Laica Ṭial Tikah Ralrin Awk Tete

Laica Ṭial Tikah Ralrin Awk Tete
Salai Joseph KB Thawng

Laica kan ṭialning tete hi aa dang ngai tawn hna. CACC zulhphung zulh khawh cu kan i zuam cio nain kan zul kho taktak cio lo. Tutan ka hun ṭialmi pawl hi ka thiambik ruangah si loin a fawite mi kan palh sual ṭheomi kha ka hun char bia. A thiam cangmi caah a fawite lai, a thiam deuh lomi unau hna caah ka hun vuak  a si. 

(Note : Word combination kong a si lo).

"a le e" hmannak

1. Kan 'ngeih' ning cu! (X) (Ngeih ahkhin 'h' hlo law "ngei" ah aa cang lai. A cahram (root word) zohchin pah a hau---a diklak cun a si ve lo.

2. Kan 'ngaih' ning cu! (√). (Ngai-ngaih in a root word zohchih pah ding)

# Cu bantukin atanglei zong hi an si hna:---

1.Kan tleihchan tuk (X)             - Kan tlaihchan tuk (√)

2.Hmuh lai kaa ngeih tuk (X)    - Hmuh lai kaa ngaih tuk (√)

3.Na aw ngeih a nuam (X)         - Na aw ngaih a nuam (√)

4. Hngerhtlei ka pe ta (X)           - Hngerhtlai ka pe ta (√) (Note: Hngerhtlai cu, tlai-tlaih in a rami a si hnga lo maw? Tlei cu a tlei tuan, tleirawl a si cang, ka fanu a tlei ngai cang)

5. Na kut kan tleih (X)               - Na kut kan tlaih (√) (Note: tlai-tlaih in a ra ve)

6. Peihbuan an ser i buancotu/bualcotu ka si (X) - Paihbuan an ser i buancotu/bualcotu ka si (√) [Note: Pai-paih (i pei usih ti a um bal lo, kai peih ahcun ka cak lai ti a um lo) i pai usih/ paih ka zuam lo].

7.  An inn le kan inn cu aa neih tuk (X) - An inn le kan inn cu aa naih tuk (√) [Note ( kan i nei tuk ti a um bal lo) nai-naih a si]

8.  Vate panga ka cheih(X)        - Vate panga ka chaih (√) (note: chai-chaih)

9.    Zuun ngeih par (X)                 - Zuun ngaih par(√)

10.  Deihnak na cung um seh (X) - Daihnak na cung um seh (√)

11.  A cenceo in hei ten(X)             - A canceo in hei tan(√)

12.  Angkileng eih ka duh (X)       - Angkileng aih ka duh(√)

13.  An i cei maw zeihme(X)         - An i cai maw zeihme(√)

14.  Kan fanu pa a fenh (X)           - Kan fanu pa a fanh(√)

15.  Tilian nih thing a fenh (X)       - Tilian nih thing a fanh(√)

16.  Hni kai fanh(X)                       - Hni kai fenh/venh(√)

17.  Hihi cu aman he aa keih(X)    -  Hihi cu aman he aa kaih(√)

18.  Ṭhutden ka pe ta(X)                - Ṭhutdan ka pe ta(√)

19.  Keden kai denh(X)                 - Kedan kai danh(√)

(Note: Den = tilian nih a den i a deng ah a nen. Dan = atang na danh lo ahcun an tlakhnawh te lai)

Acunglei ka hun tianmi pawl hi Hakha le Thantlang holh tiin a um sual hoi hnga maw. Kan awchuah nih ‘a’ nakin ‘e’ deuh in a chuah tawn caah a si bik lai dah.

Min Kong

 “Min kongah nangmah pumpak kha nawlngei bik na si”---Salai SVH. Na duhning paoh in na min naa sak, ṭial khawh. Mekazin le journal tbt. zong ahhin min ṭial palhpiak sual ahcun a poi taktak mi a si i editor pawl zong nih kan i ralrin bikmi pakhat a si ve. Capar an rak ṭial tik zongah na min hi hitihin maw ka ṭial lai, tiah ka hal ta lomi an um rua lo. Amah belte ningcang a tlaimi min a si a hau. Tahchunhnak ah atanglei hi zoh  ve hmanh.

1.      David Zaathang          : Da Vid Zaa Thang tiah kan ṭial (pa Vid kan hei ti chapbei)

2.      Joseph Cung                : Jo Sepcung ti hna a um (miphundang min kan ihlan ahcun anmah ṭialning tein hman ding a si)

3.      Cung Lian Sang          : CungLianSang, tiah cafangtung (capital letter) in fonhnul in kan ṭial ṭheo.

4. Stephanie Iang            : Stepheny Iang ti hna a um hoi.

5. Stellar Suite                : Stela Sui Te ti zong a um rih.

6. Hanna                          : Ha Nah

7. Naomi Parku               : Nawmi, Nomy Par Ku tbt.

8. Vanpi Hlawnceu          : Van Pi Hlawn Ceu tbt.

9.  Michael Khenglawt    : Mikal Kheng Lawt

10.Van Lian Sang        : vAn LIAN sAnG (style dang maw a si zeidek, ka luthak kai kheuh)

Christian name, family name le clan name a va si zongah min kongah ahcun kanmah pumpak kha nawlngei bik kan si ko nain Laimi facebook cahmai ah ningcanglo min a tam ngai ko.

 Na ruahnak le theihhngalh chap ding ah sawm na si.