Hlasakthiam Bil Sung he biaruahnak

Laimi Hlasakthiam,

Bil Sung he  biaruahnak 

U Sung, online in biaruah kan duh ko, caan na ka pe kho lai maw?

Si, kan peek khawh ko.

Kai lawm kun. Ahmaisabik ah na konglam tawi hun kan ruah law kan ilawm ko hnga.

Hakha peng Phai khua ka si. Chuahpi unau nu 8 le pa 2 kan si. Ka nu le pa an nung rih.

Atu hi zeidah na tuahbik lio asi, hla cu na sa cuahmah ko maw?

Atulio cu ka tuahmi  a um lo, innchungkhar zohkhenh asi ko hih. Hla zong cu caan ka tin paoh ahcun ka sa peng ko.

Pumpak in album na chuah cang maw, pa zeizat, chuah than ding tah nai tim el maw?

Pumpak cun Sui Uk Lian  nih Pathian hla a ka chuahpiak bal i amah zong a sa ve. “Apoi Tuk Kan Nun Hi” timi asi. Cun atu zong hi album chuah cu ka lung cun kai tim ko  acaan ka chim kholo.

Hla hi fung zeizat hrawng dah na sak cang hnga?

Aw hla hi hlaphel pakhat ah fung khathnih tein kai tel mi a um    ve  i cu  he cun a tam pah ve ko lai. Fung cu zat, ti cun a ruah awk ka hngal lo.  

Na hlasakmi lakah na lung an tongbik le nai lunghmuih bikmi zeidah asi?

Aw, hla ka sakmi pawl hi keimah tein kai thim i ka sakmi cu a um tuk lo nain ka sakmi paoh ka lungtling dih ko, uar hleimi cu ka ngei lem lo.

Hlasaknak in minthatnak le pakhatnak laksawng tbk. na co mi a um maw?

Si, hihi  kei cu chim awk ka ngei tuk lo. Asinain  ka ngakchiat lio  taanghnih ka si in hla cu kai zuam i  ka hmuh ve. Cun, ka hung upa i zuamnak ah kai telnak ahcun pakhatnak ka hmuh ko hna. HBC singsong service, HBA, CACC hla civui, kanmah Mi-e peng, tibantuk ah pakhatnak cu ka rak hmuh hna. Cun, 2007 kum  i an tuahmi ah Singer of the Year le Song of the Year ka hmuh bal.

Laimi hi hlasaknak in kan paw kan icawm kho ko cang lai, tiah na ruat maw, a ruang.

Laimi hi Pathian dawtnak in a kakip hmunkip kan phan cang hna i ramchung ramleng kan unau nupa cawisannak in ai cawmmi zong kan um cang i cawm khawh zong asi ko cang  tiah ka ruah.

Laimi hlasakthiam pawl ah kan in ruah. Nangmah nih tah ahodah na uar bik hna?

Laimi hlasa pawl hi an thiam dih, tiah ka ruah. Uar hleimi zong ka ngei lem lo.

Lai, Mirang le Kawl hlaphanthiam, hlasakthiam na uar bikmi hna.

Uar hleimi ka ngei lem lo, an thiam cio ko hna.

Hlasakthiam pakhat sinak dingah zeidah a biapi bik?

Aw kei ka hmuhning ahcun hlasakthiam si khawhnak ah a herhmi cu, (1) Amah aa zuam lai. (2) Mipi he ihawikomh thiam le itheih a hau (3) Chungkhar nih tanpi thazaang peek. (4) Uahfaihnak ngeih lo hi asi, tiah ka ruah.

Hla hi aw in sakmi le thinlung in sakmi a um, tiin na ruat maw, zeiruangah?

Aw asi ko. Hla hi thinlun le aw in sak mi a um ko. Aruang cu  timhtuahnak le a hmunhma, cun a hla  aw le a biafang hna ruang zongah an si, tiah ka ruah.

Laimi cheukhat nih love song sak an duhlo mi cungah na pomning

Atu na ka halmi leh hi cu ka tih pah. Asinain, keimah ka hmuhning ahcun Laimi kan bia le hla a tlau lonak zong asi. Cun, love song sak cu a sual ah ka ruat bak lo. Kan naule zong nih kan bia le hla hna hi kan dirpi chinchin a hau.

Lai mino hna hlasakthiam le hlaphanthiam hna hi cuti deuh, khati deuh in an sak/phan awk a si, tiah ruahnak cheuh na duhmi a um maw?

Hlaphantu hlasatu an tha dih, an thiam dih ko, tiah ka ruah.

Ni Bang Kan Tlang Than Te Hna Lai, timi nan sakmi kha kei le Pu Lian Uk cu a kan thlim, atha tuk ai. Ahodah aphantu le satu nan si.

Ni bang kan tlang than te lai, timi hi Lairam dawtu Biak Ceu phuahmi asi. Hi kong na vun ka hal i kan sak lio ka mitthlam ah a cuang. Kan rak tui tuk hna. Amah Pu Biak zong ai tel kho. Hlasatu 5 kan si hna.

Phundang deuh ah, thapetu tampi nih “a merem a tuan tuk deuh” an in ti pah i zeitin J

Heee...si maw, ka pum le ka thinlung cu a merem cang ko nain ka hlasak duhnak le ka aw  tu cu a merem ruam rih lo hih.

Atu hi fa pa zeizatdah nan ngeih cang cu?

Pathian nih fanu rosung pa 2 a kan peek.

Careltu, a bikin hlasakthiam, hlaphanthiam hna sinah biacah na duhmi

Careltu, hlaphantu, hlasatu le nan dihlak cungah kai lawm. Kan bia kan hla kan holh hi tlau loding in kilven ding zongah kan sawm hna. Hi bialehnak ah ka palhnak a um ahcun ngaihthiam kan hal hna. Atu bantukin bia a ka ruahtu Salai KB Thawng cung zongah lunglomhnak tampi ka ngei. 

https://www.youtube.com/watch?v=CcQ01XTSi1A 

https://www.youtube.com/watch?v=CcQ01XTSi1A