Laikhal Biaphongden (3)

Laikhal Biaphongden (3)

Salai Joseph KB Thawng

Laikhal hao, biaphong kan den ti lonak a sau ngaite. Kan nihkheh lonak zong a sau ngai. Rian le khai cio he cun si kaw kan cabuai kan lumh ti lonak a sau ko. Tutan cu kan i ngai hna. Tonlo a sau i a ṭhanalo in kan hun i ko-au. Laikhal kan ti cu biatung dirh awk ngai zong khi kan thei lo. A kenkip le kangza kan puur. Kan daphuat. Virh lo kan virh, aphi tu cu kan chuah hoi lo. Khah, atanglei bantukin kan biaphongden ka hun in hromh ṭhan hna.

Lai Mino le Facebook

E. Luaite        : Ka duale, kan itonlo a sau ve tak hna si! Nan dam hna maw tu hi. Kawi Dun, na saneh dawi cu zeidah na lawh?

Salai Dun       : Aih, naicikua cu facebook ah kai book ko hme hi. A dam cu ka dam ṭuangṭaang.

H. Teite           : Salai Dun cu a luan lei cang. Facebook a ti nak ah Suipi zong a khur-omh kho ti lo. Salai Buan he cun an idang ve awh!

Salai Buan      : Ma ko, nungak kong ṭheo ahhin bia hi nan thluk. Nan nu duh lawng hi si ko. Khuazeimaw a tong bal le a theipi bang hin nan um.

Salai Khar      : Ka dua, ka dua, Salai Buan ve ngai tawn. A ualpi hi tuah hlah. Nangmah nak nu duh kan um lo haaa. Salai Laikhal nih an nawn phah lai.

Salai Laikhal : Aaa, ka duale, pa hme kan si cu. Nu kan duh ne lo ah! Pa nihcun pa cu va duh rai si lo cu mu. Kei lebang hi pa ka si le, nu ka duh, nu bak ka duh J.

Salai Buan      : Kha si ko. Salai Laikhal hi keimah nakin a zual khih. Anih lebang tawṭawk ṭhapi, a pir in pir mi le ṭaang-an lianpi dakaw a uar leh cuh J

E. Luaite        : Aze…vaibaarlote bang khin nan rak um. Nungak cu nan rak duh taktak hna hme hi. A ruam ah Kawi Dun, nang hi girlfriend (darling) ngei cu na si i, Suipi cu voikhat tal na vei rawh maw J

Salai Dun       : Luai bator, cu bang hna hal hoi. Ka girlfriend cu hme si cu. Vei le vei lo kongah buai hlah.

H. Teite           : Mi bator rual, zei le zeihme nan purhdah ka ti. Kan biatung kan khel khih. “Lai Mino le Facebook” kong kan deng lai, nan ti pei. Na mui pipi he. Hitihin dawh nan um le hitihin nan si tawn hih, nan mak.

Salai Laikhal : Aze, Teite, a si tak a! Nangmah nihcun hme na thawk cu! Khah, zeikhom siah kan bia suurlu ah kal usih! Facebook (online) cungah nan tlonlennak, nan vahvaihnak le nan hmuhning hun phuang cio tuah u!

Salai Dun       : Kei cu 360 camera in hman an ithlak i an hun pho huar tawnmi khi a ka neng tuk eh. A celh ka celh ti lo.

Salai Laikhal : Nai mih dara tu hi. Keimah lawng dara a hua rua ti nalakah. 

Salai Buan      : Aze…, 360 hna cu do tuah hlah u! A chan dakaw a si hih! Piang pirper tete in an hun i zukzek le pei nan like duahmah ko kha.

Salai Dun       : 360 rumro hi kan dohmi a si lo eh. Zoh hmanh, Iang Khirh Zing (Khirhte), khi tluk ai dawhlo mipi.  A arsik hmanh theitlai suur in ai suurmi nih dakaw ai dawh zuar khi. An theilo le like 400 tehna an like cuh. Ataktak ah hmu hna sehlaw “Ai ka pi ka ningṭi” ti khi si ko hnga cuh! Sakhi sisehlaw a sa nam ding pawl haaaa.

H. Teite           : Kei cu mah hngallo an ka neng. Khuazeimaw khin kan um. Facebook (online) ah kan ralṭhat hna ning. Cakei mei a tlai ngam ding ko khi kan lo tawn. Mi pakhat caṭialmi an iremh an iremh riangmang i an hun leh (comment) cang ahcun, aze…zeizongte a theitu kan lo tawn. Maw ka pi, ka pu darling, tiah hla isak pah a hau te men lai J.

Salai Khar      : Kei hi dah, miphundang kai hngalhnak ah, asiloah miningzahpang kai hngalhnak ah seksi (sexy) tuk deuh le leer deuh (skirt tawi tuk le angki hngawngbak) hna he zapi hmuh awk in an hun phomi khi like le comment cu chim lo, a zoh hmanh ka zoh ngam huaha lo. Cu nakin an kawp (boyfriend and girlfriend) he an i kuhreh lio le kiss lio tehna an hun pho huar mi ko khi ka tawthlingzaat ka celh lo.

Salai Laikhal : Haaa, Salai Khar, miphundang cu na rak si pah tak hme hi. Zoh dawhlo hmanthlak a si zongah a taar hmanh an ngamh ahcun a zoh hna cu ngamh diam ko cu mawh! Cu nakin comment chia, chat chiat in kan i biakchawnh tawn hna mi hi a poi ka ti. Capo cu capo pei a si fam. Asinain, zolangh duhnak tete a um pahmi hi a poi khun. H. Teite bia khi adik eh! Online ah kan ralṭha tuk deuh hna. A chan nih a kalpi, ti khi kan biatlaih cu si cio kaw, kanmah nih chan kalpi khawh a herh zia kan philh sual tawn.

E. Luaite        : Laikhal, na bia sau dom---sau tuk biachim hi cu ngaih a nuam lo eh, haaa. Keizong nan chimmi pawl khi kai hrawm kho ngai hna. Cu nakin online mifir, mihrokhrol kan um pengmi khi a ka simh, ṭih zong ka ṭih. Account tampi an ituah riangmang i mi an hlen hna. Kan duh kan dawt an ti thulh hna. Phaisa kong tiang in siseh, thilri tiang in siseh, mi an hlen hna. Upa mino hual loin an hlen hna mi khi ka sivangh a celh in ka celh ti hna lo. Facebook thong ah thlak phu an si, ka ti.

Salai Dun       : Luaite, mi biachim sau ngaih huam lo mi ahcun bia sau pawl na si ve lai hih J Keizong sau nawn in hun chim ve ning. Kei cu online mileer pawl, hei chim ko ahcun tlangval kip, ngaknu kip he hmanthlak i taar huar a hmangmi khi an ka neng bik ko. Tlangval kip le ngaknu kip he hmanthlak khi ṭhawn ah maw an ruah hnga. Asiloah laar le thiltikhawh ahhme an ruah hnga, ka ti le ka lu thak kai kheuh tawn.

Salai Khar      : Nan chim lengmang i chim lengmang ve a hau rua. Ka huatmi ka theih ṭhan ve hoi eh. Profile pic, kan hei ti ṭung le kanmah pic (hmanthlak) a si bak lomi, Korean Fidi le fitlaw (actress/actor) hmanthlak hna kan itaar huar ko, kan mak ve awh. Cover le timeline tehna tu cu kanmah nawl cio ta. A kan pheng khotu (cover) a si tu cu a herh ve ta. Kei cu mah awrazinal hmanthlak taar a hmang lomi cu an ka add/invite len zongah ka cohlang duh naisai ti hna lo. Mi hrokhrol deuh ah ka ruah cang hna---a tam-u cu ti bia.    

Biahrennak

Elaw…khah, mi kong ṭheo kan ceih hoi hih. Khuazeimaw a sipi bang, a thiampi le a si khopi bang in kan um hoi. Ma rih phot usih! Lai mino hna zong Internet vawlei ah kan hun vakvai kho ngai hna. Online (facebook) nih ṭhathnemnak tampi a kan peek bantukin rawhnak tampi a chuahpi ve. Caan a dih, phaisa kan dih. Lornak le rutreunak, mi hlenthawinak ah kan hman. Zeikhom siah, ṭhathnemnak a kan petu thil hi kan ral a si sual nakhngalo kanmah cio kan i runven thiam a hau. Kan dirhmun le kan tuahsernak nih mi a tlukter loding zong a biapi tuk. Elaw…khah, tuzaan cu Iangku te inn ah itong te hna usih! Kawi Dun, na guitar rak iken te luau, zaanriah eithaw hna u!