Laikhal Biaphongden (1)

Laikhal Biaphongden (1)

                                 

IT Chan ah Laikhal Tuhmui

 

Salai Joseph KB Thawng

Biadomhnak

Laikhal biaphongden ka von ti huar. “Biasawngtlorh le biaphongden” hi an sullam aa khat men lai, Laiholh ah.  Biaphongden ti cu: “Lungchuak bia chim, iruah, capo saih, le mi kong zong a caan ah hei ceih pah khi a si ko.  Biatung zong a kenkip le kaangza (aa kuangkuah lomi)  vanmi khi a si ko. Cu tikah ruahthiam kan hauhnak a tampi lai. Tutan  Laikhal biaphongdennak ah  aa telmi  hna cu : Salai Zai Ling Dun, Enoch Luai Lian, Salai Buan Sang, Habakkuk Tei Kap le Salai Hrang Khar hna an si. An biaphongdenmi  a tam, a cheuchum com in ka von in zamh ve hna.

IT Chan Ah  Laikhal Tuhmui

Zeifawh zeifawh, mai an tuh i zei ‘ruang’ ahdah zil a tlai, tiah Salai Zai Ling Dun   nih min a hlen hna. A fawi tuk ko hen cu, maicii ah an ruahmi kha zilcii a rak si tinak a si ko hme cu, tiah Salai  Hrang Khar  nih. Si hlah…na palh dipdep. Zil ‘ruang’ ah zil cu a tlai ko, ati hna. Laikhalpa, tuhmui le naamtong he lawng khua a sa komi Salai Dun minhlennak hi cu a fawi ve lo eh, tiah  Habakkuk Tei Kap nih. Ziah, kei hi Laikhal nan ka ti le nannih hi Laineem maw nan si. Sangra le kawmsolh tha, Behrum le mairuun in aa cong mi na si cio lo maw.  H.Teite, ziah Anthur tihaang um hlah sehlaw khoika tihaang hme na banh lai. Laikhal si kan duh lo, tiah Sandahpiah sihlaw President Thein Sein le Daw Aung San Suu Kyi  an hriktida a thak lai maw aih,  tiah Salai Dun  nih. 

Salai  Dun : Chan a vai i thleng som ledakaw a va si ko. Zoh hme, kan  cangai khorhnak kut kha computer tawngtu ah. Kawmbawr kan  kepitin choi koin kan  rak chuih tawnmi atu kan chuih ti maw. Chunthlungbo Lai khuhsi in sepawlaih, vegas le  London ah. Aphaw aa dokmi balasa-oh le cil boih hnu lawngah aa ṭial khomi ballpen in E-mail (Computer)ah kan ithleng. Sehla muici phun 5 in ṭhitmi(belhmi)  ka Tuluk  tawhrolh tawtlek in Jeans bawngbi  ah. Meihol in tappi ah cakei lem (zuk) ka rak  suai tawnmi zong atu cun Microsoft cahnah cungah. Kum 9 le 10 chung  kaa danhmi Sin-ce le min-ce kedan in Arrow-soft ka ti, Meldani ka ti, Walker ka ti ko teh. Commando butkedan in Biakinn lam kan panh ti maw,  Half kedanbut ṭheo kan ti ko cang teh. Keimah pat cu ziah Laikhal nan ka ti, Laineem cio pei kan si ve, tiah. 

E. Luaite  : Si e, chan cu dawh aa let tuk cuh. Ngapih meh nih maw a rak ka  simh deuh hnga keimah nih dah ka rak simh deuh hnga, atu ahcun ciat-ta, wat-ta ka ti ko lo maw. Ka Kawlholh thiammi dihlak fonh in ka chim tawnmi, ‘chit-de’ in Korea holh ‘sa-ra-nge-yaw’ ka ti ko cang teh. Mirangholh “Love” timi ‘lo ve' tiin ka rak rel tawnmi zong a tu ahcun ‘ I love you! ’  ka ti ko cang teh. 

Salai Buan : Si bak, al awk um lo. Keizong motor aw theih in mengkhat hlat tiang ka rak don tawnmi le motor dawi i ka rak i phar tukmi atu ahcun, taxi in hme ka umkal ve cang hi. Farthing, a hri pa 4 in sihmi ka ṭingṭang in zaankhat voi 7 khuatung ka cuul i aw ṭhat ruang si lo, aukhuan ruang i mi an rak i hngilh khawh tawn lomi  in  M-3 ka ti, KTV ka ti, Karaoke le Nightclub ka ti ko teh. Buhtlang cawi in ceep cawh le sukter ka rak hman tawnmi in TV-Game ah kaa thleng ve ko cu mu.

H. Teite : Um, a si hrim ko. Salai Dun, sual kan in phaw lo cu a! Amahbelte,  Chantiluan a ran tuk lawng a si lo cuh. Kan kum le khua zong cu dawh lopil nih a zawh ti ve lo cuh. Cuti ti ahcun, keizong hi aw,  mangkhawngdo le pheikalh tunh lawng pei ka rak thiam rua tinalakah  beer hrai thlet ka thiam tuk manh ning---a phul ka phulter lo.  Ahawl kok khomi zuhui fati  hrai in beer hrai (thlalang hrai) ah kaa thleng ko hi mu.  A hlan Thantlang Video zung  ṭuang-pya-ṭaan  le Happy  Video zungah  Vandam zatka  ka zoh ti i an rak kan chorh  tawnmi kha atu, Yangon ah  “3-D  ka ti, Thamada  zuksin, Nay Pyi Daw zuksin, Seh-sawng zuksin e, Tone zuksin  e, Nowaday zuksin zung e”  ka ti ve ko cang hme hi, kaa thleng tuk ve ta. 

Salai Khar : Ka chim lai lo ka ti nain. Kan chan ve lio cio pei. Kei cu hrik le ṭhah kha a ka neng cem eh. Kan khua ṭhing tumpaang par in rizai tuahmi le babucawng puan kha cu hrik le ṭhah nih an rak duh bak khah---kum 1990 kuapkap, A.D. 2000 kum hlan kan ti lai. Khaap kua vanlongbel bak in dawh puan he ṭhah he kan rak ciar ṭhup ko khah. Ka pitar a rak fel ngai le aa ning dom. Atu hi teh hrik le ṭhah cu kan hmu ti maw. Chemical in thilser a si cang tikah cu vialte cu an tlau cang cu mu. Sofa cungah dakaw kan ṭhut le kan ih cang hi mu.

Biadonghnak
 

Elaw, ka duale lawiding kan si. Biaphongden hi cu zeikhuate ai thei ti lo hih. Tutan cu hi vial hin za rih ko seh, khua nih a kan muih phuat ai. Tutan kan biatung cu “ IT Chan Ah Laikhal Tuhmui” a si ne. Chantiluan dawi khawh kan ti lengmang mi hi a ngaingai cu “Mi nawlcawn thiam” khi dawh a rak si ko cuh. Kan kokek Laikhal sinak cu a tlau lai lo e, nain  kan nun hi Laineem nun a si awk a simi chan a si. Kan tuhmui cang nawn tein kan ceer deuh i kan rawh  a haumi chan kan phan. Khah, zaanriah ei thaw hna u. Tuzaan cu nungak  Iangku te inn ah kan i tong te hna lai cu. 


(Note: Muko Mekazin ah rak ṭial cangmi capar a si)