Christmas Ah Chungkhar Kan Tling Ti Lo

Christmas  Ah  Chungkhar  Kan Tling  Ti Lo

                      Salai Joseph KB Thawng

Zahan cu 2005 lio ka diary ṭhingte ka kau. Caan saupi  rel a hlawh ti lomi ca. A buar pah nawn, ka hei cheem pah khin tlaapkhat hnu  tlaapkhat ka kau i ka rel hna.  Kum 2005 lio kan khua  Ngun Tum techung nih Christmas an kan tuahpiaknak  note  kaa tuahmi ka rel. Christmas  zing chungkhar pumhnak kan tuah lio, chungkhar tling in rawl duumṭi lio hna ka mitthlam ah an cuang. Ka ihkhun cungah zau pah khin ka von rel i  liamcia caan le nihin cuaithlainak in ka nunnak ai mawng.

Ka thawpi phung…tiah ka chuah. Aw…keimah lawng ka si lo. Mi vialte nih kan rak tuar cio mu. Aw…nihin (2012) Masi ahcun chungkhar kan tling ti lo. Sunghno nupa, chuahsempi le khukṭhi rualhawi an bau riangmang. Maw…ka pa, maw ka nu, maw ka u le nau hna aw, tuzing cu kan tling ti lo. Khoi hme nan si dih kun e.  Ziah, chungkhar nan kan kaltaak. Van Bawi Fahniang chuah caamtuak lawmhnak puai ah kan in hlam hna e. Rauthla tal in kan leng ulaw. Nan zuunṭhing lawng a thar i kan mitthlam in nan liam kho hrim lo. 

Maw..ka pa, Masi zing chungkhar pumh na rak kan hruai tawn. Maw, ka nu aw…Masi zing na kutzung rem dawh in chuanmi tirawl kan hlam e. Maw...nute le pate, ka nu thaizing khuadei deng maw, Masi kan phan deng maw tiin Masi nan i ngaih tuk tawn mu kha. Asinain, Masi zingah  nan muithlam a de ti lo. Khoi hen nan si kun. 

Maw…u le nau, khukṭhirual le Lai fadawt hna atu khoi hen nan si dih kun. Semnak kan nu Lairam nih an hlaam riangmang hna. Masi zing sunghno chuanrawl nih a kan thawt ti lo.  Kan mit a beu, hoizoh kan hngar i kan van a sang riangmang. Khuaza kan hoi, innpa chakthlang kan bih, nan muihmeel a tlau kho hrim lo.  Aw…vawlei ngai hi mu, kan khualtlawnnak hmun ceo an rak si. Kan duh lo zongah, kan i sian lo zongah, kan hrial len zongah ṭhennak caan kan phan te lai mu.  

Nihin cu ka dawt, kaan ngai riangmang. Nihin cu ka Pa, kan hlam ruangmang. Nihin cu ka Nu kan kawl len e. Nihin cu khukṭhirual le Lai fadawt hna mitthlam nan cuang i kan hlaam riangmang hna. Chungkhar kan tling ti lo.

  

(Note : Deirel Cazual ah rak ṭial cangmi cabia bultan a si)