The Me N Ma Girls@ The Tiger Girls

Kawlram Hlasakthiam Phu,
The Me N Ma Girls@ The Tiger Girls
Lakah Chin Nungak Ai Tel Ve

 

The Me N Ma Girls@ The Tiger Girls hlasakthiam phu cu 2010 kum Myanmar's New Year Festival, Thingyan tuah lio in minung panga thim an rak si. Australia in laamthiam, Nicole @ Miss Nikki bawmhchanhnak thawngin le U Moe Kyaw le May nih a herhmi phaisa dih in an rak tawlrel (entrepreneur) mi hlasa phu an si. 

A hramthawk ahcun "The Tiger Girls" tiah minsak an si nain U Moe Kyaw nih 2011 kum ah "The Me N Ma Girls" tiah a thlen (cheukhat nih anmah Me N Ma Girls lila nih an thlen, tiah an ti). Nu lawngte fonh in pop hip hop dance lei in a hmaisa bik dirhmi phu a si lai, tiah ruah an si. Anmah phu hi Kawl hla siseh, abikin Mirang hlasak in minthang mi phu an si. 

Mah phu ah aa telmi hna cu : Ah Moon, Cha Cha, HtikeHtike (Tie Tie tiin awchuah ding), le Kimi (Amah hi Chin, Falam mi a si i Ma Kim ti zong in theih asi) hna an si. A hramthawk ahcun Wai Hnin zong aa tel ve nain ai ma lan. Avoi 1nak hlaphel (album) cu 2010 kum ah an rak chuah.

Mah hna phu nih an sakmi hla pawl hi a tam-u cu ramrianlei (political) deuh an si, tiah zapi nih theihmi an si. Bia an chim tik zongah ramrian he pehtlai in le ralkap cozah nih kum 50 leng an kan pennak lungfahnak kong kha an chim tawn. Cun, USA an tlawn lio (2012) zongah "Come Back Home" timi tlangtar in  kan ram hi daihnak ram, adikmi democracy ram a si khawh nakhnga tuanti usih, sati usih, tiah an aupi, hla zong an sak. 

Hi, Me N Ma Girls hlasakthiam phu hna cu atanglei bantukin an si hna. Ah Moon @ Baby cu Myitkyina (Kachin State) in a rami a si i YUFL, Yangon in Russian holh a dihmi a si.  Kimi@ Chilli cu Falam khua (Chin State) in a rami a si i Mathematics in Dagon University, Yangon ah degree a lami a si.  Cha Cha @ Missy cu Yangon in khuasa a si i  Zoology in Dagon University ah a dihmi a si.  HtikeHtike @ Electro zong hi Yangon khuasa a si i graphic design in University of Computer Studies, Yangon le Wai Hnin @ Tricky (an phu in a chuakmi) cu chemistry in University of East Yangon (Tarwa), tbt. ah degree a hmu cangmi an si hna.

A theicia mi tampi lakah a thei deuh lomi hna caah tialmi a si. Fiang deuh in theih a duhmi nih cun YouTube ah siseh, web ah rel khawh an si, a tawinak tein ka hun tial.

 Atu belte an phu in an kuai dih cang, tiah kan theih.