Laikhal Biaphongden (2)

Laikhal Biaphongden (2)

Laimi le Sponsor 

Salai Joseph  KB Thawng

Chengreu tel lo lakphakti nih a simh pah cang hna lai dah. Zarhteni zaanlei (weekend) kan ti cu an cabuaite an hum lumh ṭheo. Tutan cu mi kong an ceihmi a tam. Mi kongceih ti tikah an minfang khek cun an ceih ngam deuh lo. Laikhal kan ti cu an theihnak a tlawm bia zong si lai cu. A ceihcumzia hmanh khi an thiam ṭhiṭha lo. An kaa a awng i an hei nawnnok ve luklak, an hei tlokciar ve luklak ko cuh.  Asinain, tloksabur khin biaphong an deng. Pakhat le pakhat an biachim zong an i ngang kho lo. Heh in an aukhuang lulh ko. Biatungtlang an hun dirh.  

Laimi le Sponsor

E.Luaite: Chan a fim tuk le fim pah ve cu kan hau ka duale. Mah pawcawmnak a si paoh ahcun a herh le lihraang zong kan ṭawn pah ve awk a si ko, ka ti ko hih kei cu. Zeipaoh hi a caan a um cuh. Atulio rengreng hi ramdangmi nih  mi bawmhding rumro an kawl. Kan i paih ve awk a si ko lo maw?

Salai Khar : Ka ruat ngai ve tawn. Kan khuapa hna India ah Bible Sianginn a va kai luklak le (zapi ka ti hna lo) atu ahcun Yangon ah ngakṭah siang (Orphanage) a dirh ko. An khuasak le an ṭhutdir ah an i nuam tuk cang. Ngakṭah zong minung sawm (50---ngakṭah he ṭahlo he) hrawng pei a cawm hna cu. An sponsor pa nih a dawt ngai hna.

Salai Dun: Si, mah hna pawl kong ka ruah ahhin dakaw thakbare hmanh nih a ka thah ti lo cuh. Lih le hrokhrol ṭawn in mi chawva a baanmi pawl Vanram an kai ahcun kan kai cio lai---an dihlak cun ka ti ve hna lo cu mu. Asinain, zapi cu mi hrokhrol bak an si. India le Philippine hrawngah an va vai luklak le Mirangholh  an chim khawh tikah sapawnsar mit lawng an au ko hme cu. A chap lo ah fawngdar (founder)  an iti, sayagyi (principal) ti hrawnghrang kawh theng khi an uar, an ngeen.

H.Teite : Um, Salai Dun chimmi hi keizong ka pom ngai ve. Laimi nih sapawmsar tampi kan ngeihmi hi Pathian thluachuah a si ko. Asinain, Pathian  rianṭuan duhnak taktak ah si loin phaisa mitthit le um-ol duh rumro ah sapawmsar mit a au mi an si ka ti ve. A ngaingai cu, Kawlmi sinah thlarau tlau kan kawl. Mission rian kan ṭuan ti ah hmaihngal ngai in an um. 2011 kum ah khan vawleicung biaknak lakah Kawl biaknak (Buddhist) a ṭhabik tiah an thim. A rengreng ah Kawl phungki (Monks) pawl khi zoh hna ulaw, an i dawhnak an sam zong an kongh dih hna. Thilpuan ṭha le dawhcah hmanh an i serh ngam lo. Kedan ṭha hmanh an ngei lo. Mah hna bantuk khin Khrihfami kan Sayate  le kan Founder pawl hi  Phungki bantukin nan um awk a si. Cu lawngah bawmhnak kan in peek hna lai ti hna sehlaw an duh fit lai lo. An i ma ziarmar lai dah.

Salai Buan: Ka duale, ka duale, nan bia a faak deuh. Cuti lawng cun ruah ding a si lo cu teh. Zeithil paoh hi kaphnih mit in nan zoh a hau. Tahchunhnak ah, E. Luaite hi naa dawh lo ngang i kei hi kai dawh ngang hi mu. Pheh awk a um lo cu mu. Chim duhmi cu nangmah mi dawhlopi hna na rak um ruangah dawh keimah dawhnak hna hi a rak langh khun cuh. Asullam cu thil hi kaphnih peng in  purh le dah a hau kan ti lai. A ngaingai cu “$” (money) loin aho nihdah Pathian rian cu kan ṭuan zuam cio lai. Bible nih pei, “Lei a thuang liomi naa cu an kaa ṭem hna hlah u” a ti kha. Lahkhah ruangah  Pathian rian cu an ṭuan lo nain, an ṭuan ruang tu ah an ṭuanman cu an hmuh ve awk a si ko lo maw?

Salai Dun : Um rih. Na bia dong hlah kaw, “Cheukhat minung (an dihlak ka ti hna lo) tham cu kan ram le kan miphun caah, Pathian ram kauhnak caah le thlarau tlau tlaihnak caah tiin thla hmanh an cam zuam ṭung lo. Rawl-ulh thlacam an huam nemmam lo. Cu minung pawl nih cun dakaw, sapawmsar hmuh nakding tu ahcun heh in thla an i cam seek cuh. Rawl an ul cuh. Bawipa, bawmtu kan pe ko. Na kan peek ahcun cutin khatin  a si lai tiah, Pathian khi proposal an hei tuah mei ko cuh. Ei…ka nu, ka pi ka ningṭi ti khi kan si ko eh. A ngaingai cu, Laimi hi camping le crusade nih a kan chei ti lo anti lengmangmi hi kei cu kan sayate dawh ka puh ziar ko hna cuh.

E. Luaite : Ka duale, Salai Buan bia cu nan thei lo hme maw? A rengreng ah cu hna pawl kongah ahodah mithmuh tette (eyes witness) a ngei? Chim u, mi chim chinnak men in nan theihmi hi fak tuk in char  hlah u. Theih nan duh taktak ahcun a chungah lut u. Kau u, dap u, virhkhoih u, pilh  u ca. Nan tohmun cun a cir cun na icir len. Palh cu minung phung a si (to err is human) ko nain, nan chimmi hi pakhathnih khi innping le sapang ah an va hmuhtheih sual hna le dakaw a va si ko lai. Uico Sahal boh in a langtlang in mi boh hmang hlah u.

Salai Khar : A si reng khe. Khualu voih hi khuataw ek ah canter hlah u. Nan mit nih a hmuh ve lomi, nan hna nih a theih ve lomi hi makhngallo in chim hlah u. Biasiphai le mi kong a hmaan lo ningin ceih tuk hi Laimi kan zatlangnun rawhnak  dawh a si cuh. Lannbe Bible sianginn (lampawng sianginn) an va dirh luklak ve, cu e kha e, ti hna hlah u. Aho nihdah “Ramtang Sianginn” cu an dirh cio. Lampawng Sianginn cu pei an dirh cio ko cu. Nan mit hi kaupi in au u. Thil sining tungvang tah thiam ngat u---Laikhal hna.

Aze…..kan lo ko. Kanmah lehlam phar viar in kan isi dih cang lai hih. Lawi hna sih uau. Bible nih “Pathian rian felte in a ṭuan lomi cu chiat si ko seh” a ti. Kanmah nih bia kan ceih hna lai lo cu mu. A dik lomi an um zong le kanmah rian a si lo. Anmah le Pathian an ipehtlaihnak cio cungah a ummi a si ko. Felte a ṭuanmi nih Pathian lawmhnak mithmaiṭha an hmuh ko lai. Angaingai cu, kanmah (Laikhal) pawl camping kai tam le voi (5) cio hrawng kan pianthar mi te hna hi ningzah deuh awk a si eh. Nungak ngakkhat te hmanh aa hmuh rih lomi kannih pawl nih Vanram le vancung kainak kong lawngte kan ceihmi cu aa hlat tuk eh. Cu nakin mi Pathian rianṭuannak kong kan va virhkhoih ve hi cu a hlat chinchin---ningzah thiam hi subject pakhat in cawn kan hau lai. Azeikhom siah lawi phot hna sih. Iangku kha thaizing lokal a sawm rua, imanh dawh a si lo. Cerku te inn ah tuzaan cu kan itong te hna lai, zanriah ei thaw hna u. 

(Note: Muko Mekazin ah rak ṭialcangmi cabia a si)