December Hrik (3)

December Hrik (3)

 (Pu Hit Hnin le Pu BuanCem biaruahmi)

Salai Joseph KB Thawng

1. December thla ngai hi eh. A zeiruang ahhin hme dek kan va ursaih khun.  Kannih techung cu kan zia le ka kel a puang hoi ko hme cu, tiah Pu Hit Hnin nih.  Ziah, zeiti zia le kel puan hme, tiah Pu Buan Cem nih. Zoh hme, ka fale hi minung hleihnih (dozen khat) bak an si cu mu. Pakhat a ra, ka pa angki le bongbi cawknak. Ka pa, kedan cawknak. Pakhat nih pocket money ti asi. Ka pa, ka pa ti lawngte. A chaplo ah kan nu aa phua ve hoi cuh. Mi tarpi ko thlak nih. Masi ah thilthar aa hruk lo mi paoh dantat a si lai, hei ti bang.  Hi zatzat fa ka hrin hna zong hi kaa chir ko cang eh. Ei…patlingpi nih cu bantuk biachim cu, ma.  Na zufa cu vun sur lawlaw ko khah. I sum le i ran zong cu dawh na ngeih fam lo cuh. Zei cu maw kan ruah, zufa hin December cu dong ve ko sih hih.    
2. Salai cheukhat cu kuli an i ṭuan seek rua. Thilthar cawknak lawng hlah, nungak ṭuainak  pocket money kan ngei lai lo, ti an si rua. Aw, Mizo ram kuli ṭuan tlungka cu nungak meet an tong deuh cu teh. Aw fam eh, Mizo ram in samsensi le khaini an phorh cang ahcun lengleh cheukhat cu an hloh ko hna hme cu. Khuapi ah taang 9 le 10 a cawng mi kan fale nih khin le Kawlholh le Kawlhla he i ṭhen bak hna hlah. Asullam theih ṭung lo, pei fitfet tete khin. Keimah ve tein lam an kal ah an ṭang a uak nawn khi mu. Taang 10 cawng pa telebang cu, video an va zoh rua khah. Nga-maan nih tilawng a perh i minung vialte ti chung ah an tla rua. Ai thawh demmam le, “Aw Kawl nih, “Nga-ta–kong-congh–tahle-lung -poh” an timi pei a si ko khi, zaangfak tete in” a ti hoi eh. 
3.  Carol zaanvah a si cang lai. Babucawng puan chan a si ti lo nain, puan dang a paw hoi. Leng ṭul le vaalbuang pawl puan i zawn khi cu a phung ah hei chiahpiak ding. Taang 8, 9 le 10 hrawnghrang mino pawl hi an mak. Theih lo an thei, ngamh lo an ngamh. Aw fam, Innping sapang an ṭih bak lo hih. Coral zaanvahnak hla “Lawmhnak thawng ṭha he nan sinah kannih kan ra cang” timi khi “Ngaknu tlangval puan zawng in nan sinah kan ra cang” tiah sak sisehlaw mino cheukhat cu an hallelujah a ṭha deuhving lai si. December thla an ti ti hoi rua lo, ngaknu tlangval puan zawn thla ti a si cang leh cuh. Kan hri le kan rai ngai hi, hawi rai maw a si mah rai hme dek eh. Aih, mi hrik cu a si lai lo, mah hrik  ṭheo a si ko lai.

(Note : Deirel  Cazual ah rak ṭial cangmi cabia bultan a si)