Facebook Nunphung (7)

Facebook Nunphung (7)

Feibuk vawlei ah ka hun i chok pade, ka hun pial chukcho. Kan timeline, kan profile le kan cover i kan itaar mi hmanthlak pawl ka hun like duahmah hna. Cheukhat hmanthlak cu ka like ngam lo. Tuksum taitai cu an si hraw lo nain ka thlingza---a hmutu ningzak ti phun.

Keimah rilh in ka hun rilh, ka hun khei chun le vei, ramdang phan ngaknu pawl hmanthlak hi an rak seksi deuh ngai hna. Aw, ṭamhmoih zong an thiam deuh bia asi ve lai cuh. Cun, ramṭha le hmunpi cu asi fam. Chantiluan kan dawi zong asi rih lai. Vei lebang nih “Ramleng ah a ṭhanglian mi hoi cu an hnuk (breasts) hna a lian deuh” a ti eh! Asi pah tak ko lai. Nan hmanthlak cheukhat tete cu hnuk canceo (a uak pah zong nan um) lang in angki hngawngbak he nan hun pho mi pawl khi Mirang siṭaal kan icawn ti khi maw asi hnga, a vei ngai. Mirangca in status update kan thiam ngai hui.

Ramchung um nungak pawl nihhin le Kawlholh in status update ṭhawn in an ila. A seksi ngaimi tete an um pah ve nain annih hi cu ṭaanghup (yinphone) a uarmi ram um si hna kaw tlawmte an ining. An ining ti tikah a cheih in ai cheih mi an um ve ko---minung cu ilawh phung asilo cu mu! Lai khuate ahcun nungak nakin nutung, patung le pitar pawl hi an seksi deuh. An hni kha an liang hna ah an ibah huar ko. Nutung cheukhat nih zapi hmai ah an paang hna an ipurh huar ko. Khuasik thla paangpurh le Lai khuhsi cu ai rem ve ngai (anti tawn).

Khah, zeizei ti a um lo. Na palh, na sual, na seksi tuk aih, na leer deuh, nai hleusen deuh, tiah sual kan in phaw hna lo. Sualphawtu zong kan silo. Dan kan in tat fawn hna lai lo. Khuabawi zong kan silo. Tlangrianṭuan ai thawhlo mi zong na silo, nan zaanriah beel zong kan in chut hna lai lo. Asinain, chantiluan dawi paohpaoh hi an ṭha dih lo cu mu. A zatawk hi a tawk bik!

(Note: Zapi hmuh awkin a thlak hmanh nan ithlak ngam ahcun a ṭial nana cu kan hun ngamh ngai ve ko hih)