Vawlei Khuate Ah Lut Usih!

Vawlei Khuate Ah Lut Usih!

Salai Joseph KB Thawng

Biadomhnak

           Asia hi kontinent (continent) lian a si bantukin a chungah nunphung (cultures) tampi a um. Nunphung timi hi a ṭanh tukmi an um bantukin zei ah a rel theng lomi le a uar lo ngaimi tampi an um ve.Mah kokek nunphung a hmangmi an um bantukin hramhram in hmanhtermi nunphung a hmangmi tampi an um ve. Phundang cun, mi nunphung aa hrawmmi tampi an um kan ti hnga. Cucu, Asia lawng si loin vawleicung dihlak ah a si ko. Ramri kauhternak, ramthar tlaknak in Asia cu a hung karhcho chin lengmang. Micheukhat cu an pupa chan tein mi hohak (misual) an um. An nunphung zong zeirel loin a ummi tampi an um. Cun, cheukhat baak cu an nunphung an ṭanh tuk i midang nunphung le sining kongah ruahthiamnak an ngei hoi lo.

A bikin, nihin kan chan cu IT (InformationTechnology) chan a si. A luancia mi B.C.500 in A.D.600 kum  hrawng tiang hi hlanlio nunphung (early culture) hna cu an hung karh thluahmah i kumzabu 11 ahcun a ṭhathnemnak tampi an rak tem. Alexander Ngan (Alexander the Great) bantukin siangpahrang thar hna zong nih “nunphungthar” tete chuahpinak le karhternak cu fak ngai in an von dirpi ve. A.D.500 kum a hung si tikah caholh le biaknak phung cu “Manchurian” miphun nih an von karhter chin i “Islam Vawlei” (The Islam World) ah a hun icang. Azeikhom siah a luancia sining chungah  vung pil hna usih.

Persian Pennak

Kum zabu 6 hrawng ahhin, Cyrus Siangpahrang nih Iran miphun hna zong rualrem tein a rak uk dih hna. Caan rau lo teah Persian pennak (Persian Empire) a hung chuak. Cucaah Mediterranean rili in Indus tikulh tiang a rak uk. A pathumnak Persian uktu (3^rdPersian Emperor) a simi ‘DariusI’ nih “Top-down culture” timi ‘cungtang nunphung, asiloah a sannak in a niamnak ah a luangmi nunphung, asiloah, miphun pical hna nunphung kha miphun tenau hna tiang nih hman” timi nunphung kha hmang in a von uk ve hna. Cu nunphung cu fak ngai in aa tlaih lawng siloin “Zoroastrianism” timi biaknak phung zong a chuahpi. Cu biaknak nih cun, “vanchiatnak, vanṭhatnak, Pathian a um, Vancungkhua le Hell hna hi an um”ti a zummi an si i Jews, Christian le Islam hna tiang in a khuhchilh, hmanter (influence) hna.

Alexander the Great

B.C.330 kum hrawng ah Macedonia ram siangpahrang a simi ‘Alexander Ngan’ nih “Persian pennak” cu a chuh i Greece ram in India ram tiang a ram cu a kauh ve. Cu tikah a ram a kau thluahmah i a min cu vantawng in a thang. Asinain, Alexander cu thinlung cancer in B.C. 323 kum ah a nunnak a rak liam. Alexander Ngan a thih hnu ah a pennak cu cheu thum (ramthum) ah aa cheu. Nichuahlei le nitlaklei cu nunphung pakhat, asiloah aa lomi nunphung (mono-culture)  hi hmang peng hna seh ti hi a saduhthah a si. Cucu, a thih hlan deuh ah a kuttang ralbawi hna nih an tlamtlinh khawh. Caan tlawmpal hnu ah a kuttang ralbawi pathum nih “Karik nunphung” (Greek Culture) hman ding tiah awdar an rak chuah. Cu Greek nunphung cu Bactria  ram tan in  Asia ram chung tiang a hung lut, hman a hung si.

Umhmun fel tein a khuar lomi “Kushan” miphun nih Bactria miphun hna an tei hna hnu tiang zong ah Greek pennak le nunphung tete cu an um peng rih i hman an si peng rih. Aruang cu uktu thar pawl rengreng hi Hellenism tiah kawhmi, “Greek nunphung a uar ngaitu” le a ṭanh bakmi minung an si caah a si. B.C. 250 kum hrawngah “Parthia” a von chaangtu Arsacid  nih  Asia kontinent cu a von mawngh ngai ve i Asia chawleh chawhrawlnak le zuarthlainak vialte zong a von tlaih dup hna.  B.C. 224 kum ah Parthia cu Persian Sassanid nih an von tei ve hna i an nunphung cu Asia continent chung lawng si ti loin vawleicung dihlak bak ah an karhter.

Cun, Persian nu pawl thuamthil siseh, kutzung thiamnak siseh, an nunphung siseh, an biaknak hna cu Asia continent nichuahlei he nitlaklei he an karhter. Cucaah, kum zabu pakhatnak chung ahcun Karikholh cu sipuazi lei le cozah rian he aa pehtlai mi paoh ah vawleicung khuaza nih an hmanmi holh (Common language) ah a hung cang. Cu bak ahcun Karik miphun le Rome miphun hna cu Asia nitlak thlanglei kap ah umhmun an khuar colh. Cuticun, kum zabu 4 (4^th century) ah Byzantine pennak (Byzantine Empire) a hung chuak.

India miphun nih ramri an kauh

India ram chaklei cu Alexander Ngan nih a tei i Asia siseh, Karik siangpahrang hna si hna seh a von uk hna. Cuhlan India ram nunphung pakhat zong nunphung pahnih ah a hun icheu. Kum zabu 2 lioah a rak laar ngaimi Greco-Buddhist timi, India ram nitlak thlanglei ah an hman ngaimi, “Milem asiloah zukṭuh biaknak” tete hna nih Greek Philosopher pawl zong a hun hiip ngai hna. Asia laifang ah a ummi Kushan miphun hna nih India nitlaklei cu kum zabu 1 ah ral an tei hna i India nunphung cu a hung karhcho thluahmah. Cu tikah Buddha biaknak cu an von bia hna. Cuti i thlennak cu Asia kotinent ah a ṭhangcho ngaimi khualipi hna le a bikin Tuluk ram ah an hung karhcho.

Tuluk nunphung  a ṭhangcho

B.C.206 in A.D. 200 kum tiang hrawng ah Tuluk Han siangpahrang nih Pacific rili in Tarim tikulh tiang a ramri a kauh ve. Tuluk ram chaklei ah ralkhamnak caah siseh, sipuazi tuah tik luhchuahnak caah “Ralhau vampangpi”(Great Wall: cu vawleicung thil khuaruahhar bik pa10 lakah aa telmi a si) an sak. Persian, Arab, le India sipuazi tuahtu pawl cuTuluk ram nichuahlei in Han khualipi ah an rak lutchuak tawn. Cu tikah an nunphung le an sining cu an icawn i, a ṭhangcho ngaingai.

Muslim le Mongol

Kum zabu 7 in 17 tiang ah Muslim le Mongol miphun hna cu an ṭhangcho ngaingai. Asia continent kipah hmunhma an laak lawng si loin “Urup”(Europe) continent hmanh hi a hrocer ngammi miphun an si. Mongol le Muslim hna karah raldohnak tete a um bantukin, rualremnak tete zong a um tikah an thazaang a hung tlung chin lengmang veve.

Hmunkip ah Muslim an karh

            Arab vawlei (the Arab World) ahhin kumzabu 7 hrawngah Mohammad cu Pathian (Allah) lamkaltu a si, tiin an zumh. Vancungmi Gabriel nih “Pathian duhnak kha nan zulh awk a si” timi kha Allah sinah a phuan i a rak au pi. Cu bia cu an Bible ca (Quran) zongah a um ti a si. Allah (Pathian) duhnak kha tlamtlinter nakhnga Muhammad nih cun raldoh ding kha fakpi in a forhfial hna. Byzantine, Persian, Babylonian le India nunphung hna cawhmeh hrup in dirhmi Islam rampi cu Islam miṭhawng hna nih an rak uk. Mohammad le a ralkap hna nih cun hlanlio Arab siangpahrang hna umnak hmunhma vialte cu an doh i an tei. Cu tikah an ramri an kauh chin lengmang i India in Spain ramtiang an rak tei. Mohammad nih aa tlaih bik mi cu Arab holh le ca a si i, an Bible ca (Quran) zong Arab holh in ṭial a si. Cuti a ṭhawnnak a kauh tikah Pathian (Allah) duhnak kan tlinter an ti. Cu tikah vawleicung khuaza ah Muslim cu an hung karh thluahmah.

Tuluk le Mongol pennak

           Tuluk ram cu Tang siangpahrang chan ah an ṭhawn pinah nunphung aa thlengmi tete ruangah Islam nih an tei kho hna lo. Tang siangpahrang chan (618-906) cu a ṭhawng tuk i Japan ram in atu Tuluk ram nitlaklei tiang khi a rak tei. Cun, Zen Buddhism a karhter hna tikah Japan miphun hna nih an uar ngaingai.

         Mongol pawl hi ahlan ahcun Asia ram chungah a ummi an si. Genghis Khan cu nawlngeihnak vialte an rak peek. Genghis Khan pen nak an peeknak a ruang cu Asia kontinent hmunhma ṭha hna le Tuluk ramchaklei le thlanglei hna si hna seh, a tei dih hna pinah ramrian (politics) a thiam ngaimi a si caah a si. Cun, anmah tefa hna hi an ṭhawng tuk ve i, Turkistan nitlaklei le thlanglei vialte an laak dih pinah Iran ram le Russia ram hna tiang in an tei i Mongol pennak (Mongol Empire) cu an kauh. Cun, Tuluk ram chaklei le Korea ram zong a rak tei. Mongol miphun nih cun, chawleh chawhrawlnak, ramdang khual tlun-inn onhnak le khualtlawng lamli mi hna cu “Mongol nan-daw”(innpi) ah tlun-inn an onh hna i cu hna sinah cun an nunphung an thlenmi tete zong hromh in  an fehter, karhter  (sharing culture) chinchin hna.

           Amah belte, can a hung rauh tikah, Mongol chanlila (1368) ah Ming siangpahrang nih a tei hna. Aruang cu Mongol chan ah ziknawhnak le eihmuarnak, ngunkhuai kholhmi tam deuhnak, ti lianh ruangah rawlhralnak, le mangṭam le fir le tlai tete a tam tuk ruang ah a si. Cucaah, kum zabu 14 in 15 chungah Mongol pennak cu aa rawk cikcek.

Biadonghnak

            Zeithil hmanh hi zungzal in a hmun mi an rak  um lo. Dotkhat hnu dotkhat in thil cu aa thleng lengluang ko, aa thleng lengmang rih lai. Siangpahrang pennak zong a hmun kho lo. Nunphung zong an hmun lo, remh, zuh le chap lengmang an si. Nihin ah kan hmanmi, kan kilven ngaimi, kan sunhsak ngaimi nunphung hna zong hi chan sining le cozah uknak le ramhruaitu hna hmang in tampi aa thleng kho. Cun, nang miniam (second class)e, nang misang (first class) e, nan nunphung (culture) cu khatin a si e, cutin a si e, tbt. thleidannak kan ngeihmi tete zong an hmun lai lo. Kan nehsawh mi pa kha thaizing ahcun a kan uktu a si kho. Nihin ah kan duh lo bik mi nunphung zong thaizing ahcun kan hman khawh. Aruang cu aa thleng lengmang mi uknak, ram, vawlei le chantiluan ah a ummi kan si caah a si. Cu vialte cu kan tei khawh nakhnga a luan cia tuanbia le sining hna le nihin kan chan sining le ukning phungle lam he cuaithlai kep lengmang  i, fimnak kan i laak i,  kan i laak bantukin kan hman ahcun “vawlei khuate ”(Global Village) chungah kan lut kho lai.

Ref: Lay Lay Moon ṭialmi “Vawlei khuate ah lut usih”  tiah Teen Magazine”No.53, March 2007, p-106-109  a rak ṭialmi kha aa tlakning in lehmi le pehtonh mi cabia a si. 

Note : Hi capar cu JBC (Khamhpat) Golden Jubilee Magazine ah rak ṭial cangmi cabia a si.