Father’s Day Le Fale

Father’s Day Le Fale

 

Father's Day thawktu

Salai Joseph KB Thawng 

Voikhat cu Hringtu Nule Ni ah Sonora Smart Dodd cu biakinn ah aa pum. A lung a suk ngai caah “Hringtu Pale Ni (Father’s Day) zong tuah ve awk a si” a ti. Cucaah June thla ah a chuakmi a pa, William Smart philhlonak caah a rak tuah. June 19, 1910 ah Washington peng, Spokane (USA) ah avoikhatnak Pale Ni cu an rak tuah.

USA President Calvin Coolidge (1924), President Lyndon Johnston (1966), President Nixon (1972) hna nih “June zarhthumnak cu Hringtu Pale Ni  a si” tiah minthutnak le hnatlakpinak an rak tuah. Sonora Smart Dodd te hi chuahpi unau 6 an si. A ngakchiat tein a nu nih a thihtaak hna caah a pa nih a hmeihpi hna.
Ramchung ral (civil war) a thawh lio a si caah pawcawm kawlhawlnak ah an  chambau ngaingai. Cuticun changchia ngai khin khua an sa. Cucaah, a pa nih a hmeihpi hna nak kong ruat in a rak tuahmi a si.

         

Bible ca nih nulepa upat a kan fial. “An hringtu nu le pa bia na ngaih (Pro.23:22a) ahcun ramchung ah saupi na nung lai (Eff. 6:1:3)” tiah a kan ti. Amah belte fale nih pale (nu le pa) upat cu kan rian a si bantukin nu le pa zong nih fale cungah ṭuanvo kan ngei ve. Bia chiakha in chawnhbiak le cawnpiak si loin Khrihfa ziaza he cawnpiak le ṭhanter a herh (Eff.6:4).  Fale caah bochan  tlak pasalṭha siding ṭuanvo zong kan ngei. Kan fanu pafa caah (midang ca tiang a si lo hmanh ah) aa dawh bikmi pa, a ṭhawng bik pa, thiltikho bik pa, a fim bik pa, hruaitu ṭhabik pa, kan si khawh ding zong hi pale ṭuanvo a si ve.

           

Kawl acozah tadinca (the mirror) khi kan rel cio ko lai. Fa sinak in hlawtnak thawngzamh tete a um lengmang. Khikhi aruang a tampi ko lai. Cun, fa sinak in hlawt awk tiang in a khokkhawlol tukmi le a hohak tukmi fale kan tlawm ve lo kho. Asinain, mah thi mah sa in hrinmi fanu fapa koko a hlaw khomi nu le pa cu mawh kan phur ve hnga. A ngaingai cu fapa tlaupa kha a langtlang hmanh in a pa nih a rak cohlan/ngaihthiam khawh ko (Luke 15:20b).

       

Cheukhat nu le pa cu fale kan chawnhbiak hna tikah bia dawhcahlo chim kan hmang. “Fa bator, fa santlailo, fa ṭhahnemlo, fa luakchuak” tbt. in bia chiakha kan chim tawn. Mah thisen in hrinmi fanu fapa koko duhpaoh in kan tuah hna ahcun cucu hmailei an thluachuah kan phih bantuk a si. Aruang cu kan chimmi theitlai kan zuun te lai caah a si (Pro. 18:21).

      

Cheukhat fale zong nih kan ipalh ṭheomi le holh dawh lo kan chimmi a um ve tawn. Mah nulepa koko kha “Mihrut pa/nu, zeitheilo pa, chantiluan nih a kaltaakmi pa, kapa tepawl hi cu nan theihhngalh a tlawm tuk eh” tbt. chim a hmangmi hna kan um ve ṭhiamṭhiam. “Na pu zawm hlah, na taw sawng lai” timi khi kan philh sual tawn. Cu bantuk fale cu hawi nakin thluachuah kan hmu deuh bal lai lo.

        

Fale a daw lomi nulepa an um lo. Amah belte, Pathian sinin kan hmuhmi ro sunglawi an si ti hi kan philh sual tawn (Psalm 127:3). Cun, fale nih nu le pa upat ding hi kan tuah hrimhrim ding a simi nawlbia hmaisabik a si kha kan philh sual tawn. Thisen in a kan hringtu, fale caah nun ngamh in rianṭuantu, a suur a haan hrial loin fale caah rianṭuantu, pale hna Pathian nih lunun ngandamnak le nun khuasaunak  thluachuah in pe ko hna seh. 

(Note : Deirel Cazual (2013) ah rak ṭial cangmi cabia tawi a si)