2013 Miss Universe Le Lainu

2013 Miss Universe

Le

Lainu

Salai Joseph KB Thawng

Avoi 62nak, “Lengdawh zuamnak” cu  Moscow, Russia, Crocus Hall ah November 9 ah khan tuah a si cang. Ram 86 in lengdawh 86 an i zuam. Kawlram zong kum 52 hnu ah Moe Set Wine (2013 Myanmar Miss Universe) nih a kan ai-awh ve. Cu kong cu “2012 Miss Universe” luchin cotu Miss Olivia Culpo (American) nih “Kum 52 hnu ah Kawlram zong an hun itel khawhmi hi lawmh awk ngaingai a si” tiah internet cahmai ah a ṭial.  

Tukum cu Venezuela in Maria Gabriela Isler nih ‘Miss Luchin’ aco. Spain (1^st runner-up), Ecuador (2^nd runner-up), Philippine (3^rd runner-up), le Brazil (4^th runner-up) hna nih a changchang in an zulh. Miss Universe cu a ropui ko, zapi theih. Vawleipi nih kan cuanh hna. Mino le carel kho chimlo, tar hnachet hmanh nih an hna an tun, ti a si. Vawleipi an hninh. 

Hi zuamnak ahhin ‘tinhmi’ (objectives/aims) tampi an ngei lai, a fiang. “Muidawhnak” pakhat lawng bakin a si dih lo. Vawleicung Nu hna sining le thiamnak ṭhanchoter duhnak le cawisan duhnak zong aa tel. Rampi ai-awh in aa zuammi lawngte an si tikah an zohkhek ngaingai hna. An titvun, an idawhnak, an pumrua, an hmaithlak, an titsa a milmuang maw, an ciangzar a ṭha maw, a nuhrin thluak a ṭha maw, theihtlei tampi a ngei maw, idea tah a ngei maw, tbt. tiang in.

Cheukhat cu a muisam le pumrua aa dawh tuk nain thinlung le thluak khuaruahnak lei ah an rak derthawm. Thiamnak le theihtlei tete ah tampi an rak chambau. Cheukhat ve cu an muisam aa dawh tuk lo zongah caanhmaan in lente an icelh. Ngandamnak he aa tlak in tirawl an eiding. Zaan ah caanhmaan tein an it. 

Tuah herh cu tuah dih an i zuam.Cu tikah, an tlazar a ṭha. An cawlcangh nih mi a hip. 

Hi zuamnak he pehtlai in Lainu zong nih fimnak tampi kan ilak ve ding a si. Hihi a kan zuamcawh ngaitu thil pakhat zong a si. Nungak pakhat si i sokphak tuk le tlamak tuk in khuasak le i ṭamhmoih zong hman ding a si lo. Dawhnak caah, ngandamnak caah aa tlakmi tirawl ei, lente celhpiak le ṭamhmoihpiak zong kan fel deuh awk a si. Thlalangbih zong ṭhawn deuh ding. Thuamthil zong heu pah ding a si ko hehe.

Nihin Lainu hi fa tuk le niam tuk in kan i hmuh awk a si ti lo. Democracy cozah uknak phung chungah kan hung luh bantukin “Nu Covo” (Women Rights) zong a sang chin lengmang ve ko.  

“Miss Universe” ah nan i zuam kho ve hrimhrim lai, tiah minsen kan thu ngam lai lo nain nihin Lainu hna hi a lamkip in, kanmah le kan sinak cioah universe a huap khotu nan si kho ve ko.”  

(Note: Deirel Cazual (2013) ah rak  ṭial cangmi capar tawi a si)