Salai Ngun Lian Sang

 Salai Ngun Lian Sang 

he biaruahnak

Asang, Kawlram huap in minṭhatnak laksawng na kan hmuhpiak caah kan ilawm tuk.

Atu bantukin nan ka lomhpi caah ka lung- lomhnak a sang khun ko.

Pakhatnak laksawng cotu na si naa theihkaa na feeling?

Hi laksawng hi ka co khawh vemi asi ko ka ti i kai lunghmuih ngaingai ko.

Mirangholh ka thiam ruangh ka hmuhmi asi tiin maw naa ruah, laakhruak biachim holhrel le idea ka ngeih caah ka hmuhmi asi tiin dah na ruah?

National Level tiang ai zuammi cu, Mirangholh a thiamcia lawngte an si. Cu pinah Mirangca kha ṭha tein a cawngmi English Specialization deuh lawngte an si fawn. Mirangholh le ca ahcun an thiam deuh ko lai. Hi laksawng ka hmuhnak hi cu, ca ka rak rel balmi le ka rak hngalh balmi hna kha ṭihnak um loin, ka thiam tawk Mirangholh in ka hman khawh caah asi.

Sianginn kan rak kaiṭi lioah ningzahpang ngai na rak si ko kha mu.  Zeitindah mizapi hmai ah bia naa ruah, naa al ngam ning? Zeitindah confidence ngei ding in naa timhtuah ning? Na thin phan ning le na feeling?

Ka ningzah a rak pang taktak ko. Cun, ka ningzahpan mi kha ka rak i uar lo ngai  University ka kai chung, ka hawile nih an ka cawisan ruangah Siangakchia hruaitu ka ṭuannak hi a ka bawmtu bik asi ko. Confidence timi hi mental power asi caah mah tein i sersiam a hau. Thinphannak nih zei ṭhatnak a chuahpi lo ti hi ka ruah pengmi asi. Cun, mah sining te i zahpi lo le cohlan ngam hi confidence hrampi asi ko tiah ka zumh. Zuamnak lio ahcun ka thin a phang lo. Ka sining tein kai zuam ko. First si cu ai zuammi paoh nih tinhmi asi nain last sinak in ka lung a ka zorter kho hlei lai lo ti hi ka zumh.

Laakhruak bia-al, biachimnak ah pakhatnak le Mirang caṭial zuamnak ah pahnihnak laksawng asi ko lo maw cu? Chinmi chung in tah minung zeizat dah nan itel/zuam kho?

Zuamnak hi phunthum a um. Essay ṭial zuamnak, Laakhruak biachimnak le Round Table discussion  hna an si. Laksawng hi pakhatnak in pathumnak tiang peek asi i, Essay ah ka ngah lo. Laakhruak biachim ah pakhatnak ka ngah i Round Table Discussion ah kan group nih pahnihnak kan ngah. Zuamnak pathum fonh in tuak tikah pahnihnak ka ngah. National Level ah ai zuam ding in thimmi hi Post-graduate level ah 16 le Under-graduate level ah 28 kan si. Cu hna lakah Chinmi hi minung pa 5 kan itel i, kan pa 5 ning tein laksawng kan co dih.

A zeidang cu na thiamnak ruangah asi cu. Laithuam theng le na Lai min thengte na dirpi mi cu ka hun in upat tuk ṭung?

Laimi ka si caah asi ko. Miphundang hmai ah Chin ka sinak kaa zahpi lonak le kaa dirpinak te asi ko.

Biadang deuh ah, Vietnam na kalmi kha zei kongah?

Global Politics Fall School Vietnam 2012 ti asi. Germany ram Berlin khua i a ummi Free University nih tuahmi zarhhnih program asi i Vietnam, Thailand, Cambodia le Kawlram in siangakchia mino 25 an kan thim. Southeast Asia le vawleicung i a cang cuahmahmi hot and current issues pawl kha professors pawl nih lecture a kan peek. Discussion kan ngei. Paper kan ṭial. Cun, presentation hna

kan tuah. Kawlram in a voikhatnak ai telmi ka si i pahnihnak zong ka va hmuh.

Mirangca le holh kongah Lai mino hna caah na saduhthah.

Keizong a cawng liomi ka si rih ko. Tampi kai duh rih. Mirangca le holh hi thla 6 training, kumkhat training men in thiam khawh asilo tiah ka zumh. Holh hi pakhat le pakhat kan ipehtlaihnak ah hmanmi asi i, Mirangholh hi vawileipi he ipehtlaihnak tawhfung asi ko. Mirangca le holh hi Chin mino hna nih a zatawk cun kan thiam dih a herh ko.

Na sianginn kainak konglam tawi le na cawlcanghnak konglam tawi

Ka pa hi cozah rianṭuan asi caah hmunkip ah sianginn ka rak kai. Sagaing ramṭhen chung cu kan cuul dih ti awk asi. Taanghra hi Thantlang High school in 2006 ah ka awng. Kalay University ah 2006 in 2011 tiang ka kai. MA kumkhatnak ka kai lioah Gankaw Education Centre ah ka sok ve i an ka cohlan caah kumkhat chung scholarship in ka va kai ta. 2013 in Kalay University ah ka lim ta lomi MA ka kai lio asi. Cun, 2006-2011 kum ah Judson Boarding School ah saya ka rak ṭuan. 2010 - 2011 kum LSSB, Kalay ah President ka ṭuan. 2012 – 2013  ah Shan ram le Karen ram ah volunteer in civic education le English hi ka rak chimh hna. March 2014 – in atu tiang hi University Student Union, Kalay ah   President ka ṭuan lio asi.

Kalay University ahkhan LSSB President na ṭuannak kong tawi le accomplishment cheukhat

Si, LSSB, Kalay ah 2010 in 2011 tiang term hnih president ka rak ṭuan. Cu lio i ralṭha ngai in kan rak tuah khawhmi cu bus ferry man a kai ruangah siangakchia thongkhat leng nih duhlonak kan rak langhter. Cun, kan sunhsak khunmi Chin National Day (CND) tuah ding kongah acozah nih an kan khen- kham bu ah Chin National Day tiah tlangtar ṭial in kan rak tuah. Cu lio ahcun ramchung ah Chin National Day tiah tlangtar bak in a rak tuahmi hi Kalay lawng ah a rak si men lai.

Biadang ah, nungak na uar phun le uar lo phun zong hun kan chimchih lawlaw ko ngat. Na lawn lio hna asi maw.

Ka uar lo phun cu a um lo. Zeicahtiah   minung hi thinlung chung taktak vun hngalh ahcun an ṭha dih ko. Cun, aho hmanh kan tling dih fawn lo. Mui le sam le duhdawtnak hi a biapi ve ko. Cu nakin a biapi deuhmi cu, theihthiamnak thinlung asi tiah ka zumh. Ka theihthiam khawhmi le a ka theithiam kho ve ding nu hi ka uar, ka duh, ka herh bik ko. Cu ruahchannak he ka um lio asi ko hih.

Careltu, a bikin mino hna sinah biacah na duhmi.

“Follow your dream” tihi kai zuam mi asi ko. Mah le chunmang kan ngeihning cio in izuam ko hna usih. Chin kan sinak belte hi vawlei a hmunh chung hmun ve seh.

Khah, kan ilawm tuk kun.

Keizong kaa lawm tuk ve. @@@@