Hmanthlak Cung In Authawng

Hmanthlak Cung In Authawng

Salai Joseph KB Thawng

1.      Nudok Padok ka si sual

Ka hnuk (breasts) hi fakpi in ka bawli in ka reh tikah a puar lo. A ṭhanglian sual lai ti ka phang tuk. Ka sam hi Korea lemcang fitlaw (Korean actor) bantukin kai tuah meh. Nu sinah um ka duh lo. Ka hawikom cu pa lawngte an si. A ngaite cu ka thinlung le ka lungput hi pa bak ka si. Asinain, thi le sa in a nungmi ka rak si ve taktak. Ka pahawi pawl he kan ei, kan ding, kan it men. Cuti caan a hung rauh deuh tikah nu ka sinak cu a tlau taktak ṭung lo i ka pahawi kip nih an ka sualpi. Adonghnak ahcun an ka ṭhi duh laklawh fawn lo, a har tuk, vava ka tum. Minung covo (human rights) cun nu le nu, pa le pa zong an i ṭhi-um taktak ko lai, a phung ahcun pei a tlak cang fam cu. Asinain, cii le kawr, hrih le hram a cah/tlau ding le phuntungtu kan ngeih loding hi a poi tuk. Maw…ka hawile hna, kei cu kai chir a tlai tuk cang. Nannih cu pa nih pa in, le nu nih nu bantukin hun um u, tiah bia kan cah hna.

2.      Kum tlinglo in nupa sualnak ka tuah sual

Kum 13 lawng ka si rih. Kum 25 tlangval nih a ka leemsoi peng. Zu a ka dinter. Ka duhnak a ka zulh i cawk, ei, tuah ka duhmi paoh a ka tuahpiak. A mihlen thiamnak rap nih a ka foih/awh. Hotel ah a ka riahpi. Nupa sualnak a ka tuahpi. Nupa sualnak tuah nih a ka leem (sex addicted). Duh le uar ka hun thiam tikah a ka ṭhi duh fawn lo. Atu cu awkawk fakfak in vantaw ka muai e. Ataktak cu keimah duhthimnak asi hrimhrim lo, ka tlangval pa ruangah asi. Ka dawtle hna, kum tlinglo in tlangval ngeih le nupa sualnak nan tuah ahcun keimah sinah nan phan tuan. Hun hrial hram u!

3.      Mi nunnak khamhtu ka si

Khondam (condom) hna cu, hman a hau lo cuh, nan ti tih! E..e..e, nan ning hmanh zak lo. An khamhtu hna ding dafawh ka si. I kuhreh, ihnamhnak men cun zawtnak thalo, a bikin Acquired Immune Deficiency Syndrome (AIDS) zawtnak cu nan i chawnhbarh bal lai lo. Asinain, sex timi nupa sualnak hi timh ciammam tein tuah a tlawm cuh! Ruahlopi hna in dakaw nan tuah tawn ko khah! Cucaah keimah condom hi nan zaal chung, nan phaisa bawm tbk. ah ka sanh peng u, ka keng peng u, cun ka hmang u! A ualpi nan tuah. A cawk hna nan ningzak thulh--- a tuah hmanh pei nan  ngamh cu a! Kei cu tuante ah a thi dingmi hna kha ka chanhchuah hna i nun saunak laksawng ka peek hna. Ka hmang u mu, nan caah hawiṭha, bawmtu le khamhtu dakaw ka si hih!

4.      Hlawtmi ngaknu ka si.

Rit-hainak (drugs) phunkip ka tawngh ruangah ka nu le pa nih fanu sinak in an ka hlawt. Ka hmailei caah zeibantuk ruahchannak hmanh a um ti lo. Nu le pa nih hlawtmi le chiatserhmi cu thluachuah vanni he an ihlat, ti kha ka theih. Mitthli ceo hi ka miakmi le ka covo an si cang. Tawlṭam le tihaal tein khua ka sa. Chung sivaang le ngaihchiatnak haacang rial in nunnak khuallam ka zawh. Maw…ka dawtmi ka nuhawi hna, keimah bantukin rit-hainak cu vun tawng hrimhrim hlah u! Ngandamnak zong a hrawk pinah mi vaivuan ah a kan chuahtertu asi, hun hrial hram u, tiah kan cah hna.