2013 Kawlram Zukcawl Academy Peek Puai

2013 Kum Ca,  

Kawlram Zukcawl Academy Peek Puai

Hi kong hi a tialmi nan um rua lo(?). Cucaah tlawmpal tein ka hun nawnnok. Kawlram Zukcawl Vawlei ah Academy laksawng peeknak hi a luancia 1952 kum lioin thawk cangmi a rak si. Kawlram uknak chiatkhat cu kan theih dih. Media nih uico bang a hun boh (watchdog) hnu ah tampi ai thleng. Zukcawl thlaknak zong nih tampi a tunmer. Academy laksawng peek puai cu zapi nih kan ingaih ngai ciomi asi. Kumkhat a liam hnu ah thim asi theo. Tukum 2014 zongah a luancia kum 2013 zukcawl pawl kha thim asi.

Thimnak ah tuanvo ngei pawl hi thangchiat an tong ngaite, kumchiar in. Mipi siseh, lemcang fidi fitlaw pawl zong an zai a tam ngai tawn. An mawh lo, Kawlram ahhin zeithil hmanh ningcangte le phungningte (legally) a um lo. Rutreu le ziknawh lawngte in thil a kal. Gen. Ne Win hnu (1962) in mi vialte kan lungput le kan zia a rawk lan, lih fa lawngte, kan mawh lo hei ti koning.

2013 kum ca Academy cu Zukcawl vawilei ah kum 20 khengte a rak ithla cangmi Khine Thin Kyi le Min Oo nih lemcang bawm thiambik Fidi-fitlaw (best supporting actress and actor) an hmuh. Khine Thin Kyi nih Sone-pyu (black sheep) zukcawl ah le Min Oo nih Nin-say-yin zukcawl ah an hmuh. Hi hna pahnih hi thapetu nih a luancia kum liopi khan laksawng hmu tlak ah ruah an si nain, tukum ceo ah an min a hung lang. Cu lawng hlah, Director thiambik Wyne (best director) zong atuceo ah Satan-ye-ka-che-the (Satan’s dancer) ah laksawng a hmu. Hi bantuk tete ruangah tawlreltu thangchiat an ton tawnnak hi asi.

Zapi nih uar ngaimi Wut Hmone Shwe Yee nih lemcang Fidi thiamnbik (best actress) le Pyay Ti Oo nih lemcang Fitlaw thiambik (best actor) cu kumhnih pehtlai thliahmah in a hmuh. Nin-say-yin (As you like) zukcawl ah an hmuh. Music lei ah Piano Tin Win Hlaing nih Kyal-sin-maw-gone zukcawl ah a hmuh ve.

Tutan ah laksawng an tuah lomi a um. Best editing, best child actress, best sound, best cinematography, best picture, le best screenplay, laksawng phun 6 rori an tuah lo. Cu ruangah bikah zapi thapetu le lemcang zawkcawl vawlei ah ai telmi hna zainak aw a chuah khunnak asi. A luancia kum lioah lemcang Fidi Nawarrat zong nih media le thawngzamhca tampi ah, “Academy ka hmuh ko lai” tiah thawng  a rak zamh len. A hmuh lo caah a ningzah he a thinhun he, “Kai ma cang lai, kai thla ti lai lo” a rak ti phah.

Kawlram Zukcawl Vawlei ah Chairman asimi Academy Lu Min “2013 kum ca laksawng hi kai ruahchan ngai ve ko. Asinain ka co lo zongah Zukcawl vawlei Chairman pakhat dirhmun in tluangtlam tein kan tuah khawh caah kai lawm tuk ko. Cun, Kawlram zukcawl vawlei ah a um ballo mi President nih telpi timi hi asi. U Thein Sein kan sawm nain ai manh lo caah Vice President Dr. Sai Mauk Kham nih a kan telpi khawh caah a sunglawi khun” a ti.