“Kan Ram Ceu Ve Cang Seh” Timi Hla Zoh Ṭhannak!

“Kan  Ram Ceu Ve Cang Seh”

 Timi Hla Zoh Ṭhannak!

Salai Joseph KB Thawng

Online ka ṭhu. Umharpheng ah Dingdi Hla website (dingdimusic.net) ah ka leng, ka ngai. Pu Chawn Kio phuahmi hla “Kan Ram Ceu Ve Cang Seh” timi hla ka ngai.
Aw…cu tluk ṭhat khawh cu dah. Atuletu ka khirh. Ka ngaih ṭhan lelek. Cu hlan ahcun a hlabia zong hi kai baihat (by-heart) bal lo.
A nolhnak ceo khi ka rak thiam. Ka hun ngaih deuhdeuh i ka mitthli a tla, kei tawn ngai, ka lunghno hoi. Hi hla hi ramukbawi chan, Mirang pen chan ah rak phuahmi sidawh asi.


Asinain, atulio kan ram boruak he cuanhkep tikah atulio kan sining ko he ai naih khun in ka thei. Kan biaknak zei an rel loning, Chinram caah zeihmanh an kan tuahpiak duhloning. Hnakkar an kan tenh loning le an kan nehsawhning he hi hla hi ai naih ngaite. Cucaah a hlacaang hna zulh in keimah nih kai fian tawk le ka pilh khawh mual in ka hun zam. Hlaphuahtu le ṭuanvo ngeitu nih asullam loin ka pilh sual ahcun ka ngaithiam u, tiah kan nawl hna.

Pu Chawn Kio

Kan Ram Ceu Ve Cang Seh!

1. Chan karlak ah kan nau e tuk lo maw kan Laitlang,
Ramzung ceuter khotu vaal nan um rua lo;
A kan pengtu siangpahrang bawi chan e lio bang in,
Khuaza kan Laimi lungfak hna ruun tangah.

Nolhnak

Khuaza kan Lairam kulh chung,
Ramzung ceunak zuam u leng le vaal rual hna;
Zo cinrung khuari luaimai rawk lo ni bang tlang seh,
Iang ngei kan Laitlang hi hun cuai len awk in.

2. Chan zeizat maw vai lian nih an kan pen kan Laitlang,
Lung kaamlo thlite teirial u vaal rual hna;
Kawl cataang no sawmhlei kai awng vaalno nan tam ko,
Ho maw lung kaamlo chuncha bang dir ve lai.

3. Atu chan ṭhangthar vaal e no mi le leng rual hna,
Innrep len hna cunghlei ukpeng mangbawi nih;
Nanmah maw tinfim vaal hluan lo biakcin sang nan si,
Vung ti law kan semnak ram ceuter ve lai.

4. Kan semnak Laihri tlai cio pei kan si kan Laimi,
Sang uk cin kan duh lo mitei chan thleng u;
Zauk khuakhannak hmu tuan ko sehlaw kan Laitlang,
Khuamawt thlavaang dir ceucung kan hluan cang lai.

Cuanhnak

Caangkhatnak : Ralkap uknak asiah, ramukbawi le Mirang pennak tangah kan thaw a rak ipning. Pheumi le zeirellomi kan sining. Minauta le santlailo kan rak sining.  Sal menmen kan sining. Duhning paoh in namhnuul kan sining. Hi chan ah ramzung a ceuter khotu vaal kan um loning. Atulio kan ram sining he zohṭi tikah kan ramhruai pawl an ithup. Bochan hnga tluk in  bochan awk an ṭhat loning. Lairam le Lai miphun cu ruun tangah lungfak in khuacaan kan rel mu…

Nolhnak : Khuaza ah a ummi Laimi nih ramzung ceunak caah ṭuanvo kan ngei. Kan Lairam hi Cinrung tlang ai ṭhial bal lo bang in a hmunh lan i a dir peng khawh nakhnga zong leeng le vaal rual nih ṭuanvo kan ngei. Ramdang le khuaza dang hna he hun cuai (khingthlai le cuaichun) len awkin iang kan ngeihter chin lengmang a herh! Ni bang kan tlanter chin lengmang a herh. 

Caanghnihnak : Chan zeizat ko dah Vai lian (Mirang, hramhram pentu, ninglo uktu) nih an rak kan pen kha. Asinain, kan dai lai lo. Kan lungthli in tei kan rial rih lai. Ziah, cataangsang le thiamnaksang a ngeimi tampi nan um ko ṭung. Ziah, nan ngamh lo maw. Ziah, kan ithup peng rih lai maw. Ahodah kan rinh ti lai. Ahodah kaamlo chuncha bang a dir lai, tiah a kan zuamhcawhnak asi. 

Caangthumnak : Atu chanthar leeng le vaal hna, uktu mangbawi nih zeitin kan ram cu an pen zongah lungṭhuul hlah u. Namneh in an duhpaoh in an kan pen tikah hin pei teirial chin kan herh cu. Ziah, nanmah lawng maw mifim (tinfim), nanmah lawng maw mithiam, nanmah lawng maw thiltikho, tiah chal hna u. Nan thang chuah ve ngat u. Ralṭha tein dir ulaw kan ram ceuter ve u, tiah a kan zuamcawh. 

Caanglinak : Ziah, Laimi hna chak e thlang e, nan ti lengmang. Kei Lai e, Falam e, Tedim e, nan ti lengmang. Kan hrih le kan hram zawt tikah laihritlai pei kan si, tiah. Ziah, lungrual tein kan dir lo. Atu bantuk hramhram pennak ukphung ahhin pei lungnge tein kan dir awk asi cu. Zauk phung hmuhnak caah ralṭha tein, lungrual tein kan dir pei a hauh hi. Ziah, kan Lairam caah thlapa bang kan ceu cang lai lo maw. Muihnak chungin ceunak ah kan lut kho lai lo maw, tiah a kan zuamcawh.

Lairam le Lai miphun, Pathian nih humhim peng hram ko seh!

Note:
--------
Hi hla kong hi a luancia mi caan tampi lioah a phuahtu kongah rak buai asi. Pu Chawn Kio nih "Keimah phuahmi asi, ti khawh asi. Pi Far Hniang (Thang Kio nu) hla fung hnihthum le ka hlabia fonhtonh in a aw ka tuahmi asi. A hla aw zong hi keimah oraginal asi" ati.

Nikum (2014) ah khan CACC Laica Laiholh Khawmpi ah ka va tlung ve. Amah pumpak, Pu Chawn Kio he caan tawite bia kan i ruah. Lai Miphun Thawhkehnak Tuanbia in kan thawk i hi hla tiang hi kan phan. 

Hal : Ka pu, hi hla hi an rak buai ngaite. Nangmah phuahmi set asi maw?
Leh : "Aw, asi" ti vial lawng a ka leh. Aruang cu a ngandamnak nih a tlinh ti lo. Ai cinken khawhnak thluak (memory) an rawk dih cang. A upa cang, a dam fawn lo, a poi tuk. Biachim an fial i kaa linga a chim hnu ah "Ka thiam ti lo" a ti cuh---a poi khawhning!

Kan theih awk cu, amah Chawn Kio bia khi adik kho ve ti hi. Pi Far Hniang nih hlapi in a phuahmi asi, an ti tawnmi khi adik lai. Hlapi timi cu Thingparsang, Thington, Bawikil, Liandang le Vokchun, tbk. deuh kha an si. A tawi tete, tlang hnihthum tete an si. Cucaah, Pu Chawn Kio nih "A hla fung hnihthum le ka hlabia ka fonhtonh" ati mi hi adik lai. Cucaah, hlabia hi an pahnih an si. Hla aw tu cu Pu Chawn Kio asi i a phuahtu cu anih, asi, tiah rikhiah le kutdong sawh awk a har ngaite.

Pu Chawn Kio hi Vanzang khuami asi. November 2, 1937 kum ah a chuak. Hakha khua ah khua asa. Caṭial le caleh hi a rian asi."

Pi Far Hniang hi Hriangkhan khuami asi. Kum 90 leng asi cang, atu tiang a dam rih, an ti.

 http://www.dingdimusic.net/3-hla/_hlathim_ram.php