Hawikomṭha Pathum Ka Ngei

Hawikomṭha Pathum Ka Ngei

Salai Joseph KB Thawng

Hawikomṭha pathum ka ngeih hna. Cu hna cu, ‘Thlichia-tilet, Vanchiatnak le Vanṭhatnak’ an si. Hi hna pathum hi nifatin, zaanfatin, ka sinah an um peng. An rak um peng i an um cuahmah rih ko lai. Thlichia-tilet le Vanchiatnak hi voi tampi cu hlawt ka timh hna. Ka kaltak ko u, keimah lawng um koning. Nanmah he komh ka zuam ti lo, tiah bia fakfak in ka rak ti tawn hna. Hna nan hnok tuk, tuah ka duhmi ka tuah kholo, minengthla in nan um, tiah ka rak ti tawn hna. 

Asinain, Thlichia-tilet le Vanchiatnak nih cun, “KB, na umhar tuk lai. Kan in kaltak ahcun nangmahpi lawng pei na si lai cu. ‘Vanṭhatnak’ nih le ai manh lo tuk tikah an lengkai kholo cu awh. Atu i na sinah kan um pengmi hi kan in huat ruangah asilo. Na caah thilrit zong kan si bak lo---nangmah tu nihcun hnahnok le thilrit ah na kan ruah. Ataktak ti ahcun in kaltak sihlaw, na umhar lai ning hi a mak hnga. 

Zoh hmanh, na sinah kan um le dakaw, na lung a fim ruangmang tawn kha. Khurkhua tuak in pei hmailei cu kamseh in na zoh len kha. Na thiam bal lomi zong pei thiam na duh cang kha. Ka si khawh hrimhrim a hau, kai zuam a hau, timi lungput le zuamnak pei na ngeih leh kha. Ziah, hnahnok cu kan si ṭung lo. Kannih, Thlichia-tilet le Vanchiatnak te kawidua hi na hawiṭha taktak dakaw kan si cu! Phaisa dih lo, cawn hau loin fim an chimtu dafawh kan si iai. Unau KB, na lung a fim taktak ko tham ahcun kan in kaltak zongah kan siarem ko lai. Atu ning hin cun kaltak awk na ṭha lo men lai dakaw…fim chimtu an um lawngah fim asi cuh. Atu belte na lungfim ngai cang i kan in thangṭhat ngai pei, tiah” tiah an ka ti.

Hawile hna, minung nih Vanchiatnak le sunghzatlaknak tehna hi kan ral nganbik ah kan rak ruah hna. Minun kan tah, kan duhmi kan tuah kholo, kan ngei kholo. Chunmang he vawlei chaak kan tlai/mawng len nain zei rira asilo tikah Vanchiatnak le Thlichia-tilet hi kan rak huat hna. Ataktak ti ahcun Vanchiatnak le Thlichia-tilet hi kan caah hawiṭha an rak si. Kan ibiatak khawh nakhnga caah fimchimtu sayaṭha le hawiṭha taktak an rak si. 

Anmah, Thlichia-tilet le Vanchiatnak chimning ah “Vanṭhatnak cu ai manh lo tuk” va si kaw, ai manh caan te tal ah amah nih a kan ton khawh lo hmanh ah kanmah nih ton khawh kan izuam a hau. Cu ton khawhnak dingah fim a kan chimtu hi Thlichia-tilet le Vanchiatnak hna hi an rak si tawn. 

Miṭha paohpaoh hi hawikomṭha an si dih lo. Na hawikomṭha nih ṭhathnemnak an peek ṭung lo ahcun, fim an chimh ve ṭung lo ahcun, cucu pakpalawng menmen asi ko. Kan huat ngaimi, kan duhlobik mi thil hi a caancaan ahcun kan hawikomṭha taktak an si tawn. 

Na hawikom, Thlichia-tilet le Vanchiatnak nih an len ve, an komh ve sual ahcun thinhun, ngaihchiat le vansan in ila/um sawh hlah. Mifim taktak an si khah. Fim an in chimhmi tu kha al loin, ilaak khawh izuam law, na hawikom Vanṭhatnak le hlawhtlinnak he nan ikomhnak, nan ipehtlaihnak hri a fek chin lengmang ko lai.