Ka Ruat Tawn

Ka Ruat Tawn

Salai Joseph KB Thawng

Khrihfa mi nih kan zumhning ah ‘minung’ cu Pathian kutchuak (handmade) kan si, ti a si.  Evolutionary pomning ah ‘zawng’ in aa semi kan si an ti ve. Chim duhmi cu kan ‘semnak, kan ratnak’ kong kha si loin “Nu paw chung in a chuakmi ciocio, taklawng in hrin a si ciociomi minung kan sinak aa dan tukmi kong” tu hi a si deuh.

Zeiruang ahdah minung ciocio, sifak deuh, mirum deuh, a thiam deuh, a thiamlo deuh, ai dawh deuh, dawhlo deuh tbt. in kan sinak aa dan lengluang hnga” tihi nan ruat cio tawn lai dah. Hi kong hi cu a tawinak cun Bible cawngmi nih an theih bik hnga. Pathian hi duhdanh, thleidan a ngeimi Pathian (partiality and favor God) maw a si, asiloah minung vialte ruangte in a kan dawtu Pathian (impartiality God) dah a si, timi ruahnak ah Khrihfa ciocio hmanh kan ruahnak aa khat lai lo, zumlotu chinchin cu chim hau lo a si. 

Ka chim duhmi a si rih hoi lo. Acunglei pomning le hmuhning khi hei chia rih usih. “Mirum le sifak” kan ithlauning hi zoh hmanh. Mirum nih ei cawk loin an ngei, hman cawk loin an ngei. Hotel ah voikhat rawl na eimi man khi sifak nupa nih thlakhat chungah a hmuh khawhmi a rak si lo. Kutdok (beggar) chinchin cu chim a hau lo. Mirum nih kan saduhthah cu rum chinchin a si. Sing le sang in phaisa ngeihnak khua kan khaang. Sifakpa nih aa ruahchan mi cu pawkhim khawhnak ceo le arfi le thlapa a lang kholo mi inn pakhat hna khi a rak si men lai. Zohchia loin thilpuan iserh khawh ve hna khi a rak si men lai. Aruang cu sifak a sinak thinlung nih cu nun le sining cu a rak lonh kho ti lo. Sifahnak sal, a dongmi sifak khuaruahnak thluak chungah a rak pil cang. 

“Sifah hi ningzah awk a si lo, cu sifahnak in chuah itimh lo tu hi ningzah deuh awk a si” timi mifim bia an chim ṭheo. Asinain, adik, ahmaan dih lai kho lai lo hih. Aruang cu acunglei ka chimning khi a si. Sifak cu kan khuaruah khawhnak le kan thilti khawhnak, ka tuah khawh ko lai tiin izumhraihnak (self-confidence) kan ngeihmi a rak tlawm tuk. Aruang cu kan si a fah ruangah a si i cun, cu ruang lila ahcun kan si a fahnak a rak si hoi.  

Sui zuarnak  le thilpuan zuarnak ah rian kan ṭuan nain kanmah cu ṭet fimfiam in kan ṭeifiak. Computer le thil dawhdawh zuarnak ah kan ṭuan nain kanmah nih cun kan ngei kho lo. Kutzung a thiammi, lettama (handicraft, carpenter) kan si nain kanmah inn le lo cu arfi le thlapa an lang. Mirumpa nih fawi ngai in nifa a tonghtham mi kha sifakpa nih a thih hlanlo cawng hmanh sehlaw a thiam ti men lai lo---a tlangpi in cuanh tikah. 

Asiah cun, Khrihfa buaktlak nih kan pomning ah “Pathian hi thleidan a ngeilo mi Pathian a si” ti cu kan pom. A si kun ah, hualvan, vanchiatnak, vanṭhatnak, timi cu maw kan pom rih kun hnga. Acunglei sining tete kongah a tlangpi in hun fun ahcun “zeizei ti lo tein sifak kan dawt hna awk a si. Kanmah nakin a ngeilopa, a thiamlo mi nu, a derthawn mi pa kha kan kehchan, karceh, zawnruah hna i kan tuanmawi hna awk a si ti khi a si hnga.” Asinain, hi kong hi nihin tiang ka ruat peng. Pathian cungah mawh a um hrimhrim lo. Zeiruang ahdah hi tluk in kan sinak aa dan. Cozah maw kan puh lai, kanmah le kanmah dah kan ipuh lai---ka ruat ngaingai tawn…

(Note : Deirel Cazual ah rak ṭial cangmi cabia tawi a si)