT a thei lomi hrimhrim hi an tamtuk. SAT sungh ding a fiang komi cu an sayate zong nih tangka dih in phitter an senh hna lo. A sungmi an tam ahcun Sianginn min a chia.

America ahhin Laimi hi sport ah zeidah an lawh?

Laimi hi sport ah kan za pah ve ko. Zaangleknak hi Soccer (bawlung), football (kut in i cuh mi, a zawlmi American bawlung), swimming (tilio), Wrestling (Paih), tbt. in University ah tampi a um. University selection an si ahcun full scholarship an pek hna. Kan fanaule pawl hi Wrestling, Tennis, Soccer ah an lang len. Ka fanu zong hi tang 9 asi, a sianginn ah tilio selection asi i ṭhate a pehzulh ahcun, college ah tilio full scholarship a hmuh khawh.

Sport hi Laimi caah ka duhpiak ngai hna. Degree an hmuh hnu zongah sport coach (nipiah) ah an lut kho. Physical Science major in degree a hmumi hoi hna cu rianṭha a tam. Professor level in lahkhah an ei kho.

US ah sianginn kai a duhmi hna caah zeidah a herhbik?

SAT an awn khawh lo hmanh ah, TOEFL (Test Of English as a Foreign Language) tetal hi cu rak awng ta hna sehlaw a ṭha hnga. Degree hmuh hnu ciocio ah TOEFL awng le awnglo an idang ngai tiah research ah an hmuh. Tahchunhnak ah, international student chungin degree hmu mi ciocio ah, TOEFL awngmi cu 100 ah 80 hi siibawi, university professor, company bawi tibantuk an si (mi ah an i chuah). TOEFL awnglo in a rak kaimi cu 100 ah 10 hrawng lawng mi ah an i chuah tiah anti.

SAT awn ahcun a ṭhabik ta. Na duhnak college le scholarship tambik an pe mi college naa thim ko hnga.

SAT awng paoh cu TOEFL cu chim hau loin a awngko hnga. Asinain, a TOEFL awng paoh in SAT an awng kho lem lai lo. SAT cu a hardeuh. TOEFL le SAT ah lamphawk a um lo tiah anti. Hmanhman tein i zuam peng a hau ko ti asi.

Tutan Kawlram na rak tlun hi zei herh ahdah na rak tlun?

Tlawn ah asi ko. Ka fale zong summer break asi i kan hung tlawng ta ko hih. Kanram in ka chuahnak kum 14 asi cang i ka ngai ko. Mah ruang hrimhriam ah ka hung tlung. Kawlram zong cu a von i thlen tikah tlun duhnak thinlung tampi kan ngei cio hna. President Thein Sein biachim mi zong youtube in kan hmuh, kan theih lengmang i lung a tho ngai.

Laitlang tiang na tlung i na va hmuhning, kan ṭhangcho deuh ko na ti maw?

Hakha innlo cu an ṭha bak. Yangon nakin a ṭhangcho deuh tiin ka hmuh. Lam, rian, mei, ti tbt. hna hi 1999 kum nakin an ṭha deuh. Yangon tu cu Lam karh loin motor lawng a karh. Cun, Hakha cu i chawhleh- nak ah motorcycle hman asi i aaning ngai. Rian loin a vakvai an tlawm i zuding sa-ei in aa sivua luklak an um ti lo. Gangaw lam motor aa chawklet mi hrim a tam ngaingai.

Khuate lei zong an ṭhangcho ngaingai. Hakha le Thanglang hi America hmete asi ka ti. America ahcun khuakip hi vanlawng asiloah motor in nikhat ah phanh khawh dih asi. Thantlang le Hakha peng pawl zong hi motorcycle in khuate lei vialte nikhat ah fawite in phanh khawh asi cang.

A hlan ahcun, Thantlang in Mualkai khua hi chuncaw kan rak i funh i chunnitlak kan rak kal. Atu cu sml 2 ah kan phan. Cell-phone aa tlaihmi an tampi. Hmunthar khua timi Pu Hram Tawi (Bawi Jesuh lung a donhtu) khua ah khan lakphak dawr hna a um. Thantlang in thaithawh ei hlan ah Jesuh lungdonh zoh pah ah lakphakti va din khawh asi. Jeep hi peng kipah a kal kho cang. Khuate tampi ah ti tha hmang in anmah tein lekṭik an ceuter. Ti zong hi an innchung ah an ithlak khawh cang i ka ruah nak lengin Lairam cu a rak ṭhangcho ko. Communication a ṭhat paoh ahcun thawngṭha siseh, thawngchia siseh theih colh asi lai.

Biacah ka duh mi: Rangoon asi zong ah, Lairam asi zongah ramdang nan fale, nan naule kan tam pah cang. Kan in tlawng lengmang cang hna lai. Zunput hi Buṭhain (asang mi) in rak ser kho dih ulaw a ṭha tuk hnga. A dang cu a tlamtling ko.

Laitlang na tlun i na lunglen ngaimi le naa lunghmuihmi tete.

Laimi cu thlachiat kan ruat. An kan dawt, an kan conglomh, an kan thloh. Cun, Mualkai, Hakha, Thantlang, Tlangte, Mualkai hna nih nangmah sinin zeihmanh ruahchanmi kann ngei lo (cawng saya nih khua caah zeihmanh tuahpiak khawh asi lo kan theih ko ti bute in) kan in ngaihmi le kan in dawt caah tiin “haang an kan soh.” A sungtuk mi kan Laiphung asi. Ka nunchung ka philh kho lai lo.

Careltu le Ṭhinṭhang dawtu hna sinah biacah na duhmi a um ahcun.

Kan chan hi mithmuh tein a khupthal aa let tatak hi mu. Kawlram hrim zong aa thleng cang. Cu tikah Laimi nihhin a hman zia (advantage) kan thiam a hau. Transparency international nih Vawleicung ram 200 corruption index timi (Lih le hrokhrol tahnak) ah Kawlram le Somalia ram hi a hrokhrol bik kan si. Ka zumhmi cu hihi asi.Kan education system hi faktuk in sautuk a rawk i, kan thluak nih kaupi in khua a ruat kho ti lo. Kawl nih “ta-kha-saa - ta-puai-tuu” timi cikhat miaknak in kan kal. Lamphawk “phiat-laan” kan zul.

India, Kawlram, le Tuluk hi 1947, 1948 kum le 1949 kum ah tiin independence kan hmuh kum hi aa chang hna. Kawlram cu independence kan hmuh thla 3 ah ramchung “Hriamtlai” kan tho colh. Taingyintha vialte ral kan tho. Vawleicung ah ral a thawhnak ram paoh a ṭhangcho lo. Ram a rawk, izamtaknak, izumh lonak a chuak i Kawlram zong nihin tiang hi ral a dih rih lo caah kan ṭhanghco lo. Ngakchia le mino caah a fakbik.

India tucu Nehru nih British (England) sinin independence a lak lecangka in I I T (India Institute of Technology ) Sianginn 8 a dirh colh. Cu sianginn cu nihin ah vawleicung technology sianginn ah a ṭhabik an si. Mah sianginn chuak hna nih khan atulio American IT sianginn vialte le IT system thil vialte hi an tlaih (control).

Cun, English kha official language ah a hman colh. British Education system kha a ṭhat a theih, a hman colh. Cucaah India cu technology siseh, education siseh, nihin vawleicung ah number (1) asi.

Kawlram tu nihcun, Mirangca cu salcannak ca ati i, Mirang ca in cawn mi

sianginn vialte kha Kawlca ah a thlen dih. Mirangholh le ca hman cu Kawlram dawt lo asi, tiah ati. British Education System an rak hman cang komi kha Kawl System ah an thlen.

Cu ruangah nihin Kawlram minung nih a theipar kan zuun. Vawleicung ah a sifak bik, a ṭhangcho lo bik, le a hrokhrol bik kan si. Hi kong hi atulio ramhruai aa tim vemi nainganzi-tama pawl nih ṭha tein fimnak ah i lak a hau. Ram aa thlen lio caan (transition period ) ahhin kan hmailei thil acang dingmi a tuaktaan kho lomi, cacawnnak le fimnak (education and technology) zei ah a rel lomi, le hriamnam aa bochanmi nih ram an hruai ṭhan ahcun, a ralaimi kan tefa hna kha rochia taktak kan roh ṭhan hna asi ko lai.

Tuluk zoh rih usih. Nihin US nih kan hmanmi thil hi “Made in China” ti lawngte an si. American nih Tuluk hi ‘trillion’ bakin phaisa zong a bat. Phundang cun Tuluk um hlah sehlaw American zong hi a nung kho hnga lo. US ahhin accredited college hi thongnga (5,000) hrawng a um. Cu ahcun India professor le Tuluk professor an um lonak a um lo.

Cun, a bikin nihin kan fanau mino hna nih English le Computer hi thiam taktak a herh. Kan ram aa thleng, hi hnu kum (5) chung hmanh ahhin tampi aa thleng rih lai. Programming rian tampi hi online in tuah khawh asi cang. USA le ramdang rian tampi kha, Kawlram na umhmun in (a lang in) computer le internet hmang in na rak ṭuan khawh lai. Tahchunhnak ah, nihin USA a um mi pawl tax file piak tehna, USA ramchung vanlawng lehmah zuar tehna, computer le electric thilri a rawkmi remh tehna kha India ram in a lang in an rak ṭuan. Mino pawl nan thachia hrimhrim hlah uh. Na thiamnak man cu alak asi hrimhrim lai lo. Ready tein rak um zungzal ko uh!

Lungsau tein bia na kan ruah caah kan ilawm.

Keizong kaa lawm tuk ve.

The following scholarship programs are specifically for Burmese students:

The Open Society Institute's Network Scholarship Program http://www.soros.org/initiatives/scholarship/focus_areas/supplementary_burma

email: vjohnson@sorosny.org

* Prospect Burma

www.prospectburma.org

Email: scholarships@prospectburma.org

* Burmese Refugee Scholarship Program

Email: cmyint@indiana.edu

* Burma Education Scholarship Trust, Scotland, Supplementary Scholarship Program

www.burma-trust.org