Adeumi Kumthar

Adeumi Kumthar

Salai Joseph KB Thawng

Vawleicung ah a tam bikmi thil hi “adeu” (aṭuh) a si, ti a si. Phundang cun, ‘atak’ a si lomi, ‘alem’ lawng te nih kan vawlei hi a tuam. Cu zong cu kum zabu 21 ko ahhin a hung karh. Kokek thilri hmanh hi an ‘deu’ vuahmah cang. Chemical  in sermi thil chinchin cu chim hau lo. 

Pathian kan biak ningzong adeu. Khrihfa kan siningzong hi adeu. Pakhat le pakhat kan ipehtlaih ning le kan idawtnak zong hi adeu. Micung ah thil ṭha kan tuah, tiin kan i lungsi ngaimi zong hi a taktak ah adeu lawngte an si. Kan idawhnak zong adeu. Kan i ṭamhmoihnak zong adeu. Kan pumrua le kan hmaifang, kan thuamthil, kan sam le kan zeizongte hi adeu lawngte.

Ningcanglo in chawleh zong hi adeu mi thil a si. Eihmuar le rutreu cu adeu chinchin. Nu le va kan idawtnak zong adeu---Ngaknu le tlangval kan i duhdawtnak cu chim hau lo. Innpa chakthlang sinah kan deu. Khrihfabu le zatlang pawlkomhnak ah kan deu chinchin. Kan sining hi a ningpi in adeu. Chantidil sinah adeu mi thil he kan ilio i chantiluang sinah alem mi thil he kan pil. 

Laimi ngai hi dah! Kumthar paoh i thar itimh ve. Tukum, Kumthar cu zu kai phiat lai. Kuat le hmawm supsap zong kai phiat lai, ti hi kan hmang ṭheo. Ataktak ah “Kumhlun sinah kan deu, kumthar chungah kan lem.” Adeu/lem mi sui cu khua caan a rau deuhdeuh, adeu a sinak a lang deuhdeuh ve. Phundang cun, kokek le sinak in ‘adeu’cang komi rumro hi cu ‘atak’ a si kho ti lo hrimhrim, a fiang ko cu mu. Asinain, Pathian nih hin misual an kan dawt cuahmah ko ai. 

A tlangpi in hun vuak ahcun deu lo awk a ṭhalo mi chan ah kan um ve hoi. Atak nakin adeu mi si zong kan huam deuh hoi, a nuam in kan thei deuh. Kan mawh lo hei ti usih---chantiluan sual phaw rih ko usih. A ngaingai cu, ca ṭialtu, keimah pum chung lila zongah adeu lawngte a si ko---kan hrial kho bak lo. Asinain, azeikhom siah “Adeu mi cu adeu cang fam. Adeu rih dingmi zong atu hin adeu cia hoi. Kan rak deu i kan deu cuahmah rih hoi lai. Asinain, zeidang zeidang ah kan deu lengluang ko hmanh ah ‘kan thinlung’ te hi cu Kumthar sinah adeu si loin ‘atak’ (asit) si hram seh.  

(Note: Faiceu Journal ah rak ṭial cangmi cabia tawi a si)