Ramdang Phan Fale Sinah, Hringtupa Cakuat

Ramdang Phan Fale Sinah 

                            Hringtupa Cakuat  

Salai Joseph KB Thawng

Dear  Ka fapa,

Pate, na dam ṭha maw tu hi? Phone vun kan chawn seh tiah kan in cah lengmang nain, Phone Card ka ngei lo na ti le cakuat tu in ka vun ṭial hih! Kannih lei zong kan dam ko. Na nu belte cu na theih bantuk te khan, ṭhatlam a panh ruam ti lo. Kan awlok lawng a chong ko. Khah, pate  na pa, ka bia a fah deuh sual si le ka ruat thiam mu. 

Na nulepa, kan chungkhar sining cu na theih tuk ve ko khah! Kan i nincan deuhnak ding a va si hmanh maw tiah, mitchinh kamseh in kan in kalter kha na philh cang dara. Kumthum renglo na umnak a si cang nain, zei rira a lang kho ne ruam lo. Kum khathnih cu, aw...a si awk a si ko, tiah kan in cengeng ruam lo. Asinain, atu cun, kumthum leng a kai cang hi teh. Nulepa phaisa kuat cu chim lo, kan chawn seh tiah misin in cah hmanh ah card ka ngei lo na kan ti salam. 

Na kalnak ah kan pawnmi, kan cawla te hmanh fathum a hring cang. Leikuang (neel) zong cu naa kan zuar hnu cun keimah nih dah ka thuan ko lo ah, a thuangtu ding naa kan ngei ti fawn lo. Atu hoi hna cu, kawmrawh an za, ritdonh le mangkhawngdo ah kaa za. Kan lo nih le zoh ah mit a chong. Mi hmaikhap loin chomhruaih zong maw kan hauh te.

Fa upa, nangmah bochan in na farle zong asawng ah (taangkua le taanghra) chiah cu an si. Sayate nih atuletu leiba an cawh ve hoi hna i, cu zong cu kan awlok a chong ko. Khatlei ah na nu nih le dam lei a panh ruam fawn lo.  Nangmah theih loin kan ceih tawn mi cu, nupi ṭhitpiak usihlaw aa ning deuh men lai kan ti. Asinain, na kan  awva  lai, ka zum lo. Ramdang ahhin phaisa aruh in nan ruh lai ti hi kan chunmang hmanh in kan man bal lo. Asinain, a zatawk te cu a um ko lai dakaw. 

Chungkhar sining le tappi lungthu kong hna hi na mitthlam in an zuang dih cang dara? Ka fa, mah ti nunphung thar naa serh ding hi ka zanmang manh phak lo pei a si, tiah. Innping le sapang hna ah hin maw caan na va hman deuh tawn hnga, thei hlah. Na hawinu/pa cu, cutin, khatin an si. Phaisa tampi an nu le pa an kuat hna tiin, mi he tahchunh kan duh bal lo. Asinain, ka fa , atu tiang cu na lung a fim kho ruam lo. Na nu le pa na farle le na naule hi na mitthlam tetal ah khin kan caam ikpak lo maw zeidek. 

Khah..! ka fa, zeikom siah, na lung i fim law, na nu le pa khuami le khuatlang, Khrihfabu le Lairam hnangamtertu, a dirkamhtu, a sersiamtu si dingah chunmang thar man hram cang mu. Na pa ka bia a fah deuh sual ahcun, ka ruatthiam te law, “Pa nih a dawtmi a fa cu a chimhrin tawn” ti kha vun thei peng hram.

Khah, za nu zunput ah kalpi a hau. Na naule nih le kan rawlṭam ti an si hoi. A mui pah cang i khua ka hmu ti lo. Hi vial hin za rih kun seh, mangṭha tuk law…

An dawtu, Napa

(Note : Faiceu Journal ah rak ṭial cangmi cabia a si)