Internet Vawlei

Internet Vawlei
(The internet world)

Salai Joseph KB Thawng

Kum zabu 21 (21^st Century) hi min tampi in kawh a tong. Information Technology (IT) chan kan ti, Computer (Internet) chan kan ti, “Age of Knowledge” kan ti, ‘Post-modern’ chan kan ti. A cheukhat lebang nih cun ‘The Chinese World” an ti i a phunphun in kawh a si.  Asinain, aa funtomnak bik cu “IT” timi ahhin a va si ko hnga. Phundang cun ‘fawizaangte in ipehtlaih khawhnak chan’ timi ahhin ifun cem sehlaw a dawh. Phundang deuh in kan chim ṭhan a si ahcun ‘internet chan’ kan ti khawh.  

Hmunpi ah khua a sami nih cun kan theih, kan thiam i kan hman khawh dih ngawt lai dah? A min “Internet” ti lebang hi cu a hmesem in kan chim khawh, kan holh ah a canglan.  Lai khuate ah khua a sami kan nu le kan pa hmanh nih “Internet” hi a nu le a pa a sihmanh an thei lo, ei phung le phunglo a si zong an thei lo nain, “internet” ti cu an kaa ah a naal cang i fawite in an chim khawh.  Asinain, “Internet” timi hi asullam a thei taktak lomi kan um kho. Cu, Internet kong cu tawite in von langhter ka duh. Amah belte, hi ka ṭialmi hi a hman bik, a si bik, a tling bik ti khawh a si lai lo.  

Internet  Sullam

1.     “Internet  =  (International + Net)

                     Vawleicung dihlak caah “Suur” asiloah “Ngasuur” tinak a si hnga. Suur pakhat nih nga a phunphun a tlaih khawh. Ngaleng, ngaramh, perpa (lole), chawntonh, fungṭial le   ngapum tbt. in a phunphun in a tlaih khawh. Cu bantukin nang Minak, nang Mirang timi  ‘sinak thleidannak’ vialte um loin rianrang ngai le fawite in a kan pehtlaihter kho i iruahthiamnak, asiloah aalo mi nunphung (mono-culture) kha hmang in “internet Suur” nih a kan khuh, a kan tlaih khawh ve kan ti lai. WW-I (1914) le II (1942-47) hrawngah miphun thleidannak a rak um. Africa miphun cu ‘Minak’ an si caah mihmai hmanh ah an chuak ngam lo. Nihin tu ahcun, “Black is beautiful” tiah an sinak kha an i uang cang.  Cucu, ‘internet’ theipar kan temnak a si ve. 

2.     E-mail   = Electronic + Mail

                 Electric thazaang hmang in ca i kuat, tinak a si hnga. Cakuat bawm khi zoh ulaw, “Air Mail” ti aa ṭial. Asullam cu, thli in ca ikuat tinak a si hnga. Phundang cun, vanlawng in ca ikuat kan ti lai. Asinain, nihin kan chan ahcun thli nakin electric power hi kan hmang deuh cang kan ti lai cu.

3.     WWW  = (World Wide Web)

               A kau tukmi kan vawleipi hi maimomh baw(sawmpalak bu) nih a senghtlaihter dih tinak a si. Phundang cun, ramkhat le ramkhat kha fawite in i pehtlaih khawh a si cang kan ti lai. Phundang deuh cun, ‘Vawlei khuate’ (global village) a si cang kan ti hnga.

4.     http:// =  (Hypertext transfer protocol)

             Cozah pahnih hnatlaknak in  ṭialmi (minthut) ca ahran (proof) kha Document or computer pakhat hnu pakhat ah ṭhial, ṭial (chiah) le langhter, tinak khi a si hnga. 

5.     G-talk =  Google Talk.  G-mail  =  Google Mail

                Internet hmang in vawleicung dihlak ca i kuat, i biakchawnh, tinak a si.

6.     Website  =  (Web + Site)

             Web= Sawmpalaak bu (maimomh baw). Site = Inn hmun asiloah  maimomh a umnak hmun.

7.     Facebook = face + book

                    “Hmai cauk or cahmai” ti a si hnga i a sullam cu, “mui le sam, hmaifang ihmu in ibiakchawnh khawhnak” kan ti lai. Salai Laikhal lebang nih cun “Face + Look = Facelook” ti sisehlaw pei ai rem dom hnga hi a ti phah.   

Acunglei internet he pehtlai in kan chimmi zoh tikah ‘fawite in ipehtlaih khawhnak chan a si tiah kan bia kan fun  ahcun kan khel lai lo dah. Cu, fawite in ipehtlaih khawhnak nih cun chiahnak zong a chuahpi ve ko lai. Cun, ṭhatnak tampi zong a chuahpi ṭhiamṭhiam. Kan theih cio bang, nihin ahcun internet hmang in rianṭuan a si cang. Chawkhelrian lei asiah, ramrianlei asiah, awrkanaizeson asiah, kampani a si zongah  internet lawngte in rianṭuan le hman a si cang.

“Hlan chan (pre-modern) 1415-1947 A.D. kuapkap hrawnghrang ahcun ‘horse power, wind power le boil power’ (rangtum, thli le tisa dah thazaang)  hna hmang in vawlei mawngh chan a rak si. Nihin kan chan tu ahcun, www, http://, orbit, telegraph, le computer (internet) hna hmang in vawleipi chaak an tlaih cang, an mawngh cang. Cucu, IT (Information Technology) chan kan ti lengmangmi cu a si”----Lian Chawn. Phundang cun, “Internet Vawlei” kan timi cu a si. 

Note : A cunglei ka langhter mi hi a dik bik lo. Soisel si loin na theihmi a um ahcun ruahnak hun ka cheu law kaa lawm ko hnga---Laikhal thluak in ka hun purh bia)

(Note : Deirel Cazual ah rak ṭial cangmi cabia a si)