Lenhloi Ṭialthiam, He Ling Tlanglo he biaruahnak

Lenhloi Ṭialthiam,

He Ling Tlanglo

he biaruahnak

Upatmi ka pa, biaruah kan duh ngai ko, caan na ka peek khawh ahcun?

Ka fale, kei santlailo zeihmanhlo asimi bia kan in ruah kho hnga maw, nan ka ti cu kai lawm. Ruah kho tuk e. Asinain ka keyboard a ṭhat set lo caah caṭial adik kholo i kai palh len lai hih. Ka ngaithiam u, ti nawl kan duh hna!   

Ahmaisabik ah na konglam tawi hun ka ruah hmaisa law…

Ka konglam hi chimtlak a um lem lo. Ka khua cu Thlantlang peng  Tlanglo khua  asi. Tlanglo ah  Pastor kum thum,  TABC E&M secretary kum li,  Thlantlang  Johnson Church ah Pastor kum nga,  ZBC thawngṭhachimtu kum hleikhat ka rak ṭuan i  atu Kalaymyo Hmunthar Lai Baptist Church ah Pastor kum kua  ka ṭuannak asi. Pathian rian kum 32 ka ṭuan cang.  

Laimi lakah lenhloi ṭialthiam (novelist) kan in ngeihmi hi kan hun in uang tuk.

Kai tlaklo ngang ko nain kai lawm bak hih. 

Lenhloi cauk kha uk zeizatdah na chuah cang cu. Cauk min pawl he kan chim law. Cun, cauk dangdang tah na chuahmi a um maw?

Cauk hi phun kul ka chuah cang. Biaknaklei cauk hi phun hleihnih ka chuah cang i lenhloi cauk hi cu phun riat asi cang. Lenhloi cauk hna ka chuah cangmi hna cu : (1) Zuunngaihnak in a ciam an ti (2) Ihnim sih kan rim aa dang hnga maw, (3) Hong kir ko ka dawt na liam lungsia a herhlo maw, (4) Ṭawhngaan pardawh, (5) Hlinglak ah a een mi par, (6) Len cimlo Lai lungrawn ah, (7) Tlangcung khuanuam le (8)  A thar ṭhan e hlanlio nun....timi an si hna. Hi lakah hin a ṭha cem ti awk ka thei tuk hna lo. Hlinglak een par hi CACC nih an zuk  le a va laar deuh le asi ko.              

“Ka Nu Dawtnak Mitthli” timi kha cu nangmah ṭialmi si loin na nupi ṭialmi asi rua. A ṭial lioah na bawm in ruahnak na cheu el maw?

Asi. “Nu dawtnak mitthli timi” kha kan nu nih a ṭialmi te asi. Acheu nih na bawmh  ko lai an ka timi hi asi bak lo. Amah  idea te bak asi ve. Kan pahnih hi kan izuam ziar le J. A ka tei deuh. Keimah lenhloi hlan ah CACC nih zukcawl in an tlakpiak hmaisa.

Asiah, nan chungkhar in novelists lawngte nan si ṭung!

Ti ngamh si bak hlah. Ka fanu Doreen hi a huam tuk ve i kan chungkhar in a chel maw caan ahcun ca kong heh tiah  kan  iruah tawn. Ca a uarmi chung tu kan si deuh :D

Na cauk lakah “Hling Lak Eenmi Par” timi kha careltu zapi nih cun kan uarbik, kan theihbik mi asi theo lai. Nangmah nih tah, na cauk lakah zeidah nai lunghmuih bik?

An sullam in ka zoh i kha te kha ka uar cem ti awk ka thei lem lo. Mipi nihcun “Hling lak een par” hi an uar. “Zu Palang Kuai le Len cimlo  Lai lungrawn ah” ti hoi hna hi a ṭha pah ve ko ka ti.

Hling Lak Eenmi Par, kha asi taktakmi, acang taktakmi alo ngaite. Na phuahcop mi maw asi, asiloah asi taktakmi, le asi pahmi chapchuan mi dah asi?

Tuanbia hi cu asi taktak dih ti hi cu a har ngaingai. Mirang nih fiction  or nonfiction anti i tuahchom deuh khi an si pah hna.           

Kha lenhloi kha CACC nih zukcawl in an thlak, tiah kan theih. A zohtu cheukhat nih  “Aṭha tuk lo” anti dakaw. Cu kongah cu ruang, kha ruangah asi, tiah chim na duhmi a um maw?

CACC nih hlinglak een par ti an zuk mi hi a tuanbia a rel cangmi caah cun a fil deuh  anti tak ko. Aruang cu Laimi cu man lo volunteer in lem a cangmi kan si tikah sik deuh le an ingol;  riandang an ngeih ah an kaltak caah, midang an lut  tibantuk  asi i vansan chuah in an chuah  hramhram caah asi. Zaangfak lehlam an si.                                 

Atu tah, lenhloi ṭial liomi, cun ṭial timhmi na ngei el maw. Keimah nih cun tampi in kan ṭialpiak rih law, tiah ka hun duh tuk!

Atu i ṭial ka timhmi hi cu “Ka dai lailo vawlei dongh tiang” ti asi i thinlung fahnak ngai khi asi. Atulio chantiluan lak i Laipa zumhtlaklo  ruang lungfak tuk an sinak kong asi.      

Laimi cheukhat hi love song sak le ngaknu tlangval dawtnak tuanbia ṭial tehna hi an duh lo. Pastor pakhat dirhmun in zeitindah na hmuhning le na pomning?

Laimi micheukhat love song an hua ngai i a phuahtu hna tiang an nihsawh mi hna khi cu lamkhat lawng zuul deuh in ka hmuh hna. Baibal ca chung i Solomon hla hna khi love song asi ko i uarlo ahcun Baibal uarlo asi ko hnga. Lenhloi  uarlo tehna hi lungkhatphur pawl pomdan ah ka ruah. An sullam in zoh ah a ṭha. Zuripa kong in siangpahrangpa kong tiang a um i nun  chimhnak lawngte pei an si cu. Lenhloi  tepawl, tuanbia tepawl nih khin miphun  pei a pitter cu ka hei ti ko. A  ṭialning  zong nih a ngeih ve.

Cabia/lenhloi ṭial khawhnak caah caan peek khawh maw a biapi deuh, lungchuah liote i ṭial dah? Cun, daangdai le fianrial hmun theng ṭial ah a ṭha deuh, tiin na ruat maw?

Lenhloi  ṭial hi tinhmi duhnak  fakpi um can (lungchuah lio) hi a biapi. Ṭialnak hmun hi cu fianrial hmun bak a ṭha cem ko. Aruang cu kan thinlung piallo tein khuaruah khawh asi. Vision hi a biapi i hmunnuam deuh cu a ṭha deuh ko.                                                                                        

Caṭial, lenhloi ṭial hi a cawn in cawn khawh phun asi ko, na ti maw, asiloah pahrang bak asi ko, na hei ti dah?

Hihi Pahtian peekmi pahrang phunkhat asi ve. Cun cawn khawh zong asi hrim ve.                      

Laimi lakah lenhloi ṭialthiam pawl ah kan chiah. Nangmah nih tah, ahodah na uar bik hna?

Laimi lakah a thiam tiah ka thangṭhat bakmi cu tleicia Rev. Hniar Kio kha asi. Pu Joel Ling, le Pu Victor Biak Lian zong an zaa bak ve.      

Ca lakah zei phun dah na rel bik? Kawl le Mirang novelist lakah ahodah na uar bik hna?

Pastor ka si tikah Biable hrilhfiah le biaknaklei ca deuh hi ka rel. Caṭial tukmi asilo nain ca a ṭial mi hnihkhat ah ka uar ngaimi cu Mother Teresa asi.

Laimi, abikin mino kan caṭialmi le lenhloi kan ṭialmi tete na rel pah ṭheo lai dah. Na siarem deuh lomi le cuti deuh, khati deuh in biafang an tian awk asi. Cuti deuh in an vuak i an sersiam awk asi, an ṭial awk asi, tiah ruahnak cheuh na duhmi a um ahcun…

Laimi caṭialmi comment tuah ka duhmi zawn tete hi a um  ial. Ca an ṭial tikah  mi lunglaak ding in thuamh deuh hna seh  ti ka duh. Biana bia ah ni a tla timi zawn hna khi  lungzur deuh duh ahcun “zaanlei ni varal ah a kai cang, zaanlei ni a hong liam riahmah cang…” hun ti ahcun thinlung ah bia a chim deuh in ka thei. Ca dang an leh ṭhan asi zongah original nak hmanh in thuamh a herh ahcun thuamh ko hna seh. Bia ciocio hi an ilo lo. Cu zawn cu zapi nih kan thiam kholo. Keimah uarci le midang uarci an ilo/khat lai lo nain mi lung a khoih khawh lo ahcun ai dang hrimhrim ko lai tiah ka zumh.

Careltu, a bikin lenhloi ṭialthiam le lenhloi ṭial a zuammi hna sinah biacah na duhmi a um ahcun…

Caṭial hi a har lo nain a fawi zong a fawi lo. Caṭial na duh taktak ko ahcun ca tampi  rel hmaisa a hau i tampi khuaruah a hau. Khua tampi na ruah hnu i na ṭialmi nih careltu lungah a taap ding message a peek khawh a hau. Mah hi lenhloi lawng si hlah, zei ca ṭial paoh ah a biapi tiah ka ruahmi cheuh kan duh ve hna mi asi.

Lungsau le caan peek in na ka leh caah kai lawm tuk kun…

Biahaltu na cungah kai lawm tuk hringhran.