Jesuh Nainnganzi

Jesuh Nainnganzi

Salai Joseph KB Thawng

Salai Zai Kual ngang nawn in khua a ruat. Salai Zai Ling Dun biaki, “Nai Zawng Daideh dih  cang hih” timi le “Zawng Parathlei nan si ko” timi phungthluk bia nih fak nawn in a khuaruahnak thluak le thinlung a huai. A nu…ka ti lo. Zeidah a chim duh. Zawng daideh hlah, dehlo hlah—ka thei naisaisariat lo, a ti.  

“A lubaan si vekvek lo ahcun zeibantuk organization le fellowship bu hmanh ah kan itel zuam lo. Khrihfa upa ṭuan le bang kan ihne men lai. A ngaingai cu, bu pakhatkhat kan dirh timi cu pakhat kan si lai, kan ifuntom lai, kan i naihniam hna lai, kan i daw hna lai i kan ṭuanṭi hna lai, tikhi a va si ko hnga cu mu. 

Asinain, bu kan dirh deuhdeuh, kan iṭhen deuhdeuhhna. Kan ihlat chin lengmang hna.

Pakhat ah kan ser lai kan timi zong pa linga pi ah kan ichuah. Hihi, kan chungah zeibantuk rungrul le zawtnak hrik dah a um hnga. A tlangpi in hun vuak ahcun, kan lungpuam bia rumor ti ko usih ca. Keimah ve, timi kan lungput a si ko hnga lo maw? Cal langh cu kan duh cio teh, minungfa nih. Asinain, calngau (calkau) paoh hi callang hlei an si lo cu mu. Pawpuar paoh hi  bawi le mirum an si hoi lo cuh. Mider paoh hi model an si dih hoi lo.

Biakinn chungah, i hawikomhnak ah le bu pakhatkhat ah kan Vuanci sinak, kan Doctor sinak le kan position kan iken peng ahcun midang caah zawtnak lungrul kan si tawn. Lungrual cu teinak a si, ti kan theih nain lungrual lo cu ṭhennak a si, timi kha kan philh sual tawn. Pastor nih, ramrian ṭuantu nih, Khirhfa upa nih, bu pakhatkhat i lu le baan nih kan hruaimi hna minung kha funtom le hruai si  loin a ṭhektu kan si ahcun a poi tuk lai. Laimi kan sining a tlangpi zoh tikah bu in kan kuai, lungput ah kan iṭhen.

Jesuh zong hi Kawlholh ihlan ahcun nainnganzi tama bak dawh a si cuh. Bible chung i Joseph hna kha atulio Kawlholh cun Egypt ram ah khanVungyigyoke pei a si cu. Daniel le a hawile hna kha politics affairs chungah an itel ve lengmang i Vuanci an si khah. Hei chim duhmi tu cu Daniel le Joseph kong si loin Jesuh kongtu a si deuh.

Chim ka duh bikmi cu  “Jesuh nainnganzi cu mi ṭhektu a si lo, mi funtomtu’ a si ti hi. Sifak le mirum, hmeinu hmeipa, mitcaw kebei le pumtlinglo hna cungah duhdanh a ngei lo. Mirum le bawi a si ai, tiin a upat hlei hna lo, a nehsawh hlei fawn hna lo. Misual a kan khamh. A ṭilmi a char, a tlawtmi a ruh, aa cheumi a komh, aa ṭhenmi a fonh, a tlumi a tun, a rawkmi a remh, a rilmi a thawh. Hi bantuk, Jesuh ṭekṭik hi kan Khrihfabu ah, kan zatlangnun ah le kan bu pakhatkhat ah kan tuahser taktak lawnglawng ah a nu le a pa a si hmanh na hliah lomi ‘dimokaresi le faderel saṭaih (democracy / federal state) cu kan hmuh ko hnga cuh!

Kawi Kual, ka chim duhmi cu na fiang cang maw? Acunglei ka chimduh mi pawl khi. Zawng nih dai a deh ciammam le ai sengh dih. Para an thlei i a dil na, a sat na an si cu awh, a donghnak ahcun amah lila tiang an i thlei dih,” tiah Salai Zai Ling Dun nih a hun hrilhfiah. Si si, ka fiang ka fiang, tiah Kawi Kual nih a lu voihnih a suk. Jesuh Nainnganzi nih Kawi Kual cu piang vuai in a kholh cang. Kan ram le kan miphun ah entai, zomhtaihnak le lungput ṭhalo, lungpuamnak, nawlngeitu si duh peng nak, hramhram  in mi uk itimh peng nak tehna kan hlonh tikah kan duhmi le adikmi Democracy le Federal State cu kan hmuh ve te lai.  

(Note :Ṭhinṭhang Mekazin ah rak ṭial cangmi cabia tawi a si)

9 March 2014