Keimah le Ka Cafung (1)

Keimah le Ka Cafung (1) 

Salai Joseph KB Thawng

Kei ngai hi. Ka lungum paoh ka hun pho tawn. Cheukhat nih cun nan ka huat ngai men lai. Nan mawh lopi. Cheukhat nih nan ka uar lo nain nan ka lawmh ve. Mizeimaw nihcun, pumpak sawhkhih in thangchiat (personal constraint) duhnak in caṭialmi ah nan ka rel. Nan mawh ṭhiamṭhiam hoi lo. Facebook Nunphung ka hun pehsauh lenmi hna ruang zongah asi kho men :)

Laikhal kan ti cu chantiluan ka dawi khawh lo tuk bia hna a si ko lai. Amah belte, Laimi dirhmun le sining hoih (context te khi) in khua ka hun cuan peng lai. Lungkhon cu asilo, saduhthah bia dafawh. Media zalonak (Freedom of Press) chan cu si kaw, zalong ngai in ka hun vuak tawn. Cu ruang bikah asi ṭheo lai, a ei kholo nih nan ihaak len, nan dolh kho ruam lo.

Kan fian awk tu cu caṭial timi cu aho mithmai hmanh zoh loin le minung isel in ca kan ṭial bal lo, ti hi asi. Vei, Mirang te nih phung an thluk phun, “laam a duh ṭualmal nain a kut kiak fam” (suffer a broken arm when one wants to dance) ti phun in huat lai phan bu ah uam kholo in kan hun laam tawn. Cun, “Zeimaw zeimaw ah theihnak tampi na ka peek i kai lawm tuk” a ka timi pakhat hnih nan um tikah ka hnarpuar ve tawn. Amah belte hnarpuar duh ah ca ka ṭial lo tu cu theihpiak ka hau. Keimah lawng ka silo. Caṭialtu paohpaoh nih nangmah pumpak thangchiat duh ah ca an ṭial lo. Cun, a herh ahcun nangmah thangchiat (na thang an in chiat lai tinak asilo) kha an i foihte bantukin nangmah thangṭhat le cawisan zong kha an ifoihte (pumpak kan sining tu ah ai hngat).

A tlangpi in ka cafung hun riin/thai ahcun, caṭialthiam a herh tluk in carelthiam a herh ve. Aṭha ngaimi achia lei in nai laak sual loding a biapi. Nangmah dirhmun in suum na tah loding zong a herh. Caṭialtu nu/pa dirhmun asi maw, zeidah a duhnak le zeite khi dah a sawh duh (a spirit te khi or focus a duhmi) ti kha relpiak chih, theihpiak chih a hau ngai. Cuti i carel kan thiam lawnglawng ah kan nunnak ah sullam a ngei lai. Caṭialtu dirhmun le saduhthah (idea) te zohchih peng a hau. Kan duhmi ahcun ningzah kan thei lo. Kan mitkuh cang ahcun kan ningzak nemmam lo, kan ngu huar ko. Kan pawṭaam cang ahcun zeihmanh kan ngamh (there is no sense of shame when one is infatuated, drowsy or famished, an ti phun khi) ko cu mu. Khah, cu vial, ka cafung ka chiah rih lai. Kai aukan asilo, asi awk asi rua, ti bia.

Note: Laimi facebook vawlei dirhmun in tialmi asi.