Vailamtung Phuur Dingah Biachah Asi Cang

Vailamtung Phuur Dingah Biachah Asi Cang

Hawile hna, kan hnungah ka rak thlah cangmi thawng ka hun fianh than. Chin Ramkulh Acozah hruainak in Khayaing Ohgyoke-yeemu nih Hakha ah phunmi Vailamtung phur an timhmi kongah a phuntu J.P. Biak cu voi 5 khengte zungah an kawh i tu thla 30 January hlan hrimhrim ah vailamtung nan phuur lai, tiah awder an chuah cang.

Tazacuai an timhnak a ruang bik cu “Vailamtung hi hmunkip in lang seh, ti duh ah faarkung an haumi kha, ramhual upadi (titdaw upadi) nan lonh, timi ruangah tazacuai a si. Thamada U Thein Sein sinah ca an chiah/tial cang nain atu tiang cu lehnak ca a phan rih lo.

Amah J.P. nih cun "A herh ahcun nunnak peek pei kai timh leh cu. Phuur nemmam bia cu" a ti. Cun, "Vuichip tlang i vailamtung an kan phurpiak mi hmanh hi keimah nih ka phun than lai" tiah a chimchap.

Hi, Vailamtung cu, Hakha khuathar, Carcang tlang, atu GTC chak tlang, Falam lei kalnak lam ahkhin J.P. Biak Tin Sang nih a rak phunmi Vailamtung a si. Hi tlang hmun hi Pu Thla Ṭhio lakphak dum kha an cawk i a tlangthluan ning in “Hlawhtling Thlacamnak Tlang” tiah Rev. Halleluiah Pa Ṭheu nih 7 April 2011 ah min a rak peek mi a si. Vailamtung tu cu abo laicer ah an phun in Calvary tlang, tiah min peek a si.

Hi, Hlawhtling Thlacamnak Tlang ahhin minung 100 a tlummi thlacamnak inn pakhat, minung 10 in pumpak thlacamnak innkhan 10 le minung 70 a tlummi inn zapi thlacamnak inn sak a si. Minung 15 siseh, minung 20 a tlummi inn zong an sak cuahmah lio a si.

Hi, Vailamtung cu pe hnih square ngan in asan pe 54 in sak a si. Vawlei chungah pe 12 phum a si i vawleicung ah pe 42 asang. Thir le concrete in sermi a si i kywepia benh dih a si. Hi thlacamnak tlang cu, thlacam nun a ngeitu hna, rawl-ulh in thlacam a duhmi mizeipaoh caah sermi a si.

Caṭialtu biabeuh

Kanpetlet ah siseh, Tedim ah siseh, Vaar ah siseh, Kawlram Acozah nih Vailamtung an kan phurpiak i puda (pagoda) an sak zong kha nan mitthlam ah a cuang cio lai dah. Hi kongah Human Rights le Religious Rights in kan zoh ahcun Chinram cu Khrihfa ram si hman sehlaw an biaknak puda cu an sak ve awk a si ko hnga nain hmunrolh riangmang in an kan sakhnawh mi le an kan phurpiak mi cu Kawlram Acozah nih Chin miphun cungah zeibantuk lungput le ruahnak dah a ngeih, tihi tuak ngaingai a hau cang.

A bikin, “Phun Veng Upadi”(Myo-soneh- Upadi) asiloah 969 timi Ma-ba-ta (Amyo-bata-tatana) he pehtlaihnak tampi a um kho, ti zong ruahchih ngai kan hau cang---hi kongah politician le kan MP hna zong tam deuh in cawlcangh a hau cang, tiah ka ruah.

"Kan chim voihra" ti theo, chim lawlaw ning. Kan hnung i vailamtung phuur an timhka hrawngah khan "Vailamtung phuur duhlonak minsen thut hmanh a ngamh lomi pastor le biaknaklei upa ei upa an tampi" tiah J.P. nih a ka chimh. Hi bantuk caan i ai phetchem mi le ai thupmi ram hruaitu (biaknak asiah, ramrian asiah) cu kan in bochan thai bal hna lai lo.

Laimi le Vailam ai then kho kan si lo.

Note: Acunglei thawngpaang le bia hna hi Vailamtung a phuntu pumpak,

J.P. Biak Tin Sang  nih phone in an kachimhmi an si.