Ka Phuang Manh Lo

Kaan Dawt,

Tiah Ka Chim Manh Lo

Salai Joseph KB Thawng

Mitsir tein ka ven caan a sau cang. A min ka hlat lengmang nain ka thei lo. A E-mail, a facebook  address le a phone number theih ka duhnak hrim a sau cang. A min ka thei lo, a sining ka thei lo nain ka theihmi pakhat a um. A thlite in ‘dawtmi’ nih ka thinlung chungah hmunhma a laak tu cu ka theih. Sianginn kan kai pah, kan ṭum pah ahhin ka ngia. Nikhat ah voikhat tetal ka hmuh lo cun ka si a vaang, ka hmal a hma.  Ka hlam tuk. A zaw i si hnga maw, zeiruang ahdah tuni sianginn a kai hnga lo, ti khi lungzuur ngai in ka ruat tawn.
 

Canteen  a kil lei te ah a hawinu he lemon juice an ding tawn. A thlite in an pawngah ka va ṭhu ve tawn. A peel phun tein ka peel hna. An ka theih sual lai ti hi ka phang tuk. Asinain, mitsir in rak i ngiat veve hrat ahcun mit hi ruahlopi in aa tong lengmang. Kan mit aa ton caan ahcun umtu-awkte ka thei lo. Ka lau tuk, ka coffee dinmi kaa haak. Minih vun meet len awk khin ka mual a pho hnik tawn. Voikhat hoi hna cu, dawr hngaknu sinah a lang khin ‘lemon juice’ tiah kan pahnih in voikhatte ah kan cahṭi. Kan aw aa rual tikah kan lau, kan izoh i kan merh (mirh) veve.

Pasal, Laikhal velobang. An pawngah ka ṭhu cang lai. Atu hnu citcet, can rem um seh. Ka ngiatthlainak le a thli in ka zulhkhalhnak caan zong cu a sau remruam cang ka ti. Asinain, an pawngah ka va ṭhu cang lai i, zeitindah biahram ka domh lai. Zeitindah bialam ka sial in ka vah lai timi ka thei lo. “Kaan duh” tiah dairek in chim ning law tah, mihrut a ka ti lai---a min hmanh theih rih lomi pi cu. Asinain, ‘kaan duh’ ti chim nih a ka hiar tuk. Buhrit lio rawlbeel pawng aa helhum mi ko khi ka lo cang. A ka pah tuk, chim zokzok ka duh. Asinain an pawngte ah ka va ṭhu cang lai ka ti  paoh ahhin lawi an itimh leisang a si peng.  

Voikhat cu amahte lawng a ke in sau nawn a rak kal. Ka hun phak i, nangmah lawng ma, cycle  cungah rak kai ve ngat, ka ti. Aw…kaa lawm, a ngah ko. Huamsam in ka ra ko lai, a ka ti. Ka fial lengmang nain a duh lo. A ti awk ka thei lo i ka ṭum. Ruahlopi in ‘naa dawh tuk’ ka ti sual. A merh, a ningzak nawn i alu aa khun. Ah, zeibia ka chim manh zong kaa thei huaha lo i ka bia ka peh kho ti lo. Holh-aa mi bang ‘um..aa..aw…’ ti vial khin ka holh. Awke, atu hi can rem a si ko lo maw cu ka ti. Ka thin hi dukduk in a tur. Ka thawchuah kaa remh. Amah belte, lam lei lawngte cu a zoh, a mit a thlirh. Um…, zeitindah ka thawk hnga ti ka ruat. A chim awk ka thei lo. Uite ekchuak khi ka lo. A min ka hal lai ka von ti bakah tlangval pakhat nih a von kan phanh. 

U Ceu, U Ceu, na phan cang ma, sau tuk pei kaan hngah cu, a ti. A cycle cungah a kai. Ka kalchung lai ti zong a ka chawn lo. A zoh hmanh hi a liam laite lawngah a ka zoh. Ka thinlung kuai dih hnik aa zaal. Ka thin zong a hung, ka cycle lehlam tluko in ka lamh. Ka lu fakpi in kaa domh. Aa…, zeiko dah a cang? Ka ṭahha a mang, ka ṭap kho fawn lo. Sivanghnak le ifianlonak in ka nun a khat. Cu ni cu sianginn zong ka kai zuam ti lo. Inn lawi zong ka zuam lo. Voikhat te hmanh ‘thinlung tuaitu’ a ngeimi ka si ve lo tikah ka tuar khun. Ka voikhat hmuhnak in ka duh. Mang chung vawlei thar ah a ka kalpitu cu amah, min theih lo dawtmi lawng hi a si rih.

**********

Thla 3 tluk a rau cang. Ni le caan an hung liam. Min theih lo dawtmi mui a de ti lo. Ka mithram cat hnik in ka ngiat nain a muithlam a leng ti lo, ṭiotaakmi khua bang ka nun a king, ka thlaivai a kiang hrinhran. Hawi sin ka um zongah ka thlaivai a kiang, ka li a leng i ka um a har. Amah kong ka ruahnak ah ka ngang. Minih an ka chawnhmi zong lau lengmang in ka theih. Ka ruahnak hi a thlaampi lawng a si. Ka umnak hi vawlei a si zong ka philh. Zeiruang ah, ti cu hal hau lo a si. Min theih lo dawtmi nih mah tluk hin ka thinlung ah hma a hmuah. 

Thachia ngai in canteen ah ka ṭhu. Ka lemon juice  hrai chungah a muithlam a cuang. A ṭhut tawnnak te cu zialmal tein ka zoh tawn. Merh nawn te khin a ka zoh. A lemon juice hrai tlaih pah khin a mitsir tein a ka zoh. “Kan pawngah rak ṭhu ve. Zaanlei sianginn ṭum cu na ka hngak lai lo ma” a ka ti. Kaa nuamh tuk lioah, seihkuzin (dream) an si ṭhan tawn. I relh lo ngai le i lungsi lo ngai in caan an liam.  

++++++

Salai KB Laikhal, ti awthawng ka theih. Ka von iher i min theih lo dawtmi a hawinu te a si. “Cikhat biaruah kaan duh, a ngah maw” a ka ti. Ka lau ngai, kaa ngaih pah, ka ṭih pah. Ka ṭhutnak kaa remh i, aw a ngah ko, zeitin? “Nangmah pa hi kan hua tuk” a ka ti colh. A hmai a sen, a ṭap hnik bantukin a um. Ka lau tuk. Zeidah a cang? Sorry sorry, na chimmi kaa fianglo, zeiruang ahdah na ka huat i? “Kan hua tuk, kan hua tuk” ti dahlo cu zeibia hmanh a chim kho ti lo. A mitthli a hai i a hnaphrawh thawng a thang chin lengmang. Ka lau tuk i aw…dawtmi hi pakhat khat a cang i a si lai, ti ka ruat. 

Caan tlawmpal hnu ah a mitthli aa hnawt, a mit reng nawn in a ka zoh pah khin “Ziah, Suite kha na zoh sawh. Mah tluk in an duh ve ko mi. Zeiruang ahdah, kan hnunglei a U Ceu nih cycle in a kalpi hrawnghrang ri khan sianginn kai loin thla 1 renglo cu na um. Suite nih an hlam tuk si. Ziah, mah ni zaanlei zong kha mah ti taitai khan zu na din. Lamlai ah na ril i pei Suite he nan inn tiang kan in thlah kha, naa thei ti lo maw. Na pasal lo tuk ai. Nu nih cun kan in duh hna nak cu zeitindah kan phuan hmasa lai. Misualpa, kan hua tuk, kan hua tuk,” a ka ti.

Ka lau tuk ve. Ah…, sorry bak si, ka ngaithiam u, ka palh. U Ceu a timi kha a boyfriend ah pei ka ruah cu, a unau a si ka thei lo cu ta. Atu Suite cu khoidah a um, hmuh ka duh, tiah lau lengmang le ihnawh ngai khin ka von hal. A ṭah bu cun, “KB…B ṭhalo, ralchiapa, misualpa. Atu hnu pi ahcun Suite umnak cu na ka hal. Na mang hmanh ah na tong kho ti lai lo” a ka ti. Ziah..ziah, zeiruangah. “Kan hnulei sianginn na kai lo karah khan pei a duh naloin a nu le pa nih parcel in an kalter cu” tiah a mitthli le a hnapduk he a ka chimh. “A kal lai zaan cu zaankhuadei in pei Suiṭha nih a sakmi hla kha kan mawfa cun kan sa i mitthli he zaankhua kan dei cu, misualpa.”

Mitṭhep kar ihmuh lo hmanh, kaan ngaih tawn kha, zungzal ṭhen ding cu, ka ruat kho hrim lo ṭahiang, tlaihchannak  hlei in peek awk nih na ṭha ṭung lo, kaa mit-au tal khin dawtnak, hi hmu thiam ve law, kei kan dawtnak hi na cohlan ko hnga…

Nang le kei ruunkhat lengding ahcun ṭahiang, dawtnak bia kaakhat te, ka caah phuang ve law, dawtnak fingrei a cat hlan ah ka dawt, on cia mi thinlung innka chungah ṭahniang, kinglo in hung lut law, phuan ngam lo dawtnak sung, thinlung chungah na ca ka chiah ko, ṭahniang…

 Thaizing cun mu kei cu mithmuh lo, rili ral ah, hmuh bal lo vaal ṭang cung pom dingah lung siaherh in ka kal lai ka dawt, caan liam hlan ah na za ka chan law, ṭahniang... 
 

Ka lau tuk i zeibia hmanh ka chim kho ve ti lo. Thingro kung bang ka ngang. Ka nunnak le ka thihri chungah zukzuk in lungfahnak an i khumh. Ka lung a mit, ka khuaruahnak chunmang a mui. A pingpalo ah ka nunnak aa chawk. Ka thinlung le ka khuaruahnak thluak an vaivuan. Hruhnak nih ka nunnak cu a uk. Zei thawng hmanh hi ka caah luri men an si cang. Aw, caankhat lio dawtmi kha, a liam cang hnu lawngah a min ka theih. Caan le thil sining nih a peek lomi vawleicung ah karkhat hnu karkhat in. Dawt, a tlai cang mu. Kaan siang hrim lo, kaan ui tuk e. Dawt, ka ngaithiam mu. Kaan duhnak hi na rak i theih ko nain ka phuan ngam lomi le thil sining ruangah ka phuan manh lomi ruangah atu cu liral ah dang kan hram cang mu.