Mah Le Ruahning Cio!

Mah  Le Ruahning Cio!

Salai Joseph KB Thawng

Voi khat cu ‘hlawhhlangnu’ (harlot) bia an hal. “Ziah, mah pum rumro i zuar cu,” tiah.  “Aho nihdah ka paw nan ka cawm. Nulepa sualnak tuah hi a leemmi (sex addicted) zong an um ve ko. Asinain, kei cu ka huam ruangah ka tuahmi a si lo. Ka herh ruangah kaa zuarmi a si,” tiah a leh hna. Hei chia ko u. “Keimah pum cu keimah ta a si. Keimah ta kongah zeidah nan i thlak len, a hau lo. Nanmah kong tu ah  vaa thlak deuh u,” a ti hna.

Minung nuncan hi fiang tein zoh ahcun khuaruahhar ngaingai a si ko. KTV ah nungak dawhdawh an paamhmai ning. Mah le mah aa zuarmi ngaknu thatha. Nightclub ah lungretheihnak philh in an i nuam khawh hna ning. Cu laklai ah fir le tlei mit lawng a aumi an rak tam ve ning. Zeitindah mi ka hlen khawh lai, ka hlohthlau khawh lai, ka nawn khawh lai, tiah chunmang a man tawk zong an rak tam khawh ning. Asinain, za ah za (100%) cun an palh ti khawh a si ti hoi rau lo.

Khi vialte hram kan zawt ahcun chan aa thleng tuk kan ti hnga. Nungak caah skirt tawi tittet te hruk kha ningzahnak a si ti lo. Hnuuk lang deng angki hngawngbak hruk zong kha khuaruahhar a si ti lo. Kawlram minung cu hnifual le ttanghup (yin-phung) hruk a duhmi kan si. Asinain, bawngbi chungnawh le bawli (ေရကူး၀တ္စံု) he lawng in dawh kan i zuam ngam cang. Cu vialte cu tuksuum a si ti lo. Khuaruahhar zong a si ti lo---a chan nih a pek kan ti hoi kun lai maw.

Kan bia kan fun ahcun, “Ahohmanh hi na sual tuk, na palh tuk, na hrut tuk tiah fawizaang ngai in sualphawt khawh a si ti lomi chan a si,” kan ti hnga. Nuhrin Covo (Human Rights) biafang kan hun uar hnu lebang ah kan zualhma. A si ko, mah le ruahning cio ta. Mah le pomning cio bak a si ko. Asinain, kan philhlo awk cu, “Vawleipi, ram, khua, Khirhfabu le bu pakhatkhat hi kanmah pumpak cio ruahning in mawngh le hruai sisehlaw ai sualkalh dih hnga cuh. Ai tlaithlur hnga i ai fonh pacut hnga cuh. Asiloah, zawng daideh le zawng parathlei timi kan chuak hnga cu.”