Ni Hlei Cuai he biaruahnak

“Duhnak le dawtnak kongah ngakchia le upa ti a um lo tiah ka ruah" a titu 

Ni Hlei Cuai

he biaruahnak

Min               : Ni Hlei Cuai (A Cuai)

Nulepa            : Pu Toe Ni (tleicia)

                  : Pi Mah Zi        

Khua/umnak      : Firti/Pyidawtha (Hakha)

Chuah kum       : 21 May 1984

Cawnmi           : B.E (Civil)

Rianṭuanmi       : Translator & Interpreter @ ILO

Mitung            : 5" x 4'

Zuammi           : Capo rel le lungtawng mi tuanbia (touching  stories) rel

Rawl duhmi       : Tisik-anhnah le a thakmi

Thil rong duhmi  : Asen

Tinhmi            : Miphun caah hmanrua

Tlaihtleng         : Ṭhawnnak a ka petu Khrih thawngin zeithil paoh ka ton ngam ko hna.

E-mail            : acuai07@gmail.com

Facebook          : Ni Hlei Cuai

Tel               : 09-2450496  

 Hi! A Cuai, biaruah kan in duh. Caan na kan pe kho hnga maw?

Kan pek khawh ko hna.

Kan ilawm. A hmaisabik ah na konglam tawi hun kan ruah law...

           Keimah ka min cu Ni Hlei Cuai asi. A ka hringtu ka nulepa cu Pu Toe Ni (tleicia) le Pi Mah Zi an si. Atu ka nulepa cu Pu Nyi Nyi Lwin le Pi Mah Zi ansi. Unau pali kan si i upa bik ka si. Hakha, Pyidawtha sang ah kan um. Kapu le kapi cu Pu Lian Dai (Dauchim) le Pi Fam Hliang (Hakha Farrawn) an si.

Na sianginn kainak tawifiang in hun kan ruah law...

      Taangcheu in taangriat tiang cu Pyidawtha sianginn (Mah lioah cun middle school tiang lawng asi) ah ka kai. Taangkua cu No. (1) BEHS, Hakha ah ka kai. Taanghra cu No. (1) BEHS, Pyin Oo Lwin ah ka kai. Cun,  Mandalay ah Engineering ka kai.

Atu hi International Labour Organization (ILO) ah rian a ṭuan, tiah kan theih i kan in lomhpi tuk. Zei reng (rank/position) indah na um? Zeitindah hi rian hi na hmuh khawhning asi?

         Si, kaa lawm tuk ve. Bawipa a ṭha. Ka tlak lo buin thluachuah a ka pek. Translator & Interpreter ka si. ILO officers pawl kha Laitlang an tlun lioah, tinṭan an peknak ah ka kai ve. Sayama Mang Ku nih a rak ka auh. Mah ah khan, kan zung rian lawn tikah ṭuan na huam lai maw an ka ti. Ka duh ko ka ti hna. Nain rian ca i Interview an ka tuah lai ah, hi rian na ngah lo sual le na lungṭha loin um hlah an ka ti. Ziahticun, ka hmai zongah an tuahmi hna an um len hna ko nain an ngah hna lo. Pathian nih a ka umpinak thawngin ka ngahmi asi ko.

ILO cu mizei nihdah an dirhmi asi, ILO kong tawi hun kan ruah law kan duh ko.

        Headquarters cu Geneva, Switzerland ah a um. UN kuttang asi. Departments tampi a um.

        Kei hi Forced Labour le Child Labour, Child Soldier pawl a tlaunak ding rianṭuannak Department tang ah ka um. A biapi cu harnak tongtu a bawmchan khomi Organization asi.

Laimi dang tah an um maw, cun, Laimi dang nih ṭuan kho ve hna seh, tiah saduh na thahmi lam a um maw?

Kan zung ah Laimi dang an um lo. Laimi nih an ṭuan khawhmi rian a tampi ko. Ṭuan ve hna seh ti cu ka duhpiak ngai ko hna. Nain tu hi rian lawng a um tikah ramdangmi deuh an ra. Keimah nihcun lam kawlpiak khawh a har. Mahte in apply tuah a hau. 

Mizeimaw nih hal phungah an ruat lo nain hun in hal koning. Atu hi thlahlawh tah zeituak dah an in pek?

(Mah kong hi cu chim lo ko sih, a ti. Keimah ruahnak $ 900 renglo an pek rua—Editor)

2013 kum ah Hakha khua ah ‘khuang an cawi’ tiah kan theih. Ahote bu/phu le committee nihdah an in cawi? Zeiti tein dah khuangcawimi nungak na si khawh?

Avoi 65nak Chin Miphun Ni (Feb. 20) ah an ka cawi. Mah zong cu Pathian khuakhan asi ko. Pu Bawi Lian (Pyidawtha ward Administrator) nih cawi awk aa tlak ti a ka ruah caah (kaa tlak lo tuk nain), amah nih meeting ah a ka chuahpi. A cungah kaa lawmtuk fawn. Ramdangmi an rat i biahal a um ah nangmah tein naa leh khawh fawn lai, tiah an ka ti.

Khuangcawi hi atu Khrihfa chan ahcun kan tuah awk asi ti lo, timi mizeimaw pomning cungah na hmuhning?

A ruah awk ka thei lo. Phung le phai pawl hi tampi ka thei lo.

Khah, kai reetmi kan hal cang lai. Nai ready maw☺☺. Atu hi na lawng ti lo sual maw cu?

Ka lawng ti lo, ka ngei cang.

Duhnak kongah ngakchia le upa timi na hmuhning?    Nungak pakhat nih mah nak ngakchia duh/uar timi   kongah na pomning le na lungput?

Duhnak le dawtnak ah ngakchia le upa ti a um lo tiah ka ruah. Nu nih mah nak ngakchia deuh duh, uar ti cu a tlawm deuh ko. Nu cu kan tar a fawi deuh fawn cuh. Asinain, kanmah nak ngakchia kan thim tikah a lungthin put hrim kha ṭhate in zoh a hau ve. Cikhat ca si loin zungzal a kan daw khotu asi cun a poi lem lo ka ti. Pakhat le pakhat i theihthiam hnu cun kum le khua timi tham cu rel awk sawhsawh lawng asi ko tiah ka ruah. 

Ṭhit-umhnak kongah parcel cah, tlikzaam le ifanh, tbk. kongah na pomning?

Kei ka hmuhning ahcun an ṭha dih ko. Mah lung nuamh hi a biapi. A cohlangtu nih sau an ruah hnu ah an tuah ciomi asi ko caah.

Man manh le chawhauh kongah na ruahning?

Man manh le chawhauh timi hi ka uar lem lo. Uar awk zongah ka chia lo. Nain, pa nih nan fanu nan ka pek caah kaa lawm tiin, a lungah a um si le, nu a hringtu nulepa, pileup kha lawmhnak man te hauh hau loin pek ka duh deuh. Puai tuahnak cu pa nih tamdeuh liam ding asi ko tiah ka ruah. Ziah ti ahcun puai i ngahmi laksawng pei an ilaak dih ve cu. Cucu keimah pom dan le ruahning asi.

Tlangval ah na uar ngai phun hun kan chim law

A ṭhami an um, a chia mi an um. Herh lo i mah le mah i uar tuknak le i uah tuknak um lo cun duh an nung dih ko hna ka ti. A chan zong nih a ngeih i a honest mi (a thianghlim mi tu cu an har ko).

Saduhthah le uar phun tlangval.

Saduhthah le uar phun tlangval sinak ti bak ahcun (1) aa siṭal  lai (2) a fim lai (3) a rum lai (4) chimh a ngai lai (5) a  zia a ṭha lai. Asinain ka caah cun atu ka boyfriend  hi aa za ko ka ti.

Nulepa kan idang lo, kan ikhat ko tiin na ruat maw, a ruang?

Thazanglei ti loin thluak in rianṭuannak ahcun kan ikhat ko tiah ka ruah. Nain, a min hmanh cu pei nulepa ti aa khat lo cu, aa khah lonak a tampi ko tiah ka ruah.

Lai mino le careltu sinah biacah na duhmi.

Nifatin kan tonmi thil ah lungdonghnak um lo tein le zeithil paoh a ṭhatnaklei in hmuhkhawh i zuam peng hna usih, tiah cah kaan duh hna.

Khah a tlai cang, kan ṭin lai. Mangṭha kun. Na caan pek in bia na kan ruah caah kan ilawm.

Keizong kaa lawm tuk ve. Mangṭha kun u. 

****