Thlacam Tikah

Thlacam Tikah
 

Salai Joseph KB Thawng

Thlacam timi cu Pathian sinah telephone chawnh phunkhat a si. Telephone chawnh khawhnak dingah SIM Card le Handset a herh, kan fiang. Mizeimaw cu thlacam lioah tleupuul in mit-au kan hmang --- keimah tel in. Cun cheukhat baak cu thlacammi ngai/ruat loin kan ihngilh beh. Cun, telephone a rak tuai i message le chatting in khuasa tawk kan tlawm hoi lo, kan i zi.

Amah belte, thlacamtu nupa cungah tampi aa hngat ve. Pathian sinah maw ka cam, minung sinah dah, ti hi kan theih ko nain kan philh sual tawn. Minih “thlacam a thiam ka ti hna seh” ti riangmang i : sau emem, biafang dawhdawh, bia fualfual le a herh lomi biafang tiang hman tbk. cu mi depde he kan idang lo, tinak a si (Matt.6:5-13). Cu bantukin thla kan cam ahcun Pathian sinah si loin minung sinah kan cam a si. Jesuh zong nih hitihin cam a kan fial. “Vancung khua i a ummi kan pa…” tiah cam u, a ti. Asullam cu vawlei ummi minung sinah si loin Vancung khua ah a ummi Pathian sinah cam a herh tinak a si--- kan ifiang dih ko. 

Pakhat pa nih thawhlawm caah hitihin thla a cam. “Bawipa, hung kan pe kan in ti thulh, hun kan kenpiak kan in ti thulh, na hmai kan khap bak lo. Ka tuak lengmang ahhin, pek tlak kan si lo, zeitirai si hlah, hung kan daw cuahmah ko kun” tiah faingual in a cam. Hi pa thlacam hi capo a lo nain tuak a hau ngaimi cu a si ve. Kan i fian cio komi cu “thlacam paohpaoh hi Pathian nih a theih lo bantukin thlacam sau le bia ṭhaṭha hman hi Pathian nih a cohlang ve hlei lo” ti hi. A taktak ti ahcun Phungbia cawnpiaktu le Pharisees bantuk kan si ko hnga.

Rev. Dr. Van Thawng Lian nih a rak chimmi kaa cinken peng. “Rawl-ei lai thlacam ah kan i ralrin a herh. Tc. Chungkhar pakhat nih rawlhrawn a kan sawm. Thla kan cam i Bawipa, kan ei hlan ah a thurhnawm vialte kan thianhpiak ko, tiah cam kan hmang. A ngaingai cu, a chumchuangtu hmaikhat a si lo. A chumchuangtu nih sivai paih sehlaw cubang. Cu nakin, kan ei laimi rawl hi kan thisen le kan thazaang ṭhawnnak caah thlua kan chuahpiak ti awk a si ko,” a ti. Tuak ngaingai a hau.  

“Thla kan cam tikah kanmah duhmi  lawng kha Pathian kan hal i Pathian nih a kan hal ve mi thil kha kan pek ve tawn lo caah kan thlacam hlawh a tling tawn lo”---Mrs. James Honke (God Life). Saupi, bia dawhdawh, kan siaremning lawng le minung sinah kan cam ahcun SIM Card um lomi handset he kan i lo lai. 

(Note: Hi cabia tawi cu Deirel Cazual ah rak pho cangmi a si)