Duhnak Kongah Zumh Awktlaklo Lai Mino

Duhnak Kongah Zumh Awktlaklo Lai Mino

Salai Joseph KB Thawng

Laimi kan hmelchunh ah Vakok e, Vapual e, ti asi (cu kong bel ka langhter duhmi/focus asilo). Zumh awktlakmi kan si. Kan dingfel. Zawnruahnak thinlung kan ngei, ti hi kan pupa chan hei char in kan chim ṭheo. Kan lih. Kan hrokhrol. Lih fangfak kan chim. “Kan pupa cu, cutin khatin an um” hei ti lengmang ṭung i kanmah vial rutreu in khuasak. Abikin duhdawtnak kongah Laimi (mino) hi kan zirtiang tuk. Kan lalpang tuk---mifirkhu lawngte.

Duhnak le Veelhle

“Duhnak hi lente icelh asilo” (love isn’t a game) ti hi kan philh sual tawn. Cheukhat cu duhnak hi phe ah kan rel---kan ikah top ko. “A” ngei nih kan den tawn. Bawlung bantukin kan chuih. Kawlsut a thiam deuh paoh nih kawl (goal) duahmah ding phun in a um. Cu bantuk minung cu a fawinak in veelhlethiam an si, kan ti hnga. Duhnak kongah mi zirtiang ti lawlaw ning. Nu kip, pa kip sinah an thli a ṭha. Mi fak an thiam. Kan duh an ti top hna (kan uar ti cu zeipi asilo). Duhnak kongah mifirkhu kan tam. “Kan duh” timi biafang paoh fawitehlek in a cohlang ve mi ngaknu, tlangval kan tlawm ve hui lo, kan mak.

Tlangval pa linga pi kan ichiah. Nungak tampi kan ichiah huar. Mi hnarceu, ti kan fawite. Mi puai, mi lule ti lawlaw ning. Kai dawh ai pat, kai za ve ai pat, tiin a nu kip a helhmi tlangval. Muidawh deuh paoh a helhmi tlangval torlecheng kan um. Cu laklai ahcun tlangval ka ngei cang, ti tuak loin, helhtu pa paoh aphi peek a hmangmi ngaknu kan tlawm ve hui lo---mimak kan si. Kan zirtian ning hi ka hmurka in ka chim kholo---acting in ka piah te lai :D

Lai Mino le Nupa Sualnak (sex)

Hi kong hi capar dangte in ka ṭial lio. Capo ka theih bal, aho sinin ti bel ka cing ti lo. “Khuapi nu cu zumh an um lo. Khuate nungak hi zumh an tlak, ti khi asi. An hun ṭhit ai. A zaankhatnak (mingalar-oo-nyiah), asiloah honeymoon, timi khi a thei ve lo i mifanaunu, ai ngaih bachiat. Honeymoon cu a nuam maw, tiah an pa nih. An nu nih a lungthli tein, mah bantuk hna cu tapchak le thingai phen hmanh ah ka tuah pengmi, a ti :D.

Laimi zumh kan tlak loning hi. Salai Buan Sang hoi nihcun “Kum 16 a tling cangmi ngaknu virgin an um ti lo” a ka ti ko e.  Khuapi um, ngaknu tu hi zumh an tlak deuh lehlam, a ti chapbei. Ayaw…kan mak ko. Salai Dun Sang lebang nih, “Lamkam theipi an tor. A duhpaoh nih ei thluahmah mi pei an tampi cu. Vei hna khi na ei huam ahcun va leng, na luakchuah tiang in na ei lai” a ti ve hui ai. Um…a tam-u cu kan si lai lo dafawh. Hi bantuk minung zong kan rak um ve tak ko lai. “Mi lakah mibonlo, sa lakah pangtaarlo” ti ṭheo.

Kan ituak ngai a hau. Pathian peekmi kan pum hi man ngeite in hmanthiam a herh tuk. Na thlaici, na tirawl, na pum le thinlung kha pa kip, nu kip ca asi sual ahcun a poi tuk lai. Khuate khuasa nih tapchak le mi thingai phen kan iziak tuk awk asilo. Khuapi khuasa nih hotel le park hi kan iziak tuk awk asilo (ai duh taktakmi, kan i ṭhi-um ko lai, a timi hna tu cu phundang deuh te a si ve). Ruru hranghrang in kan um tuk deuh. Kan luan deuh vak tawn.

Kan ṭhit-vaat dingmi kan pasal, kan nupi caah a thianghlim mi kan si maw? Na pasal caah, na nupi caah, na nungak caah, na tlangval caah a thianghlimmi na si maw? Zei laksawng dah na peek khawh. Na dawtmi caah ahodah na si. Mi thianghlimlo maw na si, mi thianghlim dah? Kan thilri (thilri hei ti koning mu) hi kan duhpaoh in kan hman ahcun, ahopaoh kha kan peek duahmah ahcun chawken thiamlo mi kan si ko hnga. Ningzak loin chim top ahcun “Mi hur” ti kan fawite.

Biafe

Laimi zumh awktlak kan sinak cu khoika ahdah kan va bawt ne. Hmunkhat um nupa sualnak (living together) a tuahmi zong kan tlawm ti lo. Asiah, kan iṭhi-um taktak lai maw. Hei iṭhi-um ṭung hlah ulaw, nungak dang, tlangval dang nan/kan ngeih tikah ziah, mi thianglo pei kan si ne lai cu. Duhnak kan ngeihmi thinlung hi a zirtian tuk ahcun, a zuanzam tuk ahcun kan i chuihpah te lai. Kan thilri hi ar rawlfah in a mikip kan fah hna ahcun kan itaap te lai. Kan itlum lo buin vam-awng ah itenh bantuk kan si te lai.

Nungak ai za deuh paoh (cheukhat cu nu asi paoh ahcun…) a helhmi tlangval, a rak helhtu pa paoh a cohlang ve mi ngaknu, um…kan mak ti u. Duhnak kongah mi phesen, mi hleusen, mi zirtiang kan tam ko. Kan thinlung kan zuar tawn, kan thilri tiang. Kan philhlo awk cu, ka pasal caah, ka nupi caah, zeibantuk thianhlimnak laksawng dah ka phurh khawh, ka peek khawh ti hi. Kan thinlung (duhnak) le kan pum hi kan dawtmi hna caah a thianghlim mi lungvar bantuk asi awk asi.