LBC Mino Kan Hmuh Hna Ning

LBC Mino Kan Hmuh Hna Ning

 (Lai Baptist Church, Yangon)

Salai Joseph KB Thawng

“Deirel Cazual Editor nih cabia na kan ṭialpiak lonak a sau cang. Youth Sunday ah special in hun kan ṭialpiak te” tiah a ka sawm caah ka hun ṭial. Tutan ka tlangtar hi phundang ah nan ka ruahpiak loding ka duh. Hiti ka ṭial tikah caṭialtu keimah kha zei ka si hlei bik lo. Ka ruahning le kan hmuh hna ning tu in ka hun ṭialmi a si.  

Zatlangnun le pawlkomhnak

LBC Mino nan zatlangnun a ṭha. Nan i purup fawn. Mino pumhnak caan hmaan in nan ngei kho. Mirangholh le ringawn lei in caan nan hmang kho. Kum fatin excursion trip nan ngei kho. A bikin Current Issue Dialogue nan tuah tawnmi ko hi ka duh. Keizong voikhat kaa tel bal. Amah belte, mino nan tlawm. Minung pa kuahra lawng nan chuak. Hi bantuk caan ko ahhin mino tampi in chuak ulaw a ṭha tuk hnga. Mino hruaitu le ṭuanvo ngeitu nan fel ngaingai.  

Fimthiam cawnnaklei ah nan men lo

Hmunpi le khuapi a ṭhanglian deuhmi nan si tikah basic ṭha nan ngei. Cataang sang pipi a kaimi nan um. Nanmah le nan cawnmi subject cioah nan qualify hna. Cun, a kamkip ah zohchunh awktlak in minṭhatnak a hmumi tampi nan um (tc. Van Sui Par (model), Nicholas Dawt Kam Sang (singer), Rosy Tawk Ṭha Par (model and actress), tbt. ka langhter lomi nan tampi rih lai). Fimthiam cawnnaklei ah LBC mino hi international Laimi sin hmanh ah kan chawr hna. Cun, mino tete nih rank sangsang le thlahlawh tampi a co/ṭuantu nan tampi fawn. Kan upat hna i kan hmaizah fawn hna. I zuam ṭualmal rih u.   

Social Media le Laiholh

Media kan ti tikah a kaupi—kan theih dih. Facebook (internet) tu khi ka chim duhmi a si. LBC Mino hi ka ruahnak lengin Laiholh le ca nan thiam. Amah belte, Laiholh nan uar rua lo hlah maw. Miphundang holh thiam a herhning cu kan theih dih ko. Amah belte, a zungzal in Facebook status ah miphungdang holh (tc. Kawl, Mirang tbt.) rumro in kan taar/ṭial peng mi hi cu kan i sum deuh awk a si hnga lo maw (nan dihlak cun nan si lo). A leng hrimhrim ah kanmah le kanmah i chawnhnak ah Kawlholh kan hmang deuh in ka hmuh. LBC nih innkaba ah “Laiholh in Holh” ti taar a si. A holhmi zaazat a holh lomi zaazat kan si ko lai. Hlaing Thiri i Bingbir Sabuti Dawr ah khin LBC mino deuh hi a lutchuak mi kan si. “Laiholh in holh izuam hna usih” ti an taar. Nain, Kawlholh thlam rumro te a leng tawn. Kawlram khuasa kan si caah Kawlholh cu kan thiam, hman awk a si ko. Amah belte, a caan le a hmunhma zoh thiam a herh lai. Laiholh nakin kan uar deuh lo a hau. A bik in facebook ah kan iralrin deuh awk a si. Laiholh le ca hi dawt deuh, uar deuh le hman deuh kan hau.

LBC Mino le Fashion

LBC Mino pawl hi fashion nan thiam bak. Nan thuamthil he nan i tlak dih hna. Hrukaih kongah nan men lo. Ṭamhmoih nan thiam. Muidawh zong hi Yangon khuapi ah LBC Mino nan i dawh bik lai dah (?). Amah belte, Mr. Leonard Shoke Van bia ṭheo in, “Thuamthil nih hin minung kan lungput zatuak 50% a thlen khawh. 
Ngaknu pakhat kha tlangval pa 5 nih an zoh i aa dawh, an ti dih. Amah belte, minung pa 2 nih natural beauty mit in an zoh lioah minung 3 nih willing sex mit in aa dawh an rak ti ve” a ti. Chim duhmi cu kan thuamthil hi kan i dawhnak a cawisangtu a si awk a si. A leer lo a herh kan ti lai. Kai dawhnak hi mi mit ah zei zawn hi dah a si, ti theih a hau. Kai dawhnak hi keimah nakin mi nih an hmuh/theih deuh ti zong philh lo a hau. A ngaingai cu, chantiluan dawi khawh timi hi mi nawlcawn thiam khi a rak si.  

Ka biadonghnak ah thazaang peek kan duhmi hna cu,

YOUTH

Y=Young

O- Outstanding

U- Unflinching

T- Trustworthy

H – Handyman si i zuam chin lengmang ko u! LBC Mino hi international level in a kamkip ah zohchunh tlak mino nan si!

(Note : LBC Youth Sunday ah rak ṭial cangmi capar tawi a si)