Calvary Tlang Vailamtung Phur Loding In Biachah Asi Cang Nain Ralrin Awk...

Calvary Tlang Vailamtung Phur Loding In Biachah Asi Cang Nain Ralrin Awk...

Salai Joseph KB Thawng

Nihin (30 January 2015) Chin State cabinet meeting ningah Vailamtung cu phur loding le ṭhial loding in biachah asi cang---Pathian nih ramkip um Laimi hna kan thlacamnak a kan leh. Bawipa min kan thangṭhat. Asinain kan iralrin awk tete an um. An bia ningin, 2012 ah, atu Caarcaang tlang nakin a vung sang deuhmi Khuhsi Lo Bo tlangah Kawl biaknak puda sak an rak timh lioah Chin miphun nih an rak duhlo mi kha peek ṭhan le an puda tohnak nawl peek ṭhanding biachahnak ai telchihmi khi asi.

An kan zuamcawhnak alo. Cun, cuti nan ti ahcun, cuticun si ve seh, tinak asi. Nan vailamtung dir nan duh ahcun puda zong hi dir ve seh ca, ti tluk khi asi. Kanmah locia, kanmah ramcia, kanmah hmuncia ah an duhpaoh in an kan tlawnhnawh, ti awk cu an ṭha phum hnga lo. Asinain, Chinram ah vailamtung pa 4 an phur cang kha philhlo bak a hau.

Kei ṭheo, ka chim rih lai. A luancia mi 15 January 2014 lioah, Mandalay khua ah Lukawng, puansen-aih lawngte minung thongsawmthum (30,000) renglo nih tonpumhnak an ngeih kha nan theih peng cio lai dah. Ma-Ba-Ta timi pawl (969 pawl, mihrolhrol U Aung Thaung le miṭhi laalaang pawl) nih Kawl biaknak, Kawlca le holh, Kawl miphun siding ah biatak an rak ichuah i an biaknak biading in chunmang an rak ngeih kha philhlo kan hau.

Vawleicung sining huap in cikhat zoh usih! Vawleicung ah Khrihfa a hrembik le Khrihfa biaknak zei a rel lobik hi Muslim le Communist ram pawl an si. Cu lakah North Korea, Sudan, Eritrea, Saudi Arabia, Nigeria, Somali, Iraq (ISIS misual pawl ko hi an zual), le Tuluk hna an si. Cun, India zong hi an si ve ṭhiamṭhiam. Kawlram ah Khrihfa hremnak le biaknak ruangah thihlonak (martyr) ngaingai hi an um tuk lai lo dah---kan missionary hmaisa pawl an um sual hnga maw? Asinain, biaknak ah zalennak a len vekvek ṭung lo ahcun cucu kan thlarau le minung an kan thah tluk ṭhiamṭhiam asi.

Biaknak covo mit in, nangmah cu Chin miphun na si caah Khrihfa na si awk hrimhrim asi, tiah ahohmanh kha nawlpeek khawh asilo. A duhmi le a pommi biaknak a biak awk asi ko, amah duhthimnak asi. Asinain, a ra lai 2015-2020 ram hruaitu ding thimnak caah atu tein kan mit a vaar cia a hau. Biaknak dang a biami nih Chief hna an tlaih peng, Siang-uk hna an si peng, zung-uk hna an si peng, peng-uk, sang-uk le miphun-uk tiang an si peng ding cu kan duh awk asi ti lo. 2015 thimnak ahhin party mit-au nan tlawmte lai nain hi zawn ahcun kan mit a vaar deuh a hau te lai.

Cu vialte nakin, Chin miphun, mipi kan lung a fim cang. Ralkap cozah nih a kan nehsawh ning, hnakkar an kan tenh loning, zei an kan rel loning kan fiang dih cang. Kum 50 leng an butkedan tangah kan um, an zia kan theih tuk cang. Cucaah, hi nakin kan fim deuh a hau ve. Kan duhlo mi cu, kan duhlo, tiah ralṭha tein chim ngam dingah ready kan si peng a herh. A bikin thawngpang caanhman in a thei kho velo mi Lai khuate kan unau pawl hi biatak tein kan dirkamh hna a hau. Fim kan chimh deuh hna a hau. Nifatin lokal le rianṭuan ceo khi dakaw an thluak ah a um cuh. Hun dehcawh citcet ahcun ai zumhlan mi, dehlun an si. Hiti tikah nehsawh asilo, kan dirpi hna le fim kan chimh deuh hna a hau, ti hi asi.

Adonghnak ah, kanmah ramcia le hmuncia koko ahcun ralṭha tein kan dir chin lengmang a herh. Cuti i mah hmun le hma ah kan duhmi zalonnak he kan iṭhithruai khawh a herh bik. Mahte Khuakhan Lairel Khawhnak (Federal State/ Self-determination) kan hmuh khawh nakhnga thlacamnak in siseh, mah sikhawh tawk cawlcanghnak tampi a herh rih.

Pathian nih ai thimmi miphun, Chin miphun le Chinram a ngandam ko seh!