Vawleicung Kumno Bik Hringtunu

Vawleicung Kumno Bik Hringtunu, 

Lina Medina

(Youngest Mother in the World)

Salai Joseph KB Thawng

A Dr. pa, Lozada he

Lina Medina cu 27 September 1933 (kum 81 a ti cang), Ticrapo, Peru ah a chuak. Medina cu Peruvian miphun a si. Lima khua ah khua a sa. Kum 5 le thla 7 le ni 17 asi ah fapa  a ngei. Cucaah, siilei thiamnak tuanbia chungah Vawleicung Hringtunu Kumno Bik ah cohlan asi. Medina cu kum 5 asi tikah apaw a thang (increasing abdominal size) ciammam i a nu le pa nih siizung ah an kalpi. Amah Medina nih cun ka safenfo, asiloah ka takvun a phingmi (tumor) asi ko lai, tiah a ruah. Asinain a siibawipa, Dr. Gerardo Lozada nih “A paw chungah thla 7 naute a um” tiah a chimh hna. A siibawipa nih cun, ai zumh set ve lo caah le siilei thiamnak tuanbia chungah siibawi thiamsang hna nih chingchiah ding le cohlan dingah Lima, Pery ah ai kalpi.

Thlakhat le cheu tluk a rauh ahkhin nau/fapa te a hrin (14 May 1939). Apang ruh, asiloah a tawtawk ruh a fa tuk (small pelvis) caah  pawhlai asiloah pawkhuai (caesarean section) in a hrin. An zenh tuk buin Dr. Gerardo Lozada, Dr. Busalleu le Dr. Colareta nih a hihsii, asiloah fah theihlonak sii (anaesthesia) an chunh hnu ah an hlai.

Khuaruahhar ngai asi mi cu amah hi kum 4 a ti ah a hnuk hi a thanglian ngaingai cang (prominent breast development), nungak tling hnuk tia asi cang, ti asi. Cun, apaw an hlai tikah a nu thilri (*) kha ngaknu tling, asiloah nutling asi cang (fully mature sexual organs from precocious puberty) kha siibawite nih an hmuh.

Medina nih a pakhatnak a fapa te cu a Dr. pa min chuankhan in Gerardo tiah ai sak. Gerardo cu a chuahka ah a pum ritzan hi  2.7 kb (6.0lb;0.43 st) asi. Gerardo cu a hung thanglian i a nu kha a far ah a rel peng ti asi. Kum 10 a tlin hnu lawngah a nu asi kha a theih. Gerardo cu kum 40 asi lio, 1979 ah ruh chung thlek/thlik zawtnak (bone marrow disease) in a nunnak a liam.

Medina nih hin a pakhatnak a fapa i a pa hi aho asi kha a chim duh bal lo. Cu pa nih, anih nih a ka sualpi i ka pawimi asi, ti kha a chim duh lo, a thuh peng. Asinain a hnu ahcun amah a hringtu a pa asi kha an theih. A pa sinah ningcanglo in ngakchia sualpinak thilri pawl an hmuh i an lung a hring (suspicion). A hnu ahcun amah, a pa cu a rak si taktak. Medina cu Mr. Raul Jurado he an i-um i 1972 kum ah a pahnihnak fapa a ngei than i a fapa cu atu hi Mexico ah khua a sa. Akonglam hi media; tadinca le thawngzamhca kip ah an rak chuah nain 2002 kum hrawng ahcun Reuters news siseh, thawngzamh dangdang nih interview an tuah len zongah a duh lo. Sifak peng Chicago Chico (Little Chicago) ti zongin theihmi Lima khua ah khua an sa. 

Hika ahhin Vawleicung Kumno Bik Hringtunu hna list zoh/rel khawh asi. 

http://en.wikipedia.org/wiki/List_of_youngest_birth_mothers