Pumtlinglo hna he biaruahnak

“Pumtlinglo nih ZU an zuar, timi hi cu biavaivuan a si. Ataktak ti ahcun kanmah pumtlinglo nih cun ziah zu cu kan zuar lai. Khoika Zu Laisen dah kan cawk khawh lai. Zeitindah kan zuar ngam lai”—Pu Thawng Hnin.

 Pumtlinglo (Disables) 

hna he biaruahnak

Pu Thawng Hnin (Chairman), Editor, Pu Tei Hup (Treasurer), Pu Hmung Lian (Secretary)

 Nan rianṭuannak hi zeitik kum indah nan thok cu? Ahote hna he dah nan dirh?

            Kan rianṭuannak hi 2009, June 8 ah kan thok. Kan dirhka ahcun Hngerhte Chungkhar (Ant Family) tiah min kan rak isak. Kanmah pumtlinglo (disables) pumpak minung 7 nih   committee kan ser i kan dirhmi asi.

Aw… asi maw, Rev. Dr. Peter Al Ceu nih a dirhmi asi, tiin kan theih cu! Asiah, anih hi sponsor an kawlpiaktu hna maw asi kun.  

   Asilo. A dirhtu hi kanmah pumpak minung pali kan si. Pu Thawng Hnin (Chairman), Pu Hmung Lian (Secretary) Pu Tei Hup (Treasurer), le Ngun Hnin Thang (member), tiin kan dirhmi asi.

             Cun, Sayama Sui Hniang, Mai Mang Sui Nawn @Kuku le Pastor Duh Sang, Rev. Neely Lai Uk, le Lalawmpuia, tbk. hna nih ruahnak tampi an kan peek. Cun, Bu kip  in Pastorte, Khrihfa upa le a lengin society dangdang ah upa hna kha ruahnak petu (Adviser Board) ah chiah an si. Rev. Dr. Al Ceu cu   ramchung ramleng ah sponsor a kan kawlpiak biktu pakhat asi.

Hi nan rianṭuannak ahhin ramchung ramleng bu pawl hna hi pehtlaihnak nan ngei maw. Ahodah an bawmchan biktu hna an si? Mirang nih tah an in bawm kho hna maw?

        A kan bawmchantu hi ramchung ramleng minung an si ko. Mirang nih an kan bawm lo. USA, Australia le Denmark tbk. Chin Khrihfabu hna nih an kan bawmhchanh bik.

USA, Australia le Denmark tbk. Chin Khrihfabu hna nih an kan bomhchanh bik. Cun, Rev. Dr. Peter Al Ceu zong 2010 kum lioah paam bawmh awk ah a rak tlung. Cu ah cun kan chimh i amah nih tampi a kan tawltrel. Amah pumpak zong nih phaisa in siseh,    computer, cycle cawknak, camera le rawl    cawknak, tbk. tiang zong a kan bomh.

Nanman Disables minin VCD an ichuah tiah kan theih. Zei bantuk ruahchannak he dah nan chuah?

           “Nungna Vansang” timi tlangtar in Vol. 1+2 tiang kan chuah khawh cang. Hmailei  zongah pehzulh kan itim. Kan duhnak cu “Laimi hmunkip ummi hna nih pumtlinglo hna kan cawlcangh le kan sining hi kan hmu ve hna seh, kan thei ve hna seh, ti kha asi ko. Pathian thawng le dawtu hna thawngin atu inn kan sak liomi zong hi VCD kan chuahmi thawngin kan sak cuahmah mi asi. 

Nan itinh bikmi le nan ihmaitlak taktakmi rian pawl a tlangpi in nan ka chim kho lai maw?

           Kan itinhmi hi ka chim dih kho lai lo. A tlangpi in chim ahcun “Pumtling lomi hi pum cheubaang kan si bantukin micheu nih cun minung ah an kan ruat lo. Cu tikah pumtlinglo cheukhat cu an moral a dih/der tawn. Cu moral derthawmnak vialte cu kan hloh khawh nakhnga le pumtlinglo zong nih rian kan ṭuan khawh ve ko. Kanmah ke cungah dir in a paw aa cawm khomi kan si ve ko. Kan thiam kho ve ko. Kan hmuh khawh ve ko” timi thinlung thar an ngeih khawh nakhnga hi asi bik.

           Cucaah, cu thazaang ipeeknak training (awareness) zong kumkhat ah voi 3 lengmang in kan tuah.  Cun, pumtlinglo nu/pa a hartuk mi kha bomhchanh, thazaang peek, sianginn kaiter le minung ah ser kha kan itinh bikmi cu an si ko. 

An sak liomi inn

Asiah, naihrawng biachokvai tete kan theihmi, “Pumtlinglo nih Zu Laisen an cawk, an zuar” timi hi biadik a si maw?

               Asi bak lomi asi. Pumtlinglo nih ZU an zuar, timi hi cu bia vaivuan asi. Ataktak ti ahcun kanmah pumtlinglo nih cun zei zu cu dah kan zuar lai. Khoika Zu Laisen dah kan cawk khawh lai. Zeitindah kan zuar ngam lai.

         Amah belte, mino cheukhat hi an hung kan leng. Zaan ah an ṭhu i Zu an rak iken. An dinnak zuthawl kha an chiahtak tikah cucu a theithiam lomi nih Zu an zuar, an kan timi asi. A taktak ti ahcun hika hmun hi apanphi-sakhaan phun asi nain zu zuarnak caah kan sak/tuah mi asilo. Kan khuasaknak, kan cawlcanghnak ding le training tehna kan ipeek nakding caah kan tuahmi asi. Pumtlinglo hna sinah zu iken in an hung kan dinhnawh hi cu kan poi ngaingai ko.

Biacah nan duhmi a um ahcun…

           Pathian nih zute le vate zong rawl loin a chia hna lo. Kannih pumtling lo zong Pathian le dawtu hna thawngin nihin tiang kar kan hlang. Hi hnu hmailei zongah thinlung in, ruahnak cheuhnak in, thlacamnak in Lai      miphun nih kan dirpi peng ko u, tiah bomhhal le biacah kan duh hna.

Bia nan ka ruah caah kaa lawm.

         Kannih zong kan ilawm tuk ve. 

 ###