Bus Cungah Angkihring Nute

Bus Cungah Angkihring Nute

Salai Joseph KB Thawng

Salai Zai Ling Dun nih weekend a si ai, sabuti kan dangh hna lai, ti a si. Hlaing Thiri, Bingbir Buti dawr ah kal kaa thawh. 46  Bus stop khin 202 (aa ṭhu) sau-ialte ka hngak. Kala pitar pawngah ka hung ṭhu. A rimthla cang cu amak. A tanakha rim nih dangkhat, a chiti (sathau) thuhmi nih dangkhat, a thlan rim nih dangkhat he, a chap lo ah a zaichih rih. Myoh Okkala-Awain kan phan. Angkihring nute nih “tamaing lansone yoh lar” tiah. Bus spear nih “yoh de, yoh de.”A hung kai. A thil a tam nawn. A handbag pinah a kut in thil tamlakte aa thlai. Ka ṭhutnak ka kianh. Nungak a si ai ka ti. Cu hlan ah, Lukawngpa, puansen aa aihmi hmanh ka kian lo cu mu. Angkihring nute cu a muisam ka zoh ah Laimi bak. Laikhal mui cu a keng lo nain Laineem mui a keng. A thuamthil zoh ah mintami dekmak te ko alo.

A skirt kha khaapkhat hrawng a si lai, ka porh lo. Angkihring aa aih. Ee, Laimi pei a si ve hi, ti phun khin a ka zoh ve, a ka mirh hei ti ko usih. Ka chawnh deng nain, kaa sum ṭhan hmeteh. Voikhat hmuhnak rumro cun ka ti. “Laan-wa” hrawng kan phanh ahcun, Bus spear pa nih a hnulei ah an kan ben lengmang i kan vun i hlat ngai. Nain, amah rumro ka zoh. Amah ve zong cu, khoidah a um, ti phun khin a vun i mer lengmang ve. I ngiat veve hrat ahcun mit hi aa tong duh ngai cuh. Ka lau pah deng tawn. Ziah, Kawl nih “yin khung de” an timi khi ka si ko ṭung tu hi.

Thil pakhatkhat a philhmi ka lo. Kaa nuam lo, ziah hme ka chawnh ko lo ka ti. Seihku tampi ka zin manh. Voikhat hmuhnak ngaite in. Amak ngaimi cu, cu zing cu angkihring kaa aih ve ngelcel. “Tamaing lansone” ahcun kan ṭum veve. Sau nawn bus kan hngak hoi. Bus hngakmi kan tam pah i mi karlak khin ka bih pah tawn, a ka bih ve. 157 special bus a hung choi i kan kaiṭi hoi, ṭhutnak pahnih te bak a lawng. Amak ngai ko ti u. Ruah loin kan ṭhuṭi ai. Laiholh in chawn ning law, Kawl rak si ziar sehlaw. Ka Kawlholh peipi hin chawn ning law teh, Lai rak si ṭung sehlaw, ka buai cang. Salai Vei te pawl cu si hna sehlaw, sahngar ar nam in an nam hnga pei, tiah.  

Ok! A thuamthil cu Lai muisam a keng ruam lo nain a muisam cu Lai alo ko dakaw, tiah. Khoi ahdah na kal lai, tiah. Zeitin fawh a ka leh na thei maw? A ka let lo, hahaha. Eheu…ziah, cu ne cu. Zeidah na ti lai, tiah Laiholh in ka key ka vun thlen. “Camah thukha tua me” a ka ti. A hal nolh awk ka thei lo, aw ee, ka ti. Phundangah ka ruat hlah law, Laimi na lo ngai, tiah in ka vun chawnh ṭhan. Cu ngai cu dah, a mirh telawng a ka mirh hoi. Kaa chuahsual ngai ti u, a ka hloh bak. Thukhah bus stop ahcun kan hung ṭum. Kan kalnak aa dang cang ai. Kaa relh lo taktak.

Salai Zai Ling Dun le Salai Buan Sang an rak ṭhu. Ka hirha a kok lo ngai. Buti ka ei zongah ka khengah a mui a cuang. Uite ekchuak ka lo. Zeidek philh ning law cubang, ka siarem lo. Aa dawh bak cuh. A pungsan ṭhatning hi amak. Hi kong hi Salai teho ka ruah hna hnga maw. Ruah hlah, an ka nehsawh salam hnga pei. Zaanlei suimilam 3:00 pm a si cang. Lawi ko ne ning. Bus ka bawh. Ka lungthli in, angkihring nute kha a rak um ti hnga maw aw. Bus pakhat i citṭi rih sih law,  seihku tamlakte ka zin hoi. Lampi thluangthluan  angkihring nute ka ngia. Amui a de lo.

Myoh Okkala-Awain kan phanh ahkhin a langtlang in angkihring nute pakhat ka hmuh. A skirt a tawi ngang ve hoi cu awh.  Eheu…a si cang ko khih, ṭum pei ka hauh ne lai hi. Ka thawchuah aa su. Ka ṭhutnak ka hun i remh. Ka vun naih deuh tikah, nemman bia. KTA Company rianṭuanmi nute a rak si deih. Ka ingpuang deng, mi theih lo hngaan cu. Inn ka phan i amah lawngte ka ruat. Kai mang phanh phah. Ziah, cu bantuk thil cu dah. Bus cungah cun voidang zongah angkihring le skirt tawi tete aa hrukmi cu ka hmuh lengmang ko ṭung hna hme, bia kaa hal. Zarhhnih chung cu a zuun in ka zaw, sii belte ka ding lo☺.

++++

Avoi 66nak Chin Miphun Ni (Feb.20),Yangon cu Hlaing Mingalar Hall ah an tuah. Salai tonglo pawl (Salai Zai Ling Dun, Salai Buan Sang, Habakkuk Tei Kap le Enoch Luai Lian) he kan kal. Taxi mawngtu pa nih, Sai Thi Sai hla a vun chuah. Khi…kan pale chan lailing hla a si. Cucu, “Ka voikhat hmuhnak in ka thinlung a tur e, ka dawt vate aw…” (Takha tuaih daneh yinkhung mihde, chit hnget kale ye) ti a si. Elaw, loh bak. Aho dek ka mitthlam ah a cuang colh. A min theih lomi, a kong theih lomi. Cucu, caankhat lio bus cungah angkihring nute. A ka ruat ve hnga maw. A mitthlam ah ka cuang ve hnga maw. A ton tah kan itong ti hnga maw.

Hall chungah cun a laimacir ah kan ṭhu. Ruah loin ka hnu ka hun imer. A hnulei te ahkhin, samkir nawn, angkihring aa aihmi, ningzak nawnte khin nungak note pakhat. Eheu…, ziah, angkihring nute. Thla 5 chung ka thlaumi nute. Amah bak a si ko. Kaa lungsilo, voithum tiang ka hnu kaa mer i ka zoh. Angkihring aa aih hoi ko e, amah bak a si ko. A skirt hrim cu kan hnung nakin a tawi deuh rua tu kha☺.  Ziah, Laimi a rak si ko ṭung. Kan hnung kha ziah a ka chawnh hnga lo. A ningzak i ma a si hnga. Ka umtu a fak hoi cang. A tawza mi bang ka ṭhutsia a rem ti lo.

Ruah loin, ka zoh lo karte ah a rak lawi. Ka ngiat len cu ka hmu ti lo. Pasal, dawi/kawl ning. Ka hun kawl i bus stop ah ka phanh. Ok, good! Cakei Cakei. Nangmah telawng maw, na ṭin colh lai maw, tiah ka vun hal. “Hoh, camah ingpian maluh” tiah. Eheu, Kawlholh ṭheo. Laiholh in ka chawnhmi tu cu a theih hoi.  Na thinhung hlah law, Lai na si ko lo maw. Kawl le Lai cawhhrup, awpei nawn khin. Si, camah Lai bar. Atu hi Laiholh na thiam rua lo. In, keimah Chinlu nalede, ma pio tet luhbar. Aw….si khereng. Laiholh in holh lengmang law na thiam te ko lai cuh. Kanmah kokek holh le ca, nunphung hna hi kanmah nih kan uar lo ah aho nihdah a hung kan uarpiak rua hnga. “Hohde, era kahrawh hmaande, keimah le yah aung gyusa  hma bar.”

Bus cungah kan hung kai. Biahal ka duhmi a um. Ka hal ngam hoi lo. I tong ti lo sual sihlaw, zeitin. Amin, a umnak sang le a cawnmi hmanh ka hal hmaisa lo. Caanṭha dang um lo sual sehlaw. Ah, hal hau ko pasal----Laikhal. Hi biahal hi tlangval nih nungak pakhat cungah kan leiba a si, kan rian a si ko lo maw, ka ti. Phundang ah ka ruat hlah law, atu hi boyfriend na ngei cang maw. A mirh nawn i a ka leh lai kaa ngaih ngang. Hehe, me yin phi yah hma bawh, a ti. Ka ngei ko. Atu zong keimah yisa/chittu neh ching neda. Eheu…loh bak. Kai hal sual cikcek. Ka bawh lonak ṭum in a chuak diam. Ka zenthong sanpikuat kaa thun ka timi pingpalo. Ka hawipa, Lai Mang lebang sisehlaw anu… chu, a ti diam. A peh awk ka thei lo, ka holh a aa. Bus cung cun ṭum diam ka duh. Nain, ka ṭumnakding  ka phan laklawh lo. Uite ekchuak bang kai seng lawlaw hmeteh. Mi fanau, Laikhal velobang. VCD ṭhalo mi taan in ka taang, ka ṭiik diam. Tissue um hlah sehlaw, ka thlan nih vate ti a tiat phah lai☺. Ka hmai thikhal a chuak. Salai Zai Ling Dun siseh ca, arpi titi lio in aa thlathloh hnga pei, tiah. Salai Buan Sang siseh ca, a guitar a sop phah lai. Enoch Luai Lian siseh ca, an beelkheng a himbawm hnga lo. Habakkuk Tei Kap siseh ca, an inntung pathum a bul lai pei, tiah. A fak bak teh. Hi tluk ruahchan vemi sinin cu bia cu.

Myoh Okkala-Awain kan phan. Ataktak ah, angkihring nute cu a boyfriend nih a rak hngah tak ko ai. Ka vun zoh cu, Kawl hmanh ah ti cawh lo Kawlsit bak a si ko. A baan ah ṭialṭhuai khin rul le cakei lem aa suai tung. An iton lecangka an mithmai. An hei iduh khawhning. Ka lu arbawm a tia colh. Ai, ziah cu Kawlpa he celngel cun. Zetinhme thil a si, amak ko e…. 

+++++++++++++ 

Aw...pawngkam ruangah Laimi kan irawk tuk cang hi ta. Kan i lettaling dih ko lo maw tu hi. Laiholh hmanh kan thiam lo i Kawlpa he hna hi tluk in nunnak lam an zawh cu aw. Ka va ui hringhran dah, Lainu dawhte. Kan nunphung le kan holh le ca, kan miphun a hmai zeitinhme kan khah. Laimi si ka duh lo a ti mi nan kut thlir u, ti sisehlaw  a thlirding kan tam ko cang lai lo hme maw.  Ziah, Laimi, cu tiang dirhmun kan phanh lai cu dah kai zumh khawh lo. Duhnak hi ramri a ngei lo kan ti bu ah, cu tiang cu Laimi nih kan phanh ngam lai ka zumh bal ṭung lo hme. Laimi in kan chuak i, Laimi in kan nung, Laimi in kan dongh awk a si  hnga lo maw. Kalnak lam kan theih lo ahcun tlau phung a si ko. Ziah, lam an sial tung ko ṭung hme. A bua fawn lo a phuul in a phong fawn lo. Ziah, kan tlau. Ava poi hringhran dah. Na lungfim pei a tlai tuk te lai hi maw…Bus Cung Angkihring Nute.  

(Note : Muko Mekazin ah rak ṭial cangmi lenhloi a si)