Chan Karlak Ah Kan Nau E, timi hla fianternak

Chan Karlak Ah Kan Nau E,

                                 timi hla fianternak

Salai Joseph KB Thawng

Hawile hna, hi hla hi a phuahtu kongah caan tampi lio in rak buai asi cang. Hi hla hi kan Laihla lakah roriak taktak asi, tiah ka ruah caah keimah rian, hei ti bang ka hun pilh lennak hi asi. Ai thlak tukmi le ai telhmoih tukmi ka lo ngai. Asinain, hi hla kong a tialtu le zoh thantu ka si ve caah ka hun ithlak len ko hih. Kan hnung i ka rak thlahmi kongah ninglo canglo asi sual ahcun careltu le nawlngeitu (hlaphuahtu kaphnih minung) hna nih nan ka ruahthiam naklai kan nawl than hna. Aho lei hmanh ah ka dir lo. Aho deuh mithmai zoh buin ka tialmi asi lo, ti zong theihthiampiak chih ka hau. 

Hi hla phuahtu kongah anmah pumpak, Pu Chawn Kio le Pi Far Hniang awka le hmurka theih ka duh. Pu Chawn Kio phone ka thlau caah ka u, Salai Joel Ling nih a ka chimh! Pi Far Hniang hi Hriangkhan khua ah khua asa i Rev. Ca Kung (Hakha) sinah a phone number ka hal. Sui Zing pa te phone a ka chimh. Cu hnu ah anmah, Pi Far Hniang te inn phone ka theih. Ka chawnh hna hi zaanlei suimilam 4: 30pm hrawngah asi i suimilam pakhat le a cheu tluk kan ichawn hna (27 January 2015, On Tue). Pu Chawn Kio belte voi 6 khengte ka chawnh nain an phone an tlai lo.

Phone hi a fapa pahnihnak, Sayagyi Chan Er Kam nih a tlaih. Amah Pu Chan Er Kam, cun a upabik Pu Thang Kio le Pi Far Hniang pumpak hna he phone in kan ichawn i atanglei hi kan ichawnh mi le kan bia an si hna.

Sayagyi Chan Er Kam he kan ichawn

KB : Hello! KB Thawng ka si, Rangoon in. “Chan Karlak Ah Kan Nau E” timi hla kongah kan pi, Pi Far Hniang chawnh ka duh ko.

Sayagyi Chan : Aw, keimah hi a fapa upabik changtu ka si i hi kong hi ka theih dih ko.

KB : Aw, asi maw. Kai lawm tuk kun. Hi hla hi “Pu Chawn Kio phuahmi asi, tbk. le a hlabia hi Pi Far Hniang hlabia asi” timi kongah fiangfai deuh in na ka chim kho lai maw?
Sayagyi Chan : Aw, vei aw, hi hla hi ka nu phuahmi asi ko. Hlabia khi ka nu phuahmi asi. Hakha i taang 8 kan rak cawn lioah a phuahmi asi. Ka upa, Pu Thang Kio le Pu Chawn Kio khi hawikom an si. Hi hrawng ahhin Pu Chawn Kio nih love song le ramhla hlaphel a rak chuah lio asi caah, a hla hi chanthar hla aw in kan tuahpiak, tiah ka u nih a rak peekmi asi.

KB : Asiah, Pu Chawn Kio bia “Thang Kio nu hlabia fung hnihthum le ka hlabia fonhtonh in ka tuahmi asi. A hla aw zong hi keimah original asi” tiah a timi hi teh?
Sayagyi Chan : Aw, khakha cu ka fiang ve lo ngai. A hram taktak cu ka nu asi ko. Amah belte, caang zeizatnak asi ka thei lo, cucu ka nu hlabia asi rua lo. Khikhi Pu Chawn Kio nih a chapmi asi rua. Ka nu zong nih ka hlabia alo lomi an um, ati. 

Pi Far Hniang he kan ichawn

KB: Asi ahcun, ka pi he chawnh ka duh ko. Kaa hnihkhat tal a ka let kho hnga maw, a awkaa theih ka duh ko.

Sayagyi Chan : Aw, ai cinken mi a um ti lo nain a awkaa theih na duh ahcun hun ichawn ko u.

KB: Hello! Ka pi, na dam cuahmah ko lo maw?

Pi Far: Ka fa, ka dam ko dahawh (A aw a thir ngaingai cang)

KB: Hi hla hi nangmah pumpak phuahmi bak asi ko tih. Hlapi in a phuah an in ti. Thingparsang maw, Thington maw, Bawikil aw in maw, zei aw indah na phuah?
Pi Far : Ka fa, vei aw, Thington aw in ka phuahmi asi. Hun ngai hmanh. Thington aw ka phuahning tein kan sakpiak lai, a ka ti. Caangkhat le a nolhnak a sak dih khin, “Ka philh dih cang eh,” a ti. Thington aw cun a ka sakpiak i thir lengmang in a sak. Ngaihchia te khi asi. Amah sakning te ahcun “Chan karlak ah kan nau ‘ce tluk’ lo maw kan Laimi…, cun, “A kan peng tir (tir: hmaisa) siangpahrang” tiah a sak.

KB : Ka pi, Pu Chawn Kio phuahmi asi, timi hi teh zeitin?

Pi Far : Vei aw, a hlabia a hram taktak cu keimah ka si ko. Amah belte, a chap rua. “Ho dah lungkamlo chuncha bang dir ve lai” ti hna khi ka hla asilo, a chap le asi lai (Hi bia a chim dih in Thington aw cun a hun theih thannak caang pawl kha a hun sak than).

KB: Ka pi, hi hla hi zeitik kum ahdah na phuah. Hla dang tah fung zeizatdah na phuah cang?
Pi Far : Fiang in ka cing ti lo. 1968 kum hrawng asi theo lai dah. Ka fa, zeizat asi, ka cing ti lo, kum 100 ka si cang. Zeihmanh kai cinken ti lo!

------------
Pi Far : Ka fa, ahodah na si cu. Khoika indah na ka chawnh tu hi?

KB: Ka pi, KB Thawng ka si. Rangoon in kan chawnh.

Pi Far: Rangoon in e! Kai lawm tuk. Fa hna na ngei cang maw? Na fa min ho? (A aw a thir tuk cang. A holh khawh lo bu tein ai hne tialmal).

KB: Hehehe, ka pi tlangval ai chaih saling ka si:)

--------
KB: Si kun le ka pi, cu kong cu theih ka duh caah asi. Hla tampi na kan phuahpiak caah kan ilawm tuk hringhran. Pathian nih lunun ngandamnak in pe chin ko seh. Saupi dam izuam awh! Zaanlei tha tuk kun law…

Pi Far : Elaw…ka fapa, kai lawm tuk ve. Mangtha tuk ko ne...

------

Pu Thang Kio he kan ichawn (fa upabik)

KB : Ka pu, hi hla hi Pu Chawn Kio sinah nangmah pumpak nih na peek tih?
Pu Kio : Aw, asi ko. Hakha ah ca kan cawn lio asi. Na theih khawh nakhnga, Pu Lian Uk le Pu Hniar Kio tehna chan lio khi asi. “Pu Chawn Kio phuahmi asi” tiah Muko mekazin ah an rak tial i kan duh lo caah The Hakha Post zongah kan rak tial bal cang (A dam lo caah a aw a thir ve. Thawchuah su ngai le harh ngai in a ka leh).

Adonghnak ah Sayagyi Chan Er Kam he

Sayagyi Chan : Vei aw, nikum (2014) ahkhan, Delhi lei in ka nu upat peeknak roca an rak kan kuat. “Chan Karlak Ah Kan Nau E” timi hla na kan phuahpiakmi cu Maivan ah zapi thimnak in a thabik, tiah thim asi i keimah Tin Duh Thang (Dr. HT. Sangliana Award) nih upat kan peek, tiah roca ahcun an tial” tiah a ka chimh!

KB : Aw, asi ngai. Zeidang asilo. Hi hla hi atha tuk. Hi hla kong kan tial/chim tikah a phuahtu kong theo ah buai asi tawn ruangah hi kong hi fiangfai in theih kan duh caah ka hun in chawnh hna bia asi. Lungsau tein nan ka leh caah kai lawm tuk. Mangtha kun u.

Sayagyi Chan : Elaw… kan ilawm tuk ve ai. Nangmah pumpak nih na kan chawnh cu kan lung ai lawm tuk hringhran ko. Mangtha tuk ve law…

+++++++++++++++++++++++++++

Pu Cawn Kio Pumpak he kan ichawn

Pu Chawn Kio hi an inn phone kha atuletu (nifatin) ka kawh nain an tlai lo. The Chinland Post in ka hawipa, June Ni Lian Sang nih “Hakha phone tung pawl an remh lio asi caah a luh khawh lo hi asi” a ka ti. Nihin (8 February 2015, On Sunday) ah LBC ah ruahlopi in kan itong i atanglei bantukin bia kan iruah. Amah belte a ngadamlonak ruangah ai cinken khawhmi a tlawm hringhran cang.

KB : Ka pu, nangmah cu pei kan phone len cu. Zeitik dah na phanh?

Pu Chawn: Nizaan tihni ah. Ka damlonak rak i zohter thanding ah ka ra. Stephen Ni Kio te inn ah kai thum.

KB : Aw, asi ngai. Voi tampi pei kan phone len cu.

Pu Chawn : Ahohme na si le, zeidah na herh le?

KB : Salai Joseph KB Thawng ka si. “Chan Karlak ah kan nau e” timi hla kongah.
Pu Chawn : Ziah, kei ka theih tawnmi Salai Joseph KB Thawng cu na si hnga maw, Thinthang Mekazin Editor pa kha ka theih.

KB : Aw, keimah ka si ko.

Pu Chawn : Na si tak maw aih, na no ko e (Hi ni lila ahhin US in Pu Lian Uk nih na no tuk a, tiah zumlo pah nawn in a ka ti ve :) Nupi tonlo ruangah no ka hlawh ne cuh :D)

KB : Ka pu, kha hla kha dahngai, Pi Far Hniang phuahmi asi, an ti. Cun, anmah ka chawnh i keimah cahram asi ko, a ti tung. Aphuahtu kongah kan buai pah.

Pu Chawn : Aaa, khakha Pi Far Hniang hlabia asi ko. Amah belte ka chap len pinah a aw kha keimah nih ka bunh i kanmah pahnih phuahmi ti khawh asi ko. Keimah lawng ka silo, amah lawng asilo, kan pahnih kan si.

KB : Aw, asi maw, kai lawm tuk kun khah, dam izuam awh. Saupi nun itim awh!
Pu Chawn : Aw, asi, ka dam ngai ko. 

Note: Hi hla hi anih nih a phuah, aphuahtu cu anih asi, tiah biachattu ka silo. Chahnak nawl zong ka ngei lo. Acunglei kan biaruahning tuin zoh/rel thiam a hau. Cun, theihthiam a hau. An pahnih, an si ti cu a fiang.