Ka Duhmi Ngaknu Tlangval A Ngei Cang

Ka Duhmi Ngaknu Tlangval A Ngei Cang

Salai Joseph KB Thawng

Salai KB Laikhal, Salai KB Laikhal, zoh khih, zoh khih! Ala… ala! Salai Zai Ling Dun a mit ai taar, a ngong. Lam lai ahcun arko in a dir. Kehlei ah ka lu ka hun thluk ve. Huamsam tein ka mit cholei ah ka hun tun. Zeipipa ah ruat cungcang lem lo khin ka hun bih ve. Um…cu tluk muidawh le tungtai rem khawh cu dah. A pumrua a hei idawh khawh ning. A liang tang tiang a hung zaam mi a samthlai rem. Din nawn tein a senmi le fak tuk loin a kirmi a samfang hna thlihir sinah an laam. Nungak a sinak hmuihmer  cu thlizil nih ka hnar chungah a hun hruai. Cu rim ko cu mitchinh buin fak nawn in ka dawp. Ka hnar in ka chungril  chung tiangah an ikhumh. Camh siidin bang ka nunnak a mawn.

Maw…Minu, motorcycle si law cu ka pa cawk kan hauh ngenge. Jean bawngbi si citcet, ka nu phaisa fir in cawk hmanh  kan ngamh hnga. Senri par si law maw, kan ṭawh khawh lo hmanh ah kan hreitlung tailo pi hin kan hau tengteng. Sakhi si sual law na ṭum lo le na tlat lomi sih tiangin kan bawh hnga, ka tenglam hin kan kah ngenge. Sakuh si sual law, kan maino cu nangmah thawhlawm an si hrimhrim. Vanzuang (va) lebang si sual law zeitik hmanh ah riit ka dawn lai lo. Kan kawm (fangvoi) hmun le kan zolo cu na rawlruuk siding ah Kawlram acozah sinah minsen ka thut tengteng :D

+++++++++

Cacawn nithumni hi zung ka kai lo. Salai Zai Ling Dun le Habakkuk Tei Kap belte an i manh lo cingling ni a si. Salai Buan Sang le Enoch Luai Lian belte an kampani a simi, EṬ Kampani (Eichuak Ṭuanzaam Co., Ltd.) in an off ni ngelcel a si ve. Cu ni cu Hledain (Yangon) ah khin “Ice Berry” dawr ah miphung-sakel cun kan va ṭhu ve. Ataktak ti ahcun ngaknu le tlangval (a khuahkhuah in) an ṭhuttonak le dating an ituahnak dawr khi a si. Hawidang a khuahkhuah in tlengkhat ah va bang an ṭhut lioah Laikhal khalthum cu tlako in ka va ṭhu ve. Mi hmai cu kan khap ziar lo hmeteh. Salai Buan nih, “Ningzak kan si, lamnai ah a ummi kan hawinu Iang Khirh Zing tal hei kawh ding a si” a ti. Luai Lian nih a duh naisai lo. “Iang Khrih Zing, hi tluk ai dawh lomi pi cu maw kan kawh lai, cu nakin nudok padok tlangval Iangku kha hei sawm deuh u” a ti ve huar. Keinih, kan lawi tuan ah a ṭha deuh lai, ka ti ve hna.

Elaw… Minu le a hawinu an hung choi ve ko ai. Milai Laikhal velobang ka ngong, ka mit ai taar hoi ko. Salai Buan nih hitin bia a ka hal. “U Thein Sein acozah hi zeitindah na hmuh” tiah a ka hal. Ka ngong tikah zeitin fawh ka leh? “Ka duale, ai dawh tuk hme cu…” tiah ka leh huar. Ka cal a hun ka kingh hnu ceo ah minung ka si ka hun ifiang ṭhan. A thlumthlam loin sahngar bang hun nam duak hna ka lungah a chuak. Hmaitonh in kan ṭhut tikah kan mit cu atuletu aa tong. E…, Laipa, e… Lainu, ti phun khin kan imeet nawn veve, kan mirh veve kan ti lawlaw lai. Kan theih cio bang khuapi le hmunpi, a bikin Kawlram (tc. Yangon khua) hna ahcun Lainu an si zongah mi hmai ah duhpaoh in chawnhbiak ngam an si lo cu mu. Ka thin hih, ka thin hih!

Enoch Luaite hi mihuaisen, micalcang cu a si ve hrim. A sangmahrang khin a hei i fuh top hna. “Laimi nan si ko lo maw, nanmah pahnih lawng maw” a vung ti hna. “Aw, kanmah telawng kan si ko” an ti. “Si cun, kanmah pathum lawng kan si ve. Ra ngat u, kan ṭhuṭi hna lai cu” a vung ti hna ai. A hmai an khah lo caah ningzak nawn khin kan sinah an hung iṭhial. Elaw…ka lo, ka lo dipdep hoi ko. Ka far, nai dawh tuk, kan uar  tuk, ti chim nih a ka hiar khawhning. Buhrit in ka hri, a ka pah tuk. Ruahlopi in a kut tlaih ka hun timh hoi ko. Ka zaa ka hun chanh rualrual cu Salai Buan nih ka baan  a bengh i ka riitnak in ka hung fim hoi. Minu zong cu a hmai a hung sen. Ningzak nawn khin aluu aa khun pah buin a mirh.

Ka farle pahnih cu khoika in, Yangon ah zeidah nan tuah, nan min hna aho tiin dah kan in kawh hna lai, tiah kan hun hal hna. Minu nih, “Kei hi Mawite ka si. Ka hawinu hi Dimdim a si. Sianginn kan kai i kan dihka te, rian kan kawl cuahmah lio a si” tiah theihternak a hun tuah. “Ka ṭale hna nannih  tah, aho tiin kan in kawh hna lai?” A aw cu, a aw cu, a thlumning, a nemning, a panhning, ka thi deng hoi ko cu teh---nung hlahning law thlanmual ah nan ka vui diam ko hnga.

Theihternak tuah kai ngaih tuk ve le hitihin. Nan kehlei pa hi Enoch Luaite kan ti. EṬ Kampani ah Managing Director a si. Anih hi ngaknu thingphurh zulh, ngahringdawi i taalkalh ṭhawng kan ngeihmi tlangvalṭha a si. Amah belte, thlalang le samthih loin rawl-ei hmanh a zuam lo—Habakkuk Tei Kap he cun an idang dom :D. Cun, nan orhlei pa kha Salai Buan kan ti. Anih zong hi EṬ Kampani ah Project Manager a si ve. Anih hi an khua ahcun nuhmei kutlaih (widow-hand) a si, an bochan tuk. Sosiam le tuhmuicer hna a thiam. Amah belte ṭamhmoih ah a daitlang ngai—Salai Zai Ling Dun alo lo :D. Ehem…cun, kei hi… (Enoch Luaite nih anih hi Salai KB Laikhal kan ti, a kedil a kak, meithal tlaih i ramvaih ceo a thiam le Laikhal tiah min an sak, a hun ka ti huar—ka kaa pit deih). Thideng in kaa i hup pah bu le i ngamhtlaknak mithmai he Mawite le Dimdim zong an hung ni len ve. Kan pawng Kawl pawl belte nih kan holh thei ṭung hna hlah kaw an kan meet ziar :D

++++++

Mawite he kan i theihnak le kan i komhnak thlahnih fai a si cang. A kong ruat loin zaankhat hmanh kai hngilh colh bal lo. Ka thinlung mitthlam (saihkuzin) chungah amah he duhnak tili ah ihnim ta loin mang ka man ti lo. Asinain, kan duh ti hmanh ka phuang ngam rih lo. Cu nakin boyfriend a ngeih cangle canglo hmanh ka hal ngam rih lo. Aruang cu a fimnak, a mi chawnhbiak thiamnak, a mi komh thiamnak rap nih a ka foih. Ai dawhnak tili ah ka pil ning a fak tuk sual i ka zah tuk hringhran. A hmaika ka phanh ahcun ka thinlung a ril, ka lamhmi vawilei hi lihnih bang ai hnin. Ka tawzat cu chim hlah, ka hnakhaw thling tiang a za. Ka arsam le ka hmulthi tiang in an ling dih. Cu tluk cun ka nunnak a ka hip.

Voikhat chun cu ruahlopi in Salai Buan nih, “KB, Mawite kha boyfriend a ngeicia mi a si, an ti” tiah lau nawn in a ka chimh. Cikhat cu ka lau, ka ngong. Asinain, a ngah lo, ka zum lo, ka duh fawn lo, ka siang fawn lo, a si kho fawn lo, keimah lawng a ka duh awk a si, tiah lungcaw nawn buin ka thinlung li aa hnin. Cu bak ah cun aw…Mawite cu a boyfriend kehlei baan tlaih buin kan hmailei in an hung choi taktak ko ai. Ka thinhung tuk i Salai Buan lehlam a thaphet ah phuk, tiah ka chuih. Ka dakdak pah bu khin ka kehlei ah, thui… tiah ka cil ka chaak ka ti hoi cu, Kala pitar kepi cungah ai bat hoi—nawisen kan hnuk.

 

Aw…minu, na muidawhnak nih ka mit ai kalpi. Ka thinlung zong ai kalpi. A thlummi na mithmai le na mi chawnhbiak thiamnak nih ka sining le ka chunmang ai kalpi. Ziah, tuante ah kan komhning le kan uarzia cu fiang tukin naa theih komi, boyfriend ka ngei cang, na ka ti lo. Minu, na leitang in a luangmi na veelhle tamtuk in ka din sual tikah ka paw zong a fak, ka luak he kai ciah. Kai tlum naloin a awng ti lomi na sining ah kai tenh, kai tap, ka chuak kho ti lo. Vok sahang bang ka kam/lei na ka lawi dih. Thakbare zong ka ṭam ngam ti lo :D.